Блаженный Иоа́нн Московский, Большой колпак, Христа ради юродивый

И́же Христа́ ра́ди во́лею оста́вив свое́ оте́чество, град Во́логду/ и вся кра́сная ми́ра сего́ возненави́дев,/ жела́нием духо́вным всели́лся еси́ во град Росто́в/ и, я́ко в пусты́ни скита́яся в нем,/ гла́дом, и жа́ждею и безме́рною тягото́ю плоть твою́ изнуря́я,/ и рабо́тая Го́сподеви день и нощь,/ в посте́ и моли́тве пребыва́я в притво́ре церко́внем,/ власы́ же главы́ своея́ пе́плом и смоло́ю удруча́я,/ и, ревну́я Васи́лию блаже́нному,/ прише́л еси́ в ца́рствующий град Москву́/ и, в целому́дрии и терпе́нии тече́ние до́бре сконча́в,/ пресели́лся еси́ к ве́чным оби́телем,/ чуде́с лучи́ испуща́я,/ преблаже́нне Иоа́нне, о́тче наш,// моли́ Христа́ Бо́га спасти́ся душа́м на́шим.

Перевод: Ради Христа ты по своей воле оставил отечество - город Вологду и, все блага мира этого возненавидев, стремлением духовным поселился в городе Ростове и, как в пустыне скитался в нем, голодом и жаждой и безмерными тяготами плоть свою изнуряя, и служа Господу день и ночь, в посте и молитве пребывая в церковном притворе, волосы же на голове своей пеплом и смолой покрывая, и, подражая Василию блаженному, пришел ты в царствующий город Москву и в целомудрии и терпении окончив жизненный путь, переселился в вечные обители, испуская лучи чудотворений, преблаженный Иоанн, отче наш, моли Христа Бога о спасении душ наших.

Житие́ твое́ воздержа́нием и терпе́нием,/ благоюро́де Иоа́нне, украси́л еси́,/ и ча́стыми моли́твами и всено́щным стоя́нием/ ду́шу твою́ просвети́л еси́,/ и обяза́ те́ло твое́ и власы́, и кресты́ с вери́гами тя́жкими,/ мно́га ле́та тружда́яся до исхо́да души́ твоея́,/ и прии́де на твое́ преставле́ние из Росто́ва гра́да/ в ца́рствующий град Москву́,/ к Пресвяте́й Тро́ице и Пречи́стей Бо́жией Ма́тери,/ и ту погребо́ша тя святи́телие,/ и ны́не у гро́ба твоего́ то́чиши исцеле́ния приходя́щим ти с ве́рою./ Моли́ Бо́га приле́жно с пра́ведным Васи́лием о правосла́вных лю́дех./ Сла́ва Да́вшему ти кре́пость,/ сла́ва Венча́вшему тя,// сла́ва Де́йствующему тобо́ю всем исцеле́ния.

Перевод: Житие твое воздержанием и терпением, благой юродивый Иоанн, украсил ты, и частыми молитвами и всенощным стоянием душу твою просветил, и, отяготив тело твое и волосы крестами с тяжелыми веригами, многие годы трудился до исхода души твоей, и пришел на свое преставление из города Ростова в царствующий город Москву, к Пресвятой Троице и Пречистой Божией Матери, и там тебя похоронили святители, и сейчас, от гроба твоего источаешь исцеления приходящим к тебе с верой. Моли Бога усердно с праведным Василием о православных людях. Слава Давшему тебе силу, слава Венчавшему тебя, слава Подающему через тебя всем исцеления.

Любве́ ра́ди Христо́вы/ возненави́дев ми́ра сего́ вся преле́стныя красоты́,/ в ми́ре живы́й, подвиза́ся до́бре, я́ко а́нгел на земли́,/ ве́чныя ра́ди жи́зни,/ и, от земны́х досто́инств таковы́х ду́шу воскреси́в ду́хом,/ плоть же порабо́тив и повину́в во всем ду́ху, Христо́ви распя́ся/ и к Боже́ственней высоте́ пресве́тло взя́тся благода́тию,/ прии́де в Небе́сный черто́г,/ иде́же ны́не, Пресвяте́й Тро́ице со а́нгелы предстоя́,/ во све́те неизрече́нныя ра́дости весели́шися, преблаже́нне Иоа́нне,/ тем благода́рственно вопие́м ти:/ сла́ва Избра́вшему тя в Руси́, блаже́нне, уста́ва изря́дна,/ сла́ва Укре́пльшему тя в наро́де,// сла́ва моли́твами твои́ми и нас спаса́ющему.

Перевод: Любви ради Христовой ты возненавидел все обманчивые блага этого мира, живя в мире ты отлично подвизался, как ангел на земле, ради вечной жизни, и, от земных свойств душу воскресив духом, плоть же поработив и повиновав во всем духу, сораспялся Христу и на Божественную высоту преславно был поднят благодатью, пришел в Небесный чертог, где сейчас с ангелами предстоя Пресвятой Троице, торжествуешь во свете неизреченной радости, преблаженный Иоанн, потому с благодарностью взываем к тебе: «Слава Избравшему тебя на Руси, блаженный, как особое правило, слава давшему тебе Силу в народе, слава по молитвам твоим и нас Спасающему».

И́же Христа́ ра́ди наложи́вый на ся му́дростию юро́дство,/ о́бразом бу́йства зрим от челове́к,/ у́мныма же крыло́ма горе́ возлета́я,/ все те́ло свое́ вери́гами обяза́я,/ я́ко зла́то многоце́нное, соблюде́ся в наро́де,/ очи́стив ум от страсте́й,/ весе́лием духо́вным преше́л еси́ мо́ре мяте́жнаго сего́ жития́,/ обре́те све́тлость жи́зни ве́чныя,/ мо́лим тя, блаже́нне Иоа́нне,/ моли́ся приле́жно Христу́ Бо́гу на́шему/ сохрани́тися нам от вся́каго наве́та/ и злых обстоя́ний ви́димых и неви́димых враг, да зове́м ти:/ ра́дуйся, многострада́льне, я́ко да моли́твами твои́ми направля́еми,/ предстоя́ще при́сно с тобо́ю, в Тро́ице сла́вимому Бо́гу,// пое́м Ему́: аллилу́ия.

Перевод: Ради Христа с мудростью возложивший на себя подвиг юродства, во образе безумия видимый людьми, умными (духовными) же крыльями взлетая ввысь, все тело свое веригами связал, как драгоценное золото, сохранился в народе, очистив ум от страстей, с радостью духовной ты перешел море суетной этой жизни и обрел славу жизни вечной, молим тебя, блаженный Иоанн, молись настойчиво Христу Богу нашему о спасении нашем от всяких козней и злых нападений видимых и невидимых врагов, да взываем к тебе: Радуйся, много пострадав, ты всегда предстоишь с нами в Троице прославляемому Богу, Которому мы, направляемые твоими молитвами, воспеваем: «Аллилуия».

Свято́е и пренепоро́чное поне́сл еси́ самово́льное муче́ние,/ я́ко ве́но пречестно́е, прине́сл еси́ те́ло твое́ к Пресвяте́й Тро́ице и Пречи́стей Богоро́дице/ и ту сотвори́л еси́ честно́е твое́ преставле́ние./ Терпе́нием твои́м и смире́нием а́нгельскии ли́ки удиви́л еси́/ и диа́вола мучи́теля посрами́л еси́,/ от челове́к отгоня́еши ду́хи те́мныя,/ разли́чная исцеле́ния подава́я./ Ра́дуйся, благоюро́де Иоа́нне, с блаже́нным Васи́лием,/ и печа́ль на́шу на ра́дость преложи́,/ моли́ся приле́жно стране́ Росси́йстей от междоусо́бныя бра́ни и от безбо́жных язы́к изба́витися.// Ра́дуйся, земли́ Росси́йския удобре́ние и гра́да на́шего Москвы́ вели́кое утвержде́ние.

Перевод: Ты перенес святое и пренепорочное мучение по своей воле, как драгоценное приданое, принес ты тело свое к Пресвятой Троице и Пречистой Богородице и сотворил там почтенное твое преставление. Терпением твоим и смирением ты удивил ангельское собрание и посрамил мучителя диавола, прогоняя темных духов от людей, подавая различные исцеления. Радуйся, благой юродивый Иоанн, с блаженным Василием, и печаль нашу в радость преврати, молись усердно об избавлении страны Российской от междоусобной войны и от безбожных народов. Радуйся, земли Российской украшение и города нашего Москвы великая сила.

О, преди́вный уго́дниче Христо́в, святы́й пра́ведный Иоа́нне, припа́дающе к ра́це цельбоно́сных моще́й твои́х, лобыза́ем честны́й твой о́браз с ве́рою и усе́рдием неле́стным; со изумле́нием и благогове́нием ду́ха прикаса́емся пречу́дным твои́м вери́гам, я́коже иногда́ Па́вловым главотя́жем и убру́сцем, ча́юще от них де́йствием Вы́шняго получи́ти цельбу́ души́ и те́лу. Прославля́ем всемогу́щество Зижди́теля тва́рей, Его́же ты в жи́зни сей доброде́телями твои́ми просла́вил еси́, ублажа́ем равноа́нгельское на земли́ житие́ твое́, е́же ты поще́нием, бде́нием и воздержа́нием преукра́сил еси́. Пропове́дуем тве́рдость ве́ры твоея́ и любве́, я́же к Бо́гу, те́мже, благогове́йно воспомина́юще богоно́сныя по́двиги твоя́, из глубины́ серде́ц на́ших вопие́м ти: предста́тельством твои́м умоли́ Творца́ и Влады́ку всех, да и мы, ве́рою еди́ною одушевля́еми, потщи́мся соблюсти́ едине́ние ду́ха, препоя́савше чре́сла на́ша и́стиною и обо́лкшеся в брань пра́вды. Ты предстои́ши Престо́лу А́гнца, заколе́ннаго от сложе́ния ми́ра; проле́й те́плыя моли́твы твоя́, да то́йже А́гнец упасе́т нас и наста́вит на живо́тныя исто́чники вод и оты́мет вся́ку слезу́ от оче́й на́ших любве́ ра́ди Христо́вы. Ты те́ло твое́ свято́е посто́м и бде́нием и ноше́нием тя́жких вери́г изможди́л еси́; соде́йствуй твои́м хода́тайством, да бу́дем и мы вы́ну освеща́еми сия́нием Незаходи́маго Со́лнца, да бу́дет зако́н Его́ свети́льник нога́м на́шим и свет стезя́м на́шим. Ты, соедини́вся с Бо́гом, непреста́нным Его́ зре́нием наслажда́ешися и в ве́чных кро́вех со А́нгелы бесе́дуеши; посо́бствуй моли́твами твои́ми, да и мы, предста́вивше к житии́ сем телеса́ на́ша же́ртву жи́ву благоприя́тну Бо́гови, сподо́бимся вкуси́ти с тобо́ю Небе́сных немерца́емых благ. Ами́нь.

О, вели́кий уго́дниче Христо́в Иоа́нне, собра́вшеся днесь во всечестны́й храм сей, усе́рдно припа́даем к тебе́ и, любо́вию ту целу́юще до́блественные по́двиги твоя́ и в них Са́мого прославля́емаго во святы́х Свои́х Подвигополо́жника Христа́ Спаси́теля, дарова́вшаго тебе́ не то́чию, е́же ве́ровати в Него́, но и е́же ре́вностно Ему́ после́довати, похвала́ми ублажа́ем и со слеза́ми мо́лим тя: о имы́й дерзнове́ние ко Христу́ Спа́су, о спасе́нии всех ве́рных хода́тае Иоа́нне! Моли́ с на́ми, по неизрече́нному твоему́ милосе́рдию, от всех умоля́емаго Бо́га о чадоро́дии безча́дных, и о всем оте́честве на́шем, о всех христоимени́тых лю́дей, да ми́лостивно не отста́вит от нас вся ко спасе́нию и житию́ ну́ждная проше́ния и да́рует христиа́нскую кончи́ну животу́ на́шему, безболе́зненну, непосты́дну, ми́рну, Боже́ственных Та́ин прича́стну, и всем, на вся́ком ме́сте во вся́кой ско́рби и обстоя́нии тре́бующим Его́ человеколю́бия и по́мощи, вели́кую Свою́ пода́ст ми́лость, да Боже́ственною Его́ благода́тию и твои́м те́плым предста́тельством, душе́ю и те́лом всегда́ здра́ви пребыва́юще, вы́ну прославля́ем ди́внаго во святы́х Свои́х Бо́га Изра́илева, не удаля́ющаго по́мощи Своея́ от нас всегда́, ны́не и при́сно и во ве́ки веко́в. Ами́нь.

Влады́ко Человеколю́бче, Царю́ Небе́сный, Го́споди Иису́се Христе́, Бо́же наш, нас ра́ди челове́к и на́шего ра́ди спасе́ния сше́дый с Небесе́ и яви́выйся на земли́ и с челове́ки пожи́вый! Ве́лие есть Твое́ и неизрече́нное к ро́ду челове́ческому милосе́рдие, его́же ники́й язы́к изрещи́, ника́я уста́ испове́дати, ниже́ ка́я сердца́ возблагодари́ти по достоя́нию возмо́гут, оба́че наде́ждни су́ще на неизрече́ннаго благоутро́бия Твоего́ ми́лость, ко Твоему́ благосе́рдию, Влады́ко, припа́даем и мо́лим Тя: Го́споди Вседержи́телю, Благотерпели́ве и Многоми́лостиве, пода́ждь нам сла́вити Тя бо́дренным умо́м во вся дни живота́ на́шего. И па́ки вседу́шно со слеза́ми Тя про́сим: о Влады́ко, Го́споди Иису́се Христе́, Бо́же наш, услы́ши нас, гре́шных, моля́щихся Тебе́, и поми́луй нас, и даждь нам свята́го и пра́веднаго Твоего́ уго́дника Иоа́нна, его́же многоцеле́бныя мо́щи соблю́л еси́, всем се́рдцем сла́вити и на по́мощь на́шу вы́ну того́ призыва́ти, свято́му о́бразу его́ усе́рдно поклоня́тися, и к честне́й его́ ра́це с ве́рою несумне́нною припа́дати, и его́ моли́твами пода́ждь моля́щимся Ти неизрече́нная чудеса́ и исцеле́ния мно́га. Те́мже и тебе́, о преди́вный чуде́с соверши́телю, святы́й уго́дниче, блаже́нне Иоа́нне, все единоду́шно про́сим: моли́ся Христу́ Бо́гу на́шему о чадоро́дии безча́дных, и о всех рабе́х твои́х, и поми́луй всех, приходя́щих к тебе́ с ве́рою, и моля́щихся тебе́ умиле́нною душе́ю и сокруше́нным се́рдцем, и покланя́ющихся усе́рдно свято́му твоему́ о́бразу, и призыва́ти тя в ско́рбех и боле́знех на по́мощь. Бу́ди нам помо́щник скор и исцели́тель, да́руй нам неоску́дное здра́вие ко всем по́мощь неосла́бну, бу́ди засту́пник тверд сирота́м и вдови́цам, и всем пода́ждь я́же ко спасе́нию проше́ния, и сохрани́ всех нас, и соблюди́ от всех зол и от всех наве́тов вра́жиих. Ты бо, предста́в Престо́лу Влады́чню, дерзнове́ние и́маши моли́ти неотло́жно о нас, гре́шных и недосто́йных рабе́х твои́х, Христа́ Бо́га на́шего, я́ко Тому́ подоба́ет вся́кая сла́ва, честь и поклоне́ние со Безнача́льным Его́ Отце́м и с Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.