Преподобномученица Арсе́ния Сергиевская (Добронравова), игумения

Благодатию Божиею укрепляемая, / страдания и гонения кротко претерпела еси, / сего ради венцем нетленным от Христа Бога увенчалася еси, / блаженная мати Арсение, / и ныне в славнем сонме Российских новомучеников / на Небеси возсияла еси, // непрестанно молящихся о всех нас, с любовию почитающих тя.

Воскресенско - Феодороския обители украшение, / земли Ивановския покров и защищение, / Православныя Церкве похвало, / преподобномученице мати Арсение, / славная исповеднице веры Христовы, / предстоящая ныне пред Престолом Господа, / не остави нас, во зле погибающих, / моли Его спасти души наша, страстьми одержимыя, // и оставление грехов даровати нам.

Избраннице Царицы Небесныя, / мученице и угоднице Христова Арсение, / не остави обитель свою и люди своя, / с любовию почитающия светлую память твою, / яко имаши дерзновение ко Господу, / от всяких нас бед и болезней свободи / и моли Милостиваго Бога / помиловати нас, молящихся тебе, // и спасти души наша.

Любве ради Христовы / мир оставила еси, мати богомудрая, / паче земнаго богатства избрала еси богатство небесное, / явила еси нам образ терпения и кротости, / во иночестем житии смиренно подвизающися, / страдание и смерть неповинную от власти пребеззаконныя претерпела еси, / темже дерзновение у Всещедраго Бога стяжала еси, / преподобномученице Арсение, // Егоже моли, да спасет души наша.

О, всехвальная угоднице Христова, преподобномученице Арсение, всею душею Господа возлюбившая и подвиг мученичества Того ради совершившая! О верная рабо Царя Небеснаго, добродетелей насадительнице, образе смирения, собеседнице Ангелом, славо и украшение обители сея святыя, стено необоримая и велие заступление ея! К тебе с верою и надеждою притекаем и умиленно просим: моли непрестанно Владыку и Господа Иисуса Христа, Бога нашего, яко имущая к Нему дерзновение велие, да не отступит от нас Его вседействующая благодать. Молим тя, пресвятая мати, недостойная чада твоя, Промыслом Божиим в обитель сию приведенная и под кровом ея ныне тебе молящаяся: испроси молитвами твоими у Христа Бога нашего, да просветит наш ум, очистит совесть нашу от всякия скверны, от нечистых и лукавых помыслов и губительнаго уныния и избавит нас от всяких демонских наветов и озлоблений, дарует же нам искреннее покаяние, сокрушение, воздержание и трезвение сердечное, чистоту душевную и телесную, да восприимем страннолюбие и нищелюбие, ихже ты бысть усердная насадительница, нелицемерную любовь друг ко другу и всякое благочестие. В скорбная времена, настоящая и грядущая, да подаст нам Господь силу донести до конца свой крест, да сохранит от мирских искушений, от диавольских сетей и печати богомерзкаго антихриста. На тя бо, мати, все упование наше возлагаем: да возродит Господь обитель сию в былом благолепии, да процветет она паки, яко крин, да возсияет в земли Ивановстей, спасающи всех с верою к тебе притекающих и помощи у тебе просящих. Умоли, угоднице Божия, Всевышняго Творца даровати мир и благочестие стране нашей православней, сохрани святую обитель твою и всех живущих, подвизающихся и спасающихся в ней от всякаго зла и приведи нас предстательством твоим в светлое Царство Христово, идеже вси праведний вкупе с тобою присно славят Отца и Сына и Святаго Духа, ныне и присно и во веки веков. Аминь.