Икона Богородицы Валаамская

Богоро́дице Де́во, на Твою́ ико́ну пресве́тлую взира́юще, ра́дуемся, пред не́ю бо на о́строве Валаа́ме мольбы́ усе́рдно моля́щихся исполня́ются; услы́ши, Пречи́стая, и на́с моля́щих Ти́ ся́, утверди́ на́с в ве́ре и любви́, и испроси́ ми́рови ми́р и душа́м на́шим ве́лию ми́лость.

Перевод: Богородица Дева, на Твою икону пресветлую взирая, радуемся, ибо перед ней на острове Валаам исполняются мольбы усердно молящихся. Услышь, Пречистая, и нас молящихся Тебе, укрепи нас в вере и любви, и испроси мир всему миру и душам нашим великую милость.

Днесь све́тло красу́ется оби́тель Валаа́мская, и вси ве́рнии в земли́ Росси́йстей духо́вно торжеству́ют, прославля́юще чудотво́рную ико́ну Твою́, Влады́чице, к не́йже ны́не мы притека́юще с любо́вию глаго́лем си́це: о Пречи́стая Де́во Богоро́дице, моли́ Сы́на Своего́ Христа́ Бо́га на́шего, да изба́вит оби́тель сию́ и вся гра́ды и ве́си страны́ на́шея, от всех наве́т вра́жиих и спасе́т ду́ши на́ша я́ко Милосе́рд.

К Богоро́дице приле́жно ны́не притеце́м и к Ея́ ико́не чудотво́рней припаде́м и возопие́м Ей: о Пречу́дная Влады́чице Богоро́дице, ско́рое нам яви́ заступле́ние и по́мощь, зе́млю на́шу ми́ром огради́, ускори́ от вся́ких бед изба́вити ны по вели́цей Твое́й ми́лости.

Избра́нной Воево́де, Влады́чице на́шей Богоро́дице, похва́льныя пе́сни прино́сим, прославля́юще чудотво́рную Ея́ ико́ну, на о́строве Валаа́ме я́вльшуюся. Ты же, я́ко иму́щая Держа́ву непобеди́мую, от вся́ких бед и печа́лей изба́ви страну́ Росси́йскую и сотвори́ мольбу́ за вся́ лю́ди пою́щия Тебе́: Ра́дуйся, Неве́сто Неневе́стная.

О, Чу́дная и вы́шшая все́х тва́рей Цари́це Богоро́дице, Небе́снаго Царя́ Христа́ Бо́га на́шего Ма́ти! Услы́ши ны́ гре́шныя и недосто́йныя рабы́ Твоя́, в ча́с се́й моля́щияся и припа́дающия к Тебе́ со воздыха́нием и слеза́ми и уми́льно глаго́лющия: изведи́ на́с от ро́ва страсте́й, Влады́чице, изба́ви на́с от вся́кия ско́рби и печа́ли, огради́ от вся́кия напа́сти и злы́х клеве́т и от непра́веднаго и лю́таго наве́та вра́жия. Мо́жеши бо, о, Благода́тная Ма́ти Бо́жия, не то́чию от вся́каго зла́ сохрани́ти лю́ди Твоя́, но и вся́ким благодея́нием снабди́ти и́х и спасти́, ра́зве Тебе́ ины́я Предста́тельницы в беда́х и обстоя́ниих и те́плыя Хода́таицы о на́с гре́шных не и́мамы к Сы́ну Твоему́, Христу́ Бо́гу на́шему. Его́же умоли́, Влады́чице, да, спасе́ннии Тобо́ю, сла́вим в бу́дущем ве́це всесвято́е и́мя Сы́на Твоего́ и Бо́га на́шего, ку́пно со Отце́м и Святы́м Ду́хом, ны́не и в безконе́чныя ве́ки. Ами́нь.

О, Пресвята́я и Преблагослове́нная Влады́чице Богоро́дице, Небесе́ и земли́ Цари́це, оби́тели Валаа́мския Покрови́тельнице! Припа́даем и покланя́емся Тебе́ пред чудотво́рною ико́ною Твое́ю, и я́ко призре́ла еси́ ми́лостивно на моли́тву боля́щия рабы́ Твоея́ и дарова́ла еси́ е́й исцеле́ние, та́ко и ны́не приими́ на́ше усе́рдное моле́ние, тебе́ приноси́мое.
Спаси́ и сохрани́, Всеми́лостивая, оте́чество на́ше и вся́ лю́ди правосла́вныя, живу́щия в не́м и к Тебе́ с любо́вию прибега́ющия, от наше́ствия иноплеме́нных, от гла́да и мо́ра, и от вся́каго зла́; упра́ви пути́ на́ша, да возсия́ют в земли́ Ру́сстей пра́вда и ми́р, ра́дость и любо́вь, сохрани́ в не́й до сконча́ния ве́ка ве́ру Правосла́вную.
Воззри́ ми́лостивым о́ком Твои́м на оби́тель Валаа́мскую и соверши́ Сама́ о Го́споде спасе́ние все́х в ве́ре и наде́жде подвиза́ющихся в не́й. Умоли́ Сы́на Твоего́ и Бо́га на́шего, да изба́вит все́х на́с от вся́кия беды́, ско́рби и боле́зни, да наста́вит на исполне́ние за́поведей Свои́х, от ве́чныя му́ки изба́вит и да сподо́бит Твои́м хода́тайством всели́тися во оби́телех Небе́сных и сла́вити та́мо Пресвяту́ю Тро́ицу, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Пресвята́я Госпоже́, Влады́чице Богоро́дице, страны́ на́шея Засту́пнице, оби́тели Валаа́мския красото́ и сла́во! Взира́юще на Пречи́стый ли́к Тво́й, в чудотво́рней ико́не явле́нный, мо́лим Тя́, сохрани́ от вся́каго зла́ оби́тель сию́, ю́же преподо́бнии Се́ргий и Ге́рман основа́ша, во бра́тии ми́р огради́ и соблюди́, осени́ Покро́вом Твои́м строи́телей, благотвори́телей и благоукраси́телей ея́.
О, Всечестна́я на́ша Ма́ти, Игу́мения все́х правосла́вных оби́телей и и́ноческаго жития́ Покрови́тельнице, пребу́ди неотсту́пна от оби́тели сия́, су́щаго достоя́ния Твоего́, и всеси́льными Твои́ми моли́твами покры́й и заступи́ на́с, зде́ подвиза́ющихся, от вся́ких бе́д и ну́жд, помози́ уста́вы преподо́бных оте́ц непоколеби́мы сохрани́ти, изба́ви от паде́ний грехо́вных, да́руй на́м ду́х сокруше́ния и смире́ния, наста́ви на исполне́ние обе́тов и́ноческих и все́х за́поведей Бо́жиих.
Приими́ смире́нное моле́ние на́ше, согре́й на́с дыха́нием любве́ Твоея́ и никогда́ не отступа́й от на́с, да не оскуде́ет ве́ра в на́с гре́шных, и да сподо́бимся вни́ти в Ца́рствие Небе́сное, в не́мже возвели́чим Тя́, Ма́терь на́шу Всепе́тую, и просла́вим Сы́на Твоего́ и Бо́га на́шего со Безнача́льным Его́ Отце́м и Пресвяты́м и Животворя́щим Его́ Ду́хом, ны́не и при́сно и во ве́ки веко́в. Ами́нь.