23 мая 2027

Да веселя́тся Небе́сная,/ да ра́дуются земна́я,/ я́ко сотвори́ держа́ву/ мы́шцею Свое́ю Госпо́дь,/ попра́ сме́ртию сме́рть,/ пе́рвенец ме́ртвых бысть;/ из чре́ва а́дова изба́ви нас,// и подаде́ ми́рови ве́лию ми́лость.

Ду́шу мою́, Го́споди, во гресе́х вся́ческих,/ и безме́стными дея́ньми лю́те разсла́блену,/ воздви́гни Боже́ственным Твои́м предста́тельством,/ я́коже и разсла́бленнаго воздви́гл еси́ дре́вле,/ да зову́ Ти спаса́емь:// Ще́дрый, сла́ва, Христе́, держа́ве Твое́й.

Апо́столе святы́й Си́моне,/ моли́ ми́лостиваго Бо́га,/ да прегреше́ний оставле́ние// пода́ст душа́м на́шим.

Перевод: Апостол святой Симон, умоли милостивого Бога, да согрешений прощение подаст Он душам нашим.

Изве́стно прему́дрости уче́ния в душа́х благоче́ствующих поло́жшаго/ во хвале́нии ублажи́м, я́ко Богоглаго́ливаго вси Си́мона:/ престо́лу бо сла́вы ны́не предстои́т и со Безпло́тными весели́тся,// моля́ся непреста́нно о всех нас.

Перевод: Учения премудрости твердо в души благочестивых вложившего хвалами все прославим богословесного Симона: ибо он престолу славы ныне предстоит и с бесплотными Силами веселится, ходатайствуя непрестанно о всех нас.

Святы́й сла́вный и всехва́льный апо́столе Христо́в Си́моне, сподо́бивыйся прия́ти в дом твой в Ка́не Галиле́йстей Го́спода на́шего Иису́са Христа́ и Его́ Пречи́стую Ма́терь, Влады́чицу на́шу Богоро́дицу, и очеви́дцем бы́ти пресла́внаго чудесе́ Христо́ва, на бра́це твое́м явле́ннаго, претворе́ния воды́ в вино́! Мо́лим тя с ве́рою и любо́вию: умоли́ Христа́ Го́спода претвори́ти ду́ши на́ша из грехолюби́вых в боголюби́выя; сохрани́ и соблюди́ нас моли́твами твои́ми от искуше́ний диа́вольских и паде́ний грехо́вных, и испроси́ нам свы́ше по́мощь во вре́мя уны́ния и беспомо́щия на́шего; да не преткне́мся о ка́мень собла́зна, но неукло́нно ше́ствуем спаси́тельным путе́м за́поведей Христо́вых, до́ндеже дости́гнем о́ных блаже́нных оби́телей ра́йских, иде́же ты ны́не водворя́ешися и весели́шися. Ей, апо́столе Спа́сов! Не посрами́ нас, кре́пце на тя упова́ющих, но бу́ди нам помо́щник и покрови́тель во всем житии́ на́шем и помози́ нам благоче́стно и богоуго́дно житие́ сие́ вре́менное сконча́ти, благу́ю и ми́рную христиа́нскую кончи́ну получи́ти и до́браго отве́та сподо́битися на Стра́шнем Суде́ Христо́ве; да избежа́вше мыта́рств возду́шных и вла́сти лю́таго мироде́ржца, унасле́дуем Ца́рство Небе́сное и просла́вим великоле́пое и́мя Отца́ и Сы́на и Свята́го Ду́ха, во ве́ки веко́в. Ами́нь.

Жити́й преподо́бных оте́ц Пече́рских списа́телю изве́стный,/ святи́телю Христо́в Си́моне всеблаже́нне,/ моли́ся приле́жно с ни́ми Христу́ Бо́гу,/ да упра́вит в ми́ре живо́т наш/ и в кни́ги живо́тныя да напи́шет ны,// спаса́я ду́ши на́ша.

Перевод: Известный составитель житий преподобных отцов Печерских, святитель Христов Симон преблаженный, молись настойчиво с ними Христу Богу, да сделает мирной жизнь нашу и в книги жизни да запишет нас, спасая души наши.

Святи́тельства оде́ждою,/ а́ще и досто́йне оде́ялся еси́,/ оба́че тем не вознося́ся,/ жела́л еси́ па́че сме́тием пред враты́ Ла́вры Пече́рския поврещи́ся,/ смиренному́дре Си́моне./ Те́мже, не а́ки сме́тие, врат вне,/ но, я́ко сокро́вище, внутрь святы́я пеще́ры положе́н бы́ти сподо́бился еси́,/ и ны́не на Небеси́ Го́сподеви предстоя́,// моли́ся о нас, чту́щих тя.

Перевод: В одежды святительские, хотя и по достоинству ты был облачен, однако этим не превозносился и желал ты лучше повергнуть себя как сор за ворота Лавры Печерской, смиренномудрый Симон. Но не как сор за воротами, а, как сокровище, в святую пещеру ты удостоился быть положенным, и сейчас, предстоя на Небесах Господу, молись о нас, почитающих тебя.

О, свяще́нная главо́, вели́кий уго́дниче Бо́жий, святи́телю Христо́в и чудотво́рче, преподо́бне и Богоно́сне о́тче Си́моне! К тебе́, небе́сному засту́пнику и те́плому предста́телю на́шему с ве́рою и любо́вию припа́даем и со упова́нием всеусе́рдно мо́лим тя: яви́ милосе́рдие твое́ нам смире́нным и гре́шным, и проле́й те́плыя моли́твы твоя́ о нас ко Го́споду, Ему́же со А́нгелы и все́ми святы́ми предстои́ши на Небеси́ во сла́ве ве́чней. Ве́мы, свя́тче Бо́жий, я́ко сво́йственно есть тебе́ милосе́рдие, и́бо еще́ на земли́ живу́щу ти, еди́но име́л еси́ попече́ние, е́же спаса́ти от поги́бели грехо́вныя ду́ши челове́ческия; те́мже у́бо потщи́ся, благосе́рде, предстоя́ стра́шному Престо́лу Го́спода Сла́вы, хода́тайствовати о на́шем спасе́нии, да не поги́бнем лю́те со беззако́нии на́шими. Ве́руем, о́тче всеблаже́нне, я́ко ты и́же Христо́вою любо́вию, бли́жния твоя́ возлюби́л еси́, всегда́ пребыва́л еси́ в ми́ре сем, кольми́ па́че лю́биши вся ны о Го́споде на Небесе́х водворя́яся; те́мже всеусе́рдно мо́лим тя, я́ко отца́ нам су́ща, да вы́ну соблюда́еши ны под покро́вом твои́м от вся́каго зла. Ты, о́тче преподо́бне, не то́чию сам ве́рою пра́вою и благи́ми де́лы до́бре угоди́вый Го́сподеви, но и ины́х научи́вый пра́во ве́ровати и во́лю Бо́жию твори́ти, ве́лий нарече́н еси́ во Ца́рствии Небе́сном, по нело́жному обетова́нию Христ́ову; те́мже у́бо наста́ви и нас, да́нною тебе́ от Го́спода благода́тию, та́ко ве́ровати, и та́ко путе́м за́поведей Госпо́дних ше́ствовати, я́ко не то́чию нам саме́м николи́же на поги́бельный путь неве́рия и на стезю́ повеле́ниям Бо́жиим проти́ву соврати́тися, но па́че да бу́дем дово́льни и ины́х во правове́рии утверди́ти и на путь и́стинного благоче́стия наста́вити. О преблаже́нне, потщи́ся у́бо о сем наипа́че умоля́ти Щедрода́вца Бо́га, да пода́ст нам ве́ру пра́ву и несумне́нну, благоче́стие и́скреннее и непоколеби́мое, братолю́бие нелицеме́рное, и преспе́яние во всех благи́х де́лех, да вы́ну памятующе зва́ние и избра́ние на́ше, бу́дем, я́коже учит святы́й апо́стол, соверше́нни и испо́лнени во вся́кой во́ли Бо́жией, никому́же не полага́юще претыка́ния или́ собла́зна ни сло́вом, ни житие́м на́шим, но всегда́ промышля́юще то́чию до́брая пред Бо́гом и челове́ки. Еще́ же припа́дающе мо́лим тя, уго́дниче Христо́в, предста́тельствовати ко Всеми́лостивому Влады́це и Царю́ ца́рствующих, да сохрани́т под покро́вом Своея́ бла́гости, во здра́вии и непременя́емом благополу́чии богохрани́мый наро́д наш, и изба́вит его́ от вся́каго зла́го обстоя́ния; да соблюде́т Це́рковь святу́ю от ересе́й и раско́лов, держа́ву же правосла́вно-ру́сскую от вся́каго мяте́жа, бра́ней и нестрое́ний; да даст па́стырем Це́ркви святу́ю ре́вность о спасе́нии пасо́мых и просвеще́нии неве́рующих све́том Богоразу́мия, и да умудри́т их пра́во пра́вити сло́во и́стины; да́рует нача́льствующим му́дрость и си́лу, подчине́нным усе́рдие и благопоко́рливость, судия́м прозо́рливость и нелицеприя́тие, супру́гам ве́рность и единоду́шие, роди́телем ра́зум и благоче́стие, ча́дом кро́тость и послуша́ние, наста́вником и воспита́телем ю́ношества доброучи́тельность и смиренному́дрие, уча́щимся и воспиту́емым благо́е в ве́ре и благоче́стии науче́ние и возраста́ние, всем же лю́дем всяк дар коему́ждо благопотре́бен, вся́ку благовре́менну по́мощь во благи́х де́лех, и вся ко спасе́нию и сла́ве Бо́жией подоба́ющая. Сохрани́, о́тче преподо́бне, твои́ми богоприя́тными моли́твами вся гра́ды и ве́си держа́вы на́шея, и град сей, и дом сей, от вся́каго зла и нападе́ний вра́жиих, вся же правове́рныя лю́ди, с любо́вию и упова́нием притека́ющия к покро́ву твоему́, и благоче́стно покланя́ющияся моще́м твои́м, осени́ небе́сным твои́м благослове́нием, и вся проше́ния их во бла́го испо́лни. Ей, уго́дниче Бо́жий, не пре́зри моле́ний на́ших, и не посрами́ нас от упова́ния и ча́яния на́шего! Се бо мы недосто́йнии, и смире́ннии мно́гих грехо́в испо́лненнии, ве́дуще, я́ко гре́шники Бог не послу́шает, но а́ще кто Богочте́ц есть и во́лю Его́ твори́т, того́ послу́шает, ко твоему́ прибега́ем предста́тельству, тобо́ю дерза́ем умоля́ти милосе́рдие Бо́жие; ве́руем бо, всеблаже́нне, я́ко ели́ка а́ще ты, пра́веден сый, воспро́сиши в моли́тве от Бо́га, даст ти Бог. Те́мже у́бо бу́ди те́плый о нас предста́тель ко Щедрода́вцу Бо́гу, да твое́ю по́мощию и заступле́нием ми́рно и благоче́стно пожи́вше на земле́ сподо́бимся и небе́сных благ восприя́тия, сла́вяще и превознося́ще Отца́, и Сы́на, и Свята́го Ду́ха, Еди́наго в Тро́ице сла́вимаго и покланя́емаго Бо́га, и твое́ ми́лостивое предста́тельство во ве́ки веко́в. Ами́нь.

О, всехва́льный и всечестны́й архиере́ю, святи́телю Христо́в, преподо́бне и богоно́сне о́тче Си́моне! При́зри, с сво́йственным тебе́ благосе́рдием, от высо́т Небе́сных, иде́же со А́нгелы и все́ми святы́ми Го́споду Сла́вы предстои́ши, на нас недосто́йных и до́лу прекло́нных, смире́нных же и гре́шных, притека́ющих к многомо́щному предста́тельству твоему́ с ве́рою, любо́вию и упова́нием. Простри́ моли́твенно преподо́бныя ру́це твоя́ ко Го́споду и Влады́це, и испроси́ от щедрода́тельныя Его́ благосты́ни оставле́ние согреше́ний на́ших во́льных и нево́льных, покая́ние серде́чное, здра́вие душе́вное и теле́сное, житие́ ми́рное и безмяте́жное, возду́ха благорастворе́ние, земли́ плодоно́сие, жите́йских потре́б дово́льство, во всем благо́е поспеше́ние, и да не во зло обрати́м да́руемая нам блага́я, но во сла́ву пресвята́го и́мене Его́, и во спасе́ние на́ше. Еще́ же припа́дающе мо́лим тя, потщи́ся, благосе́рде, предста́тельствовати ко Го́споду Человеколю́бцу, да изба́вит нас, по вели́цей Свое́й ми́лости, от вся́ких бед и скорбе́й, от вся́ких неду́гов и боле́зней, от внеза́пныя сме́рти и от всех озлобле́ний, от вся́ких ко́зней враго́в ви́димых и неви́димых и от вся́каго зла; да укрепи́т в нас пра́вую ве́ру и благоче́стие нелицеме́рное, и да пода́ст нам си́лы в борьбе́ со страстьми́ и похотьми́ на́шими; да соблюде́т нас от нечести́вых и душепа́губных уче́ний неве́рия и суеве́рия, и́миже наве́туется в нас святооте́ческая Правосла́вная ве́ра, и да изба́вит нас от вся́ких прираже́ний ду́ха, и́же ны́не де́йствует в сыне́х противле́ния; да всади́т в сердца́ на́ша дух смире́ния и кро́тости, дух братолю́бия и незло́бия, дух терпе́ния и целому́дрия, дух святы́я ре́вности о сла́ве Бо́жией и спасе́нии бли́жних; да при́зрит благоутро́бно на вся́кую ду́шу, тре́бующую благода́тныя Его́ ми́лости, и да́рует, по неизрече́нным щедро́там Своего́ человеколю́бия, боля́щим исцеле́ние, скорбя́щим утеше́ние, малоду́шным успокое́ние, уныва́ющим ободре́ние, стра́ждущим осла́бу, бе́дствующим по́мощь, си́рым покро́в, безприю́тным приста́нище, оби́димым защи́ту, злосло́вимым терпе́ние, уничижа́емым великоду́шие, гони́мым заступле́ние, оклевета́емым оправда́ние, и всем, во вся́ких ну́ждах и злострада́ниях су́щим, душе́вную отра́ду, и ско́рое избавле́ние. Ей, свя́тче Бо́жий, бу́ди те́плый моли́твенник и приле́жный хода́тай ко Го́споду о вся́кой души́ ве́рных твои́х чти́телей, и́щущих твоея́ по́мощи, да никто́же во упова́нии свое́м на тя посра́млен бу́дет, но вси предста́тельством твои́м да обря́щут, во вся́ких обстоя́ниих, благода́ть и ми́лость Всеще́драго Бо́га, Ему́же подоба́ет вся́кая сла́ва, честь и поклоне́ние, ны́не и при́сно, и во ве́ки веко́в. Ами́нь.

Я́ко вои́стинну гла́са апо́стольскаго/ послу́шатель был еси́, блаже́нне Си́моне,/ Христа́ бо ра́ди изво́лив име́ти бу́йство,/ в не́мже соблю́л еси́ твоя́ к Бо́гу доброде́тели, посреде́ молв некра́домы,/ терпе́нием у́бо пачеесте́ственным Христу́ подража́в,/ посрами́л еси́ льсти́ваго всю горды́ню,/ тем и в лю́тых ра́нах, я́коже дре́вний Ла́зарь,/ в не́дра Авраа́мля пресели́лся еси́,/ иде́же и ны́не утеша́яся, посеща́й град твой,// почита́ющий любо́вию святу́ю па́мять твою́.

Перевод: Ты был истинный последователь слов апостольских, блаженный Симон, ибо желал иметь безумие Христа ради (1Кор.4:10), в нем же сохранил ты добродетели перед Богом, которые невозможно похитить среди волнений (житейских), ибо ты сверхъестественным терпением подражая Христу, посрамил всю гордыню льстивого (диавола), потому и в жестоких ранах, как раньше Лазарь, отошел в лоно Авраамово (Лк.16:19-22), где и сейчас получаешь утешение, посещай город твой, почитающий с любовью святую память твою.

Возгоре́вся раче́нием Го́рним,/ же́стость во́льнаго юро́дства па́че всех сла́дких ми́ра предпоче́л еси́,/ отону́дуже повину́ся ти огнь,/ от его́же запале́ния град твой Юрьевец изба́вил еси́,/ и во́ды немо́кренно, я́ко по су́ху, преше́л еси́,/ и хотя́щия бы́ти предре́кл еси́,/ просла́вльшу тя та́ко Бо́гу,/ к Нему́же моля́ся и о нас,// пою́щих тя, блаже́нне Си́моне, помина́й.

Перевод: Возгоревшись усердием о Небесном, жестокость юродства по своей воле ты предпочел всем благам мира, потому и повиновался тебе огонь, от сожжения которым ты спас город твой Юрьевец, и по воде, как по суше, ты ходил, и предсказал то, что должно было произойти, ибо прославил тебя так Бог, Ему же молясь и о нас вспоминай, воспевающих тебя, блаженный Симон.

О, Всесвяты́я, Живонача́льныя и Неразде́льныя Тро́ицы и́стинный уго́дниче и ве́рный ра́бе, блаже́нне и приснопа́мятне Си́моне! О, избра́нниче Бо́жий, а́ще и ми́ру я́ко юро́д бы́вый, но прему́дрыя житие́м твои́м удивля́яй! О, преукраше́нный доброде́тельми ди́вный чудотво́рче Си́моне! Се при́сно ублажа́ем и ублажа́ти тя бу́дем, предублаже́ннаго Го́сподем на́шим Иису́сом Христо́м. Ты бо, поревнова́в всех пра́ведных блаже́нству, оста́вил еси́ вся ми́ра сего́ преходя́щая, и восле́д ве́рныя на́шея ра́дости и воскресе́ния Всесладча́йшаго Иису́са поте́кл еси́, и всеси́льною Того́ по́мощию да́же го́рняго Сио́на дости́гл еси́, иде́же есть веселя́щихся жили́ще. Ублажа́юще у́бо тя, приле́жно мо́лим, пра́ведный челове́че Бо́жий: при́зри на ны, во мно́гая искуше́ния впада́ющия, моли́ о нас неизрече́нную всех челове́к ра́дость и упова́ние, Собезнача́льнаго Отцу́ и Ду́ху Единоро́днаго Сы́на и Сло́во Бо́жие, да и нас, Того́ непамятозло́бное милосе́рдие прогневля́ющих, не оста́вит и вся на по́льзу нам да устро́ит, па́че же да утверди́т ны во свое́й Правосла́вней, и́стинней и непоро́чней ве́ре непоколеби́мы и пра́ведными Свои́ми судьба́ми да спасе́т нас, ниже́ да попу́стит ны искуси́тися па́че, не́же мо́жем, и от бед же и печа́лей, при́сно на ны зде грех ра́ди на́ших быва́ющих, ми́лостивно нас да изба́вит. Ей, мо́лим тя, ра́бе Христо́в: я́коже в жи́зни твое́й на тре́бующия по́мощи призира́л еси́, та́ко и ны́не нас, тебе́ моля́щихся, не отврати́, но предста́ни о нас ко Го́споду и от лю́тых паде́ний моли́твами твои́ми изми́ нас. Умоли́ Его́, да град твой сей, в не́мже доброде́тельно пожи́в, Бо́гу угоди́л еси́, сохрани́т от всех наве́т вра́жиих и лю́ди, в нем живу́щия, ве́чныя жи́зни досто́йны да пока́жет. Па́ки мо́лим тя, блаже́нне Си́моне, посеща́й нас, тебе́ моля́щихся, в ну́ждах на́ших, да тобо́ю заступа́еми, непреста́нно прославля́ем Христа́ Бо́га на́шего, те́плаго предста́теля нам тя дарова́вшаго, я́ко Тому́ подоба́ет вся́кая сла́ва, честь и поклоне́ние со Отце́м и Святы́м Ду́хом ны́не и при́сно, и во ве́ки веко́в. Ами́нь.

Днесь, благове́рнии лю́дие, соше́дшеся,/ восхва́лим до́бляго сего́ му́ченика и страда́льца Авраа́мия,/ сей бо, укрепля́емь си́лою Бо́жиею,/ ду́шу свою́ положи́ за Христа́,/ мно́го пострада́в от злове́рных болга́р./ Сего́ ра́ди от Го́спода вене́ц прия́т/ и ны́не предстои́т Ему́/ и мо́лится о гра́де сем// и о всех нас, чту́щих па́мять его́.

Перевод: Сегодня, благоверный народ, собравшись прославим доблестного мученика и страдальца Авраамия, ибо он, укрепляемый силой Божией, душу свою отдал за Христа, претерпев много страданий от болгарских мусульман. Поэтому и получил от Господа венец и сейчас предстоит Ему и молится о городе этом и о всех нас, почитающих память его.

Я́ко многоце́нное сокро́вище,/ принесе́но бысть от Болга́рския страны́ во град Влади́мир/ пречестно́е те́ло твое́, му́чениче Авраа́мие,/ и́мже подае́ши всем чту́щим пресла́вную па́мять твою́ оби́лие исцеле́ний,/ предстоя́ на Небеси́ Христу́ Бо́гу// и моля́ Его́ о спасе́нии душ на́ших.

Перевод: Как драгоценное сокровище перенесены были из Болгарии в город Владимир досточтимые мощи твои, мученик Авраамий, через которые ты подаешь всем, почитающим преславную память твою, обильные исцеления, предстоя на Небесах Христу Богу и моля Его о спасении душ наших.

Укрепи́вся, сла́вне, любо́вию Госпо́днею/ и Того́ честны́й Крест на ра́мо взем, и́го Госпо́дне,/ посрами́л еси́ диа́воля кова́рствия/ и пострада́л еси́ да́же до сме́рти,/ и сего́ ра́ди, досточу́дне, яви́ся страда́лец вели́к, Авраа́мие,/ и ору́жником храбротаи́нник// и уча́стник Бо́жия благода́ти.

Перевод: Укрепившись, достойный славы, любовью Господа и подняв Его почитаемый Крест на плечи, как иго Господне (Мф.11:29), ты посрамил коварство диавола и претерпел мученичество до смерти и потому, достойный удивления, явился великим мучеником, Авраамий, воином и храбрым учеником Христовым, причастником Божией благодати.

Святы́й му́чениче Авраа́мие, до́блий во́ине Христа́ Царя́ Небе́снаго, в ско́рбех и напа́стех пресла́вный наш помо́щниче и защи́тниче! Ничто́ же возмо́же отлучи́ти тя от любве́ ко Го́споду Иису́су, ни ле́стныя обеща́ния благ вре́менных, ни преще́ния, ни му́ки от злых враго́в святе́йшия Христо́вы ве́ры; ты, я́ко лев, изше́л еси́ на брань проти́ву волко́в мы́сленных, духо́в зло́бы, подви́гших на тя, ра́ди до́браго твоего́ испове́дания, единоплеме́нный тебе́ наро́д болга́рский, и, я́ко о́гненная стрела́, тех порази́л еси́ си́лою благода́ти Свята́го Ду́ха, и кре́пкия, я́ко смерть, любве́ твоея́ к Бо́гу. А́ще и пролия́л еси́ кровь твою́ за Христа́ Бо́га на́шего, погуби́в вре́менную жизнь, оба́че безсме́ртною душе́ю, я́ко оре́л, воспари́л еси́ в го́рния оби́тели Отца́ на́шего, насле́довав там ве́чную жизнь, сла́ву и блаже́нство неизрече́нное, и оста́вив нам нетле́нныя оста́нки твоя́, я́ко крин многоце́нный и благоуха́нный. Ве́руем, страстоте́рпче святы́й, я́ко предстоя́ со а́нгелы и все́ми святы́ми Престо́лу сла́вы Триипоста́снаго Бо́га, усе́рдныя и богоприя́тныя возно́сиши моли́твы не то́кмо о нас и о гра́де на́шем, но и о всей святе́й Христо́вой Це́ркви и о правосла́внем оте́честве Росси́йстем. Ве́руем, пресла́вный чудотво́рче, я́ко ты, си́лою всемогу́щаго Го́спода Иису́са Христа́, чрез святы́я мо́щи твоя́, источа́еши оби́льныя да́ры благода́тныя по́мощи во спасе́ние всем с ве́рою к тебе́ притека́ющим, наипа́че же испра́шиваеши и кончи́ну с покая́нием тебе́ чту́щим, и благосе́рдно помога́еши немощны́м младе́нцем, да вси от ма́ла до вели́ка единоду́шно прославля́ем неисповеди́мое вели́чие бла́гости Бо́жией. Тем же ве́рою и любо́вию ко святы́м моще́м твои́м припа́дающе и благогове́йно о́ныя лобыза́юще, умоля́ем тя, до́брый на Небеси́ наш моли́твенниче и засту́пниче, помога́й нам гре́шным и смире́нным, твои́ми моли́твами во всех ско́рбех, ну́ждах и обстоя́ниих на́ших, сохраня́й нас и град сей от вся́каго зла и вся́кия напа́сти, наипа́че же споспешеству́й ве́чному спасе́нию на́шему и всех прося́щих от тебе́ по́мощи и заступле́ния. Ей, смире́нно мо́лим тя, уго́дниче Бо́жий, моли́ Христа́ Бо́га на́шего, да даст Он мир и тишину́ всем правосла́вным христиа́ном и да отврати́т от нас вся́кий гнев, на ны дви́жимый, да изба́вит нас от сете́й вра́жиих, томле́ния во у́зах греха́ и муче́ний а́дских, и да сподо́бит нас недосто́йных одесну́ю Себе́ ста́ти на суде́ Свое́м пра́ведном и вни́ти в ве́чный поко́й святы́х Его́, иде́же пра́зднующих глас непреста́нный и неизрече́нная сла́дость зря́щих добро́ту лица́ Его́; и та́ко возмо́жем с тобо́ю и все́ми святы́ми безконе́чно прославля́ти Отца́ и Сы́на и Свята́го Ду́ха, Тро́ицу Единосу́щную и Неразде́льную. Ами́нь.

Днесь ве́ра Христо́ва утвержда́ется ка́менем ве́ры,/ и ликовству́ет в весе́лии Иоппи́я,/ псало́мски славосло́вят Жизнода́вца Сы́на Бо́жия ве́рнии,/ ви́дяще соверша́емо ве́лие чу́до:/ первоверхо́вный апо́стол глаго́лет,/ и уме́ршая востае́т от гро́ба,/ ю́же Низложи́тель сме́рти да́рует Це́ркви,/ да украша́ются во о́браз ея́ доброде́тельми лю́ди./ Прииди́те у́бо, христиа́не,/ принесе́м ко святе́й моле́ния на́ша:/ блаже́нная Тави́фо и милосе́рдная,/ вознеси́ на́ша воздыха́ния Пресвяте́й Тро́ице,/ и моли́ся со дерзнове́нием,/ да сы́нове све́та Преве́чнаго бу́дем,/ да сподо́бимся Бо́жия ми́лости,/ да пребыва́ем в любви́ Боже́ственней,// и да ца́рствует мир во вселе́нней.

Перевод: Сегодня вера во Христа утверждается Камнем веры (Мф.16:18) и радостно торжествует Иоппия, псалмопением славят верующие Подателя Жизни Сына Божия, видя как совершается великое чудо: первенствующий апостол повелевает и умершая встает из гроба, ее же Низвергнувший смерть дарует Церкви, чтобы по ее примеру люди украшали себя добродетелями. Придите христиане, принесем ко святой молитвы наши: блаженная Тавифа и милосердная, вознеси наши скорби ко Пресвятой Троице и молись с дерзновением о том, чтобы мы стали сынами Всевечного света, удостоились Божией милости, пребывали в Божественной любви и во вселенной царствовал мир.

Ужаса́хуся Иоппи́йстии лю́дие, и дивля́хуся А́нгели Бо́жии,/ егда́ Исцели́вый Енне́я воззва́ от ме́ртвых се́рну нарица́емую, милосе́рдием преукра́шенную,/ о не́йже к нему́ взыва́ху вдови́цы неиму́щия./ И ны́не, Тави́фо блаже́нная, услы́ши моли́твы на́ша, к тебе́ приноси́мыя,/ и испроси́ у вся́ческих благ Пода́теля ми́лости и щедро́ты ве́рным Его́,/ да блажа́ще тя, вопие́м ти:// ра́дуйся, доброде́тели нас науча́ющая.

Перевод: Ужасались люди в Иоппии и удивлялись Ангелы Божии, когда Исцеливший Энея (Деян.9:32-34) призвал из мертвых зовущуюся серной (Деян.9:36), украшенную милосердием, о ней же взывали к нему (Петру) бедные вдовы. И сейчас, Тавифа блаженная, услышь молитвы наши, к тебе приносимые, и испроси у Подателя всяческих благ милости и сострадания верующим Его, да прославляя тебя взываем: «Радуйся, научающая нас добродетели».

Первонача́льная Це́рковь ликовству́ет,/ Иоппи́я тобо́ю, Тави́фо, просвеща́ется,/ из ме́ртвых твоему́ воскресе́нию ра́дующися,/ и мы, па́мять твою́ ны́не пра́зднующе,/ сла́вим Победи́теля сме́рти – Христа́ Бо́га,// о́бщаго свята́го Воскресе́ния ча́юще.

Перевод: Первохристианская Церковь радуется, Иоппия тобой, Тавифа, просвещается, твоему воскресению из мертвых радуясь, и мы, память твою сегодня празднующие, славим Победителя смерти - Христа Бога, ожидая всеобщего святого Воскресения.

О, пресла́вная учени́це Христо́ва, све́тлая звездо́ Иоппи́йская, свята́я пра́ведная Тави́фо! К тебе́, ны́не на Небесе́х су́щей, с ве́рою притека́ем в моли́тве, ты же, я́ко ми́лостивая в жи́зни свое́й бы́вша, не лиши́ и нас, смире́нных, милосе́рдия твоего́. Принеси́ усе́рдныя моле́ния твоя́ Спаси́телю всех, Христу́ Бо́гу, да да́рует нам, хла́дным, любо́вь, малове́рным – те́плую ве́ру, леня́щимся – ре́вностное трудолю́бие, гордя́щимся – ти́хое смире́ние, иноки́ням – свято́е послуша́ние, нача́льствующим – ра́зум и милосе́рдие, боля́щим – здра́вие и облегче́ние, бе́дным – по́мощь и заступле́ние, уныва́ющим – Бо́жие упова́ние, оби́телям – мир и спасе́ние, лю́дем – во благо́м поспеше́ние, всем в ско́рбех – утеше́ние. Наипа́че моли́ Го́спода на́шего, апо́столом Петро́м тя воскреси́вшаго, да и мы сподо́бимся по о́бщем всех Воскресе́нии ста́ти в Це́ркви Его́ одесну́ю и с тобо́ю сла́вити Отца́, и Сы́на, и Свята́го Ду́ха во ве́ки веко́в. Ами́нь.

Апо́столом сотаи́ннице, ми́лостивая Тави́фо,/ оби́тели же́нския нача́ло положи́ла еси́/ и бе́дным одея́ние была́ еси́,/ послу́шнице смире́нная,/ сло́ву апо́стола Петра́ повину́вшися,/ из ме́ртвых си́лою Христо́вою возста́ла еси́/ и ны́не на Небесе́х све́тло пра́зднуеши./ Те́мже моли́ Христа́ Бо́га// всем, помина́ющим тя, дарова́ти живо́т ве́чный.

Перевод: Ты участвовала в Таинствах вместе с Апостолами, милостивая Тавифа, положила начало женской обители, была защитой для бедных, смиренная послушница, повиновавшаяся слову апостола Петра, ты воскресла из мертвых силой Христа и сейчас на Небесах радостно празднуешь. Потому моли Христа Бога даровать жизнь вечную всем, вспоминающим тебя.

О, Пресвята́я Госпоже́, Пречи́стая Влады́чице Богоро́дице. При́зри Всеми́лостивым Твои́м о́ком на на́с, предстоя́щих пред пречи́стым Твои́м о́бразом, Ки́ево-Бра́тским нарица́ющимся, и моля́щихся Ти́ пред ни́м.
Да возсия́ет неизрече́нный све́т Возлю́бленнаго Сы́на Твоего́, Го́спода на́шего Иису́са Христа́ в сердца́х на́ших. Да бу́дет во́ля Его́ чрез все́ житие́ на́ше. Да да́рует на́м проще́ние и очище́ние все́х грехо́в и прегреше́ний на́ших.
Не и́мамы ины́я по́мощи, ни ины́я наде́жды, то́кмо Тебе́, Пречи́стая.
Я́коже в дре́вния времена́ гра́д Вы́шгород и зе́млю Ки́евскую просла́вила еси́ зна́мениями и чудесы́ от ико́ны Твоея́ чу́дныя, егда́ инове́рнаго ага́рянина чу́дным о́бразом от во́днаго потопле́ния в реце́ Днепре́ спасла́ еси́, и до оби́тели Ки́ево-Бра́тския неврежде́нна доста́вила еси́, и та́мо и́стинное покая́ние его́ прия́ла еси́, и све́том свята́го креще́ния просвети́в, во А́нгельский чи́н в се́й оби́тели облекла́ еси́, и те́м ко спасе́нию и и́стинныя ве́ры правосла́вныя утвержде́нию путеводи́ла еси́.
Сего́ ра́ди и мы́, гре́шнии и недосто́йнии, дерза́юще про́сим и мо́лим: не отри́ни на́с, моля́щихся Ти́, пред се́ю ди́вною и чудотво́рною ико́ною Твое́ю. Укрепи́ ве́ру в на́с пра́вую, да́руй любо́вь дру́г ко дру́гу нелицеме́рную. Бу́ди Взбра́нной Воеводой на вся́ ви́димая и неви́димая враги́ на́ша: неве́рных к правове́рию обрати́, ве́рных же на пу́ть покая́ния и спасе́ния наста́ви.
Помози́, Госпоже́ Влады́чице, воздви́гнути хра́м и оби́тель ди́вному и сла́вному, достопоклоняемому А́нгелы и челове́ки, и́мене Твоему́, в че́сть и па́мять чудотво́рнаго о́браза Твоего́ Ки́ево-Бра́тскаго.
Да и в хра́ме се́м и оби́тели се́й, па́че же в душа́х и сердца́х на́ших, просла́вим Тя́, Хода́таицу и Моли́твенницу за ро́д на́ш, и Тобо́ю сла́ву возсле́м Отцу́, и Сы́ну, и Свято́му Ду́ху, ны́не, и при́сно, и во ве́ки веко́в. Ами́нь.