20 декабря

Пра́вило ве́ры, и о́браз кротости,/ воздержа́ния учителя/ яви́ тя ста́ду твоему,/ я́же веще́й и́стина;/ сего́ ра́ди стяжа́л еси́ смире́нием высо́кая,/ нищетою бога́тая, отче священнонача́льниче Амвро́сие,// моли́ Христа́ Бо́га спасти́ся душа́м на́шим.

Перевод: Правилом веры и образом кротости, воздержания учителем явила тебя стаду твоему непреложная Истина. Потому ты приобрел смирением – высокое, нищетою – богатство. Отче, священноначальник Амвросий, моли Христа Бога о спасении душ наших.

Боже́ственными догма́ты облиста́я,/ помрачи́л еси́ Ариеву пре́лесть,/ священнотаи́нниче и па́стырю Амвро́сие,/ чудоде́йствуя же си́лою Ду́ха,/ стра́сти разли́чныя я́ве исцели́л еси́, о́тче преподо́бне,// Христа́ Бо́га моли́ спасти́ся душа́м на́шим.

Перевод: Божественными учениями сияя, угасил ты Ариево заблуждение, священнотаинник и пастырь Амвросий, совершая же чудеса силой Духа, различные болезни истинно исцелил ты, отче преподобный, Христа Бога моли о спасении душ наших.

Изря́дно сло́во жи́зни стяжа́в, о́тче му́дре,/ не усумне́ся высоты́ ца́рския, богонаказа́тельне царя́ обличи́ и умудри́в./ Тем па́че че́стне почте́ся и люде́й свои́х па́ству к Бо́гу наста́ви./ Сего́ ра́ди зове́м ти:// ра́дуйся, Амвро́сие преди́вне.

Перевод: Превосходный дар слова жизни стяжав, отче мудрый, не усомнившись высотой царской, наставляя Божественным истинам, царя ты обличил и научил. Потому ты достойно почитаешься, паству людей своих направляя к Богу. Поэтому взываем к тебе: «Радуйся, Амвросий преудивительный».

О, пресла́вный чудотво́рче, в ско́рбех ско́рый помо́щниче и усе́рдный о ми́ре к Бо́гу моли́твенниче, о́тче святы́й Амвро́сие! Ве́мы, я́ко ве́лие ко Спа́су и́маши дерзнове́ние, предстоя́ го́рнему Престо́лу Его́, и сего́ ра́ди смире́нно припа́даем ти́: моли́ся Ему́, уго́дниче Бо́жий, да пода́ст наро́ду Росси́йскому благоде́нственное и ми́рное житие́, да изба́вит от вра́г ви́димых и неви́димых, от наше́ствия иноплеме́нных, от неду́га и гла́да, от вся́кия ско́рби и смертоно́сныя я́звы и от вся́каго зла́; на́м же все́м, ве́рою пра́зднующим святу́ю па́мять твою́ и усе́рдно хода́тайства твоего́ ча́ющим, да ниспо́слет вся́ благопотре́бная ко вре́менному и ве́чному житию́ на́шему, па́че же оставле́ние грехо́в, ми́р по́мыслов, тишину́ серде́чную, здра́вие душа́м и телесе́м на́шим. Е́й, святи́телю Бо́жий, па́стырю Христо́в ми́лостивейший, покрови́телю на́ш гото́вейший! услы́ши на́с, еще́ еди́наго от тебе́ прося́щих: бу́ди те́плый моли́твенник и предста́тель ко Го́споду о духо́вных па́стырех и отце́х на́ших (имена́), и́же не́мощи на́ша но́сят и о на́с боле́знуют, до́ндеже вообрази́тся в на́с Христо́с, да сохрани́т О́н, всеблаги́й и вся́ могу́щий Влады́ка, дража́йшия дни́ жития́ и́х в неруши́мом ми́ре и кре́пости си́л духо́вных и теле́сных, да приведе́т на́с, недосто́йных рабо́в Свои́х, и́х окормле́нием и моли́твами, твои́м же хода́тайством и заступле́нием ко приста́нищу жи́зни несконча́емыя, иде́же херуви́ми и серафи́ми, святи́и вси́ с Богоро́дицею и с тобо́ю, покрови́телем на́шим, непреста́нными гла́сы сла́вят Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.

Я́ко светильник всесве́тел/ яви́лся еси́ во о́строве Селиге́ра е́зера,/ преподо́бне о́тче Ни́ле:/ ты бо Крест Христо́в от ю́ности своея́ на ра́мо взем,/ усе́рдно Тому́ после́довал еси́,/ чистото́ю Бо́гови прибли́жився,/ отону́дуже и чуде́с дарова́нием обогати́лся еси́./ Тем и мы, притека́юще к ра́це моще́й твои́х, уми́льно глаго́лем:/ о́тче преподо́бне,// моли́ Христа́ Бо́га спасти́ся душа́м на́шим.

Перевод: Как преяркий светильник явился ты на острове озера Селигер, преподобный отче Нил, ибо ты с юности, подняв на плечи Крест Христов, с усердием Ему последовал и чистотой приблизился к Богу, потому и обогатился дарованием чудес. Вот и мы, приходя к раке с мощами твоими, в сердечном сокрушении взываем: «Отче преподобный, моли Христа Бога о спасении наших душ».

Оте́чества, преподо́бне, удали́вся,/ в пусты́ню всели́лся еси́,/ и на о́стров Селиге́ра е́зера возше́д,/ жесто́ко житие́ показа́л еси́,/ и мно́гих доброде́тельми удиви́в,/ дарова́ния чуде́с от Христа́ прия́л еси́./ Помина́й нас, чту́щих па́мять твою́, да зове́м ти:// ра́дуйся, Ни́ле, о́тче наш.

Перевод: Покинув свою родину, преподобный, ты поселился в пустыни и, взойдя на остров озера Селигер, явил суровую жизнь и, удивив многих добродетелями, принял от Христа дарования чудес. Вспоминай нас, почитающих память твою, да взываем к тебе: «Радуйся, Нил, отче наш».

О вели́кий уго́дниче, пресла́вный чудотво́рче, собра́нного зде о тебе́ ста́да Христо́ва до́брый па́стырю и оби́тели сея́ Бо́гом да́нный нача́льниче, Ни́ле всеблаже́нне! Душе́ю на Небеси́ Престо́лу Бо́жию предстоя́й и Тро́ичныя сла́вы наслажда́яйся, те́лом же на земли́ в Боже́ственном хра́ме сем почива́яй и от него́ да́нною ти свы́ше благода́тию разли́чная источа́яй чудеса́, при́зри ми́лостивым о́ком на предстоя́щия честне́й твое́й ра́це лю́ди и прося́щия си́льныя твоея́ по́мощи. Се бо мы в безме́рных согреше́ниях оскверни́вшиися и в ти́не страсте́й при́сно валя́ющиися, пра́ведный гнев Бо́жий на себе́ наведо́хом и вся́кия ми́лости недосто́йны сотвори́хомся; те́мже и не сме́юще возвести́ оче́с на́ших к высоте́ Небе́сней, ниже́ вознести́ моле́бный глас, се́рдцем сокруше́нным и ду́хом смире́нным тебе́ в хода́тайство и посо́бие призыва́ем. Ты у́бо, я́ко стяжа́вый дерзнове́ние, воздви́гни горе́ преподо́бныя твоя́ ру́це, я́коже иногда́ чу́дный о́ный Моисе́й Богови́дец Амали́ка побежда́яй, и просте́р к Го́споду Творцу́ всех и Бо́гу те́плую свою́ моли́тву, испроси́ Це́ркви благостоя́ние, возду́ха благорастворе́ние, земли́ плодоно́сие. Изба́ви же всех, ве́рою несумне́нною к Бо́гу приходя́щих и многоцеле́бныя мо́щи твоя́ благогове́йно почита́ющих, от вся́ких бед душе́вных и теле́сных, от всех томле́ний и прило́гов диа́вольских. Бу́ди печа́льным уте́шитель, неду́гующим врач, напа́ствуемым помо́щник, наги́м покрови́тель, вдови́цам засту́пник, си́рым защи́тник, младе́нцем пита́тель, ста́рым укрепи́тель, стра́нствующим путево́ждь, пла́вающим ко́рмчий и исхода́тайствуй всем, кре́пкия по́мощи твоея́ усе́рдне тре́бующим, вся я́же ко спасе́нию поле́зная. Я́ко да твои́ми моли́твами наставля́еми, путь на земли́ маловре́меннаго жития́ на́шего безбе́дне соверши́м, улучи́м же на Небеси́ несконча́емый поко́й и просла́вим ку́пно с тобо́ю всех благи́х Да́теля, еди́наго в Тро́ице сла́вимаго Бо́га Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.

Ублажа́ем тя,/ преподо́бне о́тче Ни́ле,/ и чтим святу́ю па́мять твою́,/ наста́вниче мона́хов// и собесе́дниче а́нгелов.

Жела́нием духо́вным распали́вся/ и мяте́жи мирски́я отри́нув,/ ко Еди́ному Бо́гу любо́вию прилепи́лся еси́,/ и Того́ вседу́шне взыску́я,/ во вну́треннюю пусты́ню отше́л еси́, при вода́х всели́вся,/ иде́же во слеза́х и труде́х пребыва́я многоле́тное вре́мя,/ в терпе́нии мно́зем житие́ а́нгельское проходи́л еси́,/ в наставле́нии Боже́ственнаго Ра́зума,/ и мно́жество мона́хов собрал еси́, му́дре,/ и́хже посеща́я, не оста́ви, Анто́ние, преподо́бне о́тче наш,/ Пресвяте́й Тро́ице моля́ся,// от зол вся́ческих изба́вити и спасти́ ду́ши на́ша.

Перевод: Стремлением духовным воспламенившись и суету мирскую отринув, к Единственному Богу с любовью привязался ты и Его всей душой взыскуя, во внутреннюю пустынь ушел ты, поселившись у воды, где в слезах и трудах пребывая долгие годы, со многим терпением ангельскую жизнь проводил ты, наставляемый Божественным Разумом, и множество монахов собрал ты, мудрый, их же посещать не переставай, Антоний, преподобный отче наш, Пресвятой Троице молясь от всякого зла избавить и спасти души наши.

И́же вои́стинну на земли́ тя а́нгела/ и на Небеси́ челове́ка Бо́жия почти́м,/ сию́ жизнь су́етную оста́вль,/ я́ко вои́стинну преудо́брен во́ин Христа́ Бо́га,/ на стра́сти душепа́губныя подвиза́вся в жи́зни сей су́етней/ бде́нием и поще́нием,/ во всем быв о́браз свои́м ученико́м./ Те́мже бо в тя всели́ся Пресвяты́й Дух,/ Его́же де́йствием све́тло укра́шен,/ но я́ко име́я дерзнове́ние ко Святе́й Тро́ице,/ помина́й святу́ю оби́тель сию́/ и ста́до свое́, е́же собра́, му́дре,/ и не забу́ди, я́коже обеща́ся,/ посеща́й чад свои́х,// Анто́ние преподо́бне, о́тче наш.

Перевод: Воистину ангела на земле и на Небесах человека Божия, оставившего эту суетную жизнь, почтим, как воистину одаренного совершенством воина Христа Бога, против губительных для души страстей боровшегося в жизни этой суетной, бдением и пощением, он во всем был примером своим ученикам, потому поселился в нем Пресвятой Дух. Его же действием светло украшен, имеющий дерзновение к Святой Троице, вспоминай святую обитель эту и стадо свое, которое собрал ты, мудрый, и не забудь, как обещал, посещать чад своих, Антоний преподобный, отче наш.

От ю́ности, преподо́бне, плоть твою́ в посте́х и моли́твах истощи́л еси́/ и крест твой взем, Христу́ после́довал еси́,/ те́мже и к вы́шним тече́ние ра́достно соверши́л еси́,/ иде́же со все́ми святы́ми Святе́й Тро́ице предстои́ши./ И ны́не ста́до твое́ посеща́я,/ помина́й чту́щих пресвяту́ю па́мять твою́,/ да вси благода́рне вопие́м ти:// ра́дуйся, Богому́дре Анто́ние, наста́вниче пусты́нный.

Перевод: С юности, преподобный, тело твое в постах и молитвах укротил ты и, крест свой взяв, Христу последовал, потому и к Небесам совершил радостный путь, где со всеми святыми Святой Троице предстоишь. И сейчас стадо твое посещая, вспоминай почитающих пресвятую память твою, да все благодарно взываем к тебе: «Радуйся, Богомудрый Антоний, наставник пустынник».

Христа́ еди́наго вожделе́в,/ и к Тому́ любо́вию уязви́вся,/ и Тому́ неотло́жным путе́м после́довал еси́./ Вся́кое жите́йское наслажде́ние возненави́дев,/ те́мже, я́ко второ́е со́лнце, чудесы́ сия́я,/ и сего́ ра́ди тя да́ром обогати́ Влады́ка,/ помина́й нас, чту́щих пресве́тлую па́мять твою́, да зове́м ти:// ра́дуйся, Анто́ние преподо́бне о́тче наш.

Перевод: Христа единственного возжелав и к Нему любовью пленившись, за Ним неизменным путем последовал ты, всякое житейское наслаждение возненавидев, потому, как второе солнце, сиял чудесами, даром которых обогатил тебя Владыка, вспоминай же нас, почитающих пресветлую память твою, да взываем к тебе: «Радуйся, Антоний преподобный отче наш».

О, всеблаже́нне о́тче наш, преподо́бне Анто́ние, те́плый засту́пниче и помо́щниче с ве́рою призыва́ющим тя, изба́ви нас моли́твами си ко Го́споду от вся́каго обстоя́ния бесо́вскаго и изми́ нас, окая́нных и недосто́йных рабо́в твои́х, о чудотво́рче Анто́ние, от уст па́губнаго зми́я, зия́ющаго пожре́ти нас и свести́ во ад жи́вых, прости́ нас, о́тче, ели́ко согреши́хом ти, и исто́ргни нас от греха́ и вся́кия напа́сти, приходя́щия грехо́в ра́ди на́ших. Пода́ждь душа́м на́шим утеше́ния, всади́ в сердца́ на́ша страх Суда́ Бо́жия и изба́ви нас от враго́в на́ших, ви́димых и неви́димых, тебе́ бо и́мамы те́пла моли́твенника и засту́пника, и́же в беда́х су́щии и в грехи́ впа́дшия. Ты бо яви́ся столп благоче́стия, воздержа́ния пра́вило, смиренному́дрия о́браз, целому́дрия наста́вник, убо́гим и сирота́м засту́пник и храни́тель прибега́ющим к тебе́. Кто у́бо по досто́инству мо́жет похвали́ти равноа́нгельное твое́ житие́ и кто мо́жет изчести́ твои́х трудо́в по́двизи и сле́зы ко Го́споду, вои́стинну я́ко со́лнца светле́йши возсия́ша твоя́ исправле́ния. Ревни́тель бо бысть всех святы́х преподо́бных и пра́ведных и учи́тель духо́вный, побо́рник, и засту́пник, и моли́твенник, Пресвяте́й Тро́ице предстоя́. Ты я́ко мир оста́вил еси́ и я́же в ми́ре, и нас в покая́ние приведи́ ко Го́споду моли́твами си, о́тче всечестне́йший, да и мы сподо́бимся ве́чных благи́х, иде́же наслажда́ешися Небе́сныя сла́вы жела́емаго Иису́са Христа́, И́стиннаго Бо́га на́шего и Сладча́йшаго Влады́ки и Го́спода всех. Ему́же подоба́ет вся́кая сла́ва, честь и поклоне́ние со Безнача́льным Его́ Отце́м и Пресвяты́м, и Благи́м, и Животворя́щим Его́ Ду́хом, ны́не, и при́сно, и во ве́ки веко́в. Ами́нь.

О, преди́вный чудотво́рче и вели́кий уго́дниче Бо́жий, преподо́бне о́тче Анто́ние, па́стырю наш до́брый, те́плый засту́пниче и ско́рый помо́щниче, предстоя́й Престо́лу Святы́я Тро́ицы, при́зри ми́лостивым о́ком на ны и на вся лю́ди, благогове́йне притека́ющия к честно́му гро́бу твоему́, в не́мже лежа́щия святы́я мо́щи твоя́, от дней дре́вних цвету́ще нетле́нием и благоуха́юще благода́тию животворя́щаго Пресвята́го Ду́ха, неоску́дно источа́ют исцеле́ния от вся́ких неду́гов душе́вных и теле́сных, услы́ши нас, моля́щихся и чту́щих святу́ю па́мять твою́. Моли́ ми́лостиваго Бо́га, отврати́ти от нас вся́кий гнев Его́, пра́ведно на ны дви́жимый, и сохрани́ти не то́чию оби́тель на́шу, но и вся гра́ды и ве́си, и вся стра́ны христиа́нския и лю́ди, живу́щия в них, от гра́да и гла́да, от тру́са и пото́па, от огня́ и меча́, от наше́ствия иноплеме́нных и междоусо́бныя бра́ни, от смертоно́сныя я́звы и вся́кия па́губы и вся́каго зла, дарова́ти же нам вся к жи́зни вре́менней благопотре́бная и к ве́чному спасе́нию поле́зная. Помози́ нам, свя́тче Бо́жий, избежа́ти па́губных сете́й диа́вольских, препобеди́ти собла́зны ми́ра и умертви́ти у́ды на́ша, су́щия на земли́; отврати́ о́чи на́ша от су́етных и преле́стных веще́й земны́х, напра́ви же умы́ и мы́сли на́ша к зре́нию красо́т боже́ственных, пренебе́сных и нетле́нных, сердца́ на́ша неду́гующая страстьми́ грехо́вными, исцели́, да не прильпну́т сласте́м привре́менным и безме́стным; согре́й же я боже́ственною любо́вию, да вожделе́ют и́стиннаго и непреходя́щаго блаже́нства, е́же в Бо́зе. Укрепи́ нас к исполне́нию за́поведей Госпо́дних, даждь нам покая́ние серде́чное и умиле́ние сле́зное, моли́тву непреста́нную и трудолю́бие неосла́бное, бо́дренное трезве́ние ума́ и хране́ние се́рдца, мир помысло́в, чистоту́ жела́ний, правоту́ дея́ний, да, изба́вльшеся тобо́ю от всех враг ви́димых и неви́димых, от вся́ких зол душе́вных и теле́сных, и соблю́дше ве́ру пра́вую, наде́жду неотло́жную и любо́вь нелицеме́рную, богоуго́дне сконча́ем житие́ на́ше на земли́, и преше́дше в жизнь ве́чную, сподо́бимся зре́ти трисве́тлую зарю́ трисия́ющаго ве́чнаго Со́лнца, и в невече́рнем дни Небе́снаго Ца́рствия, ку́пно с тобо́ю и со все́ми святы́ми, благода́рне воспева́ти и благословля́ти Пресвяту́ю Тро́ицу, Отца́ и Сы́на и Свята́го Ду́ха, во ве́ки веко́в. Ами́нь.

О, богоблаже́нне и приснопа́мятне о́тче наш Анто́ние, не мним тя ме́ртва су́ща, а́ще те́лом и преста́вился еси́ от нас, но жив в собо́ре А́нгелов водворя́ешися. Моли́ за ны, избра́нниче Христо́в, и не пре́зри нас, ве́рою и любо́вию чту́щих тя, помина́й нас недосто́йных у Престо́ла Царя́ Небе́снаго, тебе́ бо даде́ся благода́ть моли́тися за ны. О, засту́пниче и моли́твенниче наш до́брый! Се бо святы́х моще́й твои́х ра́ка, пред очи́ма на́шима ви́дима есть, сохраня́й нас всегда́ от сете́й вра́жиих; моли́ся ко Го́споду о спасе́нии душ на́ших, и испроси́ нам покая́ния вре́мя и христиа́нскую кончи́ну безболе́зненну, непосты́дну, ми́рну, да невозбра́нно пре́йдем мыта́рства возду́шных князе́й и сподо́бимся Небе́снаго Ца́рствия со все́ми угоди́вшими Влады́це Не́ба и земли́, Го́споду на́шему Иису́су Христу́, Ему́же подоба́ет вся́кая сла́ва, честь и поклоне́ние всегда́, ны́не и при́сно и во ве́ки веко́в. Ами́нь.

Спаси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя// и Твое́ сохраня́я Кресто́м Твои́м жи́тельство.

Перевод: Спаси, Господи, людей Твоих и благослови все, что принадлежит Тебе. Даруй победы над врагами, и сохрани силою Креста Твоего тех, среди которых пребываешь Ты.

Вознесы́йся на Крест во́лею,/ тезоимени́тому Твоему́ но́вому жи́тельству,/ щедро́ты Твоя́ да́руй, Христе́ Бо́же,/ возвесели́ нас си́лою Твое́ю,/ побе́ды дая́ нам на сопоста́ты,/ посо́бие иму́щим Твое́ ору́жие ми́ра,// непобеди́мую побе́ду.

Перевод: Вознесенный на Крест добровольно, соименному Тебе новому народу милости Твои даруй, Христе Боже; возвесели силою Твоею верных людей Твоих, подавая им победы над врагами, – да имеют они помощь от Тебя, оружие мира, непобедимый знак победы.