Приходской Часослов со священником

Иерей, стоя на амвоне перед царскими вратами, возглашает:

Сла́ва Святе́й, и Единосу́щней, и Животворя́щей, и Неразде́льней Тро́ице, всегда́, ны́не и при́сно, и во ве́ки веко́в.

Чтец: Ами́нь. Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас (3 раза)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй (3 раза) Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Иерей: Я́ко Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Хор: Ами́нь.

Диакон: Ми́ром Го́споду помо́лимся.

Хор: Го́споди, поми́луй.

О свы́шнем ми́ре и спасе́нии душ на́ших, Го́споду помо́лимся.

Хор: Го́споди, поми́луй.

О ми́ре всего́ мiра, благостоя́нии святы́х Бо́жиих церкве́й и соедине́нии всех, Го́споду помо́лимся.

Хор: Го́споди, поми́луй.

О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.

Хор: Го́споди, поми́луй.

О Вели́ком Господи́не и отце́ на́шем, Святе́йшем Патриа́рхе (имярек), и о господи́не на́шем преосвяще́ннейшем митрополи́те (или архиепи́скопе, или епи́скопе) (имярек), честне́м пресви́терстве, во Христе́ диа́констве, о всем при́чте и лю́дех, Го́споду помо́лимся.

Хор: Го́споди, поми́луй.

О Богохрани́мей стране́ на́шей, власте́х и во́инстве ея́, Го́споду помо́лимся.

Хор: Го́споди, поми́луй.

О гра́де сем (или о ве́си сей), вся́ком гра́де, стране́, и ве́рою живу́щих в них, Го́споду помо́лимся.

Хор: Го́споди, поми́луй.

О бла́горастворе́нии возду́хов, о изоби́лии плодо́в земны́х, и вре́менех ми́рных, Го́споду помо́лимся.

Хор: Го́споди, поми́луй.

О путеше́ствующих, неду́гующих, стра́ждущих, в темни́цех заключе́нных и о спасе́нии их, Го́споду помо́лимся.

Хор: Го́споди, поми́луй.

О изба́витися нам от вся́кия ско́рби, гне́ва и ну́жды, Го́споду помо́лимся.

Хор: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Хор: Го́споди, поми́луй.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Хор: Тебе́, Го́споди.

Иерей читает вслух 1‑ю утреннюю молитву: Благодари́м Тя, Го́споди Бо́же наш, возста́вившаго нас от ло́жей на́ших, и вложи́вшаго во уста́ на́ша сло́во хвале́ния, е́же покланя́тися, и призыва́ти и́мя Твое́ свято́е, и мо́лимся Твои́м щедро́там, и́хже всегда́ употребля́л еси́ о на́шей жи́зни. И ны́не посли́ по́мощь Твою́ на предстоя́щия пред лице́м святы́я сла́вы Твоея́, и ожида́ющия от Тебе́ бога́тыя ми́лости, и да́ждь им, со стра́хом и любо́вию всегда́ Тебе́ служа́щим, хвали́ти неисповеди́мую Твою́ бла́гость. Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Хор: Ами́нь.

Иерей: Сла́ва в вы́шних Бо́гу, и на земли́ мир, в челове́цех благоволе́ние. Единожды.

Хор: Сла́ва в вы́шних Бо́гу, и на земли́ мир, в челове́цех благоволе́ние. Дважды.

Хор: Го́споди, устне́ мои отве́рзеши, и уста́ моя возвестя́т хвалу́ Твою́. Дважды.

Псалом 3

Чтец: Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя.

Хор: Аз усну́х, и спах, воста́х,/ я́ко Госпо́дь засту́пит мя^[1].

^[1] Припевы в трипсалмии поются на глас первого тропаря, который будет петься в псалме 142 (вместо «Бог Господь»).

Чтец: Воскресни́, Го́споди, спаси́ мя, Бо́же мой.

Хор: Аз усну́х, и спах, воста́х,/ я́ко Госпо́дь засту́пит мя.

Чтец: Госпо́дне есть спасе́ние, и на лю́дех Твои́х благослове́ние Твое́.

Хор: Аз усну́х, и спах, воста́х,/ я́ко Госпо́дь засту́пит мя.

Псалом 62

Чтец: Бо́же, Бо́же мой, к Тебе́ у́тренюю, Возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й,

Хор: На у́тренних поуча́хся в Тя.

Чтец: Я́ко был еси́ Помо́щник мой, и в кро́ве крилу́ Твое́ю возра́дуюся.

Хор: На у́тренних поуча́хся в Тя.

Чтец: Прильпе́ душа́ моя́ по Тебе́, мене́ же прия́т десни́ца Твоя́.

Хор: На у́тренних поуча́хся в Тя.

Псалом 142

Чтец: Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́.

Хор: Слы́шану сотвори́ мне зау́тра ми́лость Твою́, я́ко на Тя упова́х.

Чтец: Изми́ мя от враг мои́х, Го́споди, к Тебе́ прибего́х.

Хор: Слы́шану сотвори́ мне зау́тра ми́лость Твою́, я́ко на Тя упова́х.

Чтец: Научи́ мя твори́ти во́лю Твою́, я́ко Ты еси́ Бог мой.

Хор: Дух Твой Благи́й наста́вит мя на зе́млю пра́ву.

Чтец: И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́^[2].

^[2] В заупокойную субботу, «егда поется Аллилуиа», к 142 псалму перед пением тропаря добавляются эти стихи с припевом “Аллилуиа”:

Хор: Аллилу́иа, аллилу́иа, аллилу́иа.

Чтец: Блаже́ни, я́же избра́л и прия́л еси́ Го́споди.

Хор: Аллилу́иа, аллилу́иа, аллилу́иа.

Чтец: И па́мять их в род и род.

Хор: Аллилу́иа, аллилу́иа, аллилу́иа.

Чтец: Ду́ши их во благи́х водворя́тся.

Хор: Тропарь.

Хор: Сла́ва, и ны́не: Богородичен

Хор: Тропарь^[3].

^[3] Отсюда начинается порядок пения тропарей на «Бог Господь», в соответствии с указаниями Типикона на данный день.

Чтец: И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Хор: Тропарь.

Хор: Сла́ва, и ны́не: Богородичен или тропарь праздника.

Диакон: Па́ки и па́ки, ми́ром Го́споду помо́лимся.

Хор: Го́споди, поми́луй.

Иерей читает вслух 2‑ю утреннюю молитву: От но́щи у́тренюет дух наш к Тебе́, Бо́же наш, зане́ свет повеле́ния Твоя́ на земли́. Пра́вду и святы́ню соверша́ти во стра́се Твое́м вразуми́ ны: Тебе́ бо сла́вим, вои́стинну су́щаго Бо́га на́шего. Приклони́ у́хо Твое́ и услы́ши ны, и помяни́, Го́споди, су́щия и моля́щияся с на́ми вся по и́мени, и спаси́ я́ си́лою Твое́ю, благослови́ лю́ди Твоя́ и освяти́ достоя́ние Твое́. Мир мiрови Твоему́ да́руй, це́рквам Твои́м, свяще́нником и всем лю́дем Твои́м. Я́ко Твоя́ держа́ва и Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Хор: Ами́нь.

Трипсалмие

Псалтирь

Псаломъ 118
1 Блажени непорочнии в путь, ходящии в законе Господни.
2 Блажени испытающии свидения Его, всем сердцем взыщут Его.
3 Не делающии бо беззакония в путех Его ходиша.
4 Ты заповедал еси заповеди Твоя сохранити зело:
5 дабы исправилися путие мои, сохранити оправдания Твоя.
6 Тогда не постыжуся, внегда призрети ми на вся заповеди Твоя.
7 Исповемся Тебе в правости сердца, внегда научитимися судьбам правды Твоея.
8 Оправдания Твоя сохраню: не остави мене до зела.
9 В чесом исправит юнейший путь свой? Внегда сохранити словеса Твоя.
10 Всем сердцем моим взысках Тебе: не отрини мене от заповедий Твоих.
11 В сердцы моем скрых словеса Твоя, яко да не согрешу Тебе.
12 Благословен еси, Господи: научи мя оправданием Твоим.
13 Устнама моима возвестих вся судьбы уст Твоих.
14 На пути свидений Твоих насладихся, яко о всяком богатстве.
15 В заповедех Твоих поглумлюся, и уразумею пути Твоя.
16 Во оправданиих Твоих поучуся: не забуду словес Твоих.
17 Воздаждь рабу Твоему: живи мя, и сохраню словеса Твоя.
18 Открый очи мои, и уразумею чудеса от закона Твоего.
19 Пришлец аз есмь на земли: не скрый от мене заповеди Твоя.
20 Возлюби душа моя возжелати судьбы Твоя на всякое время.
21 Запретил еси гордым: прокляти уклоняющиися от заповедий Твоих.
22 Отыми от мене понос и уничижение, яко свидений Твоих взысках.
23 Ибо седоша князи и на мя клеветаху, раб же Твой глумляшеся во оправданиих Твоих:
24 ибо свидения Твоя поучение мое есть, и совети мои оправдания Твоя.
25 Прильпе земли душа моя: живи мя по словеси Твоему.
26 Пути моя возвестих, и услышал мя еси: научи мя оправданием Твоим.
27 Путь оправданий Твоих вразуми ми, и поглумлюся в чудесех Твоих.
28 Воздрема душа моя от уныния: утверди мя в словесех Твоих.
29 Путь неправды отстави от мене и законом Твоим помилуй мя.
30 Путь истины изволих и судьбы Твоя не забых.
31 Прилепихся свидением Твоим, Господи, не посрами мене.
32 Путь заповедий Твоих текох, егда разширил еси сердце мое.
33 Законоположи мне, Господи, путь оправданий Твоих, и взыщу и выну:
34 вразуми мя, и испытаю закон Твой и сохраню и всем сердцем моим.
35 Настави мя на стезю заповедий Твоих, яко тую восхотех.
36 Приклони сердце мое во свидения Твоя, а не в лихоимство.
37 Отврати очи мои еже не видети суеты: в пути Твоем живи мя.
38 Постави рабу Твоему слово Твое в страх Твой.
39 Отыми поношение мое, еже непщевах: яко судьбы Твоя благи.
40 Се, возжелах заповеди Твоя: в правде Твоей живи мя.
41 И да приидет на мя милость Твоя, Господи, спасение Твое по словеси Твоему:
42 и отвещаю поношающым ми слово, яко уповах на словеса Твоя.
43 И не отыми от уст моих словесе истинна до зела, яко на судьбы Твоя уповах:
44 и сохраню закон Твой выну, в век и в век века.
45 И хождах в широте, яко заповеди Твоя взысках:
46 и глаголах о свидениих Твоих пред цари и не стыдяхся:
47 и поучахся в заповедех Твоих, яже возлюбих зело:
48 и воздвигох руце мои к заповедем Твоим, яже возлюбих, и глумляхся во оправданиих Твоих.
49 Помяни словеса Твоя рабу Твоему, ихже упование дал ми еси.
50 То мя утеши во смирении моем, яко слово Твое живи мя.
51 Гордии законопреступоваху до зела: от закона же Твоего не уклонихся.
52 Помянух судьбы Твоя от века, Господи, и утешихся.
53 Печаль прият мя от грешник, оставляющих закон Твой.
54 Пета бяху мне оправдания Твоя на месте пришелствия моего.
55 Помянух в нощи имя Твое, Господи, и сохраних закон Твой.
56 Сей бысть мне, яко оправданий Твоих взысках.
57 Часть моя еси, Господи: рех сохранити закон Твой.
58 Помолихся лицу Твоему всем сердцем моим: помилуй мя по словеси Твоему.
59 Помыслих пути Твоя и возвратих нозе мои во свидения Твоя.
60 Уготовихся и не смутихся сохранити заповеди Твоя.
61 Ужя грешник обязашася мне, и закона Твоего не забых.
62 Полунощи востах исповедатися Тебе о судьбах правды Твоея.
63 Причастник аз есмь всем боящымся Тебе и хранящым заповеди Твоя.
64 Милости Твоея, Господи, исполнь земля: оправданием Твоим научи мя.
65 Благость сотворил еси с рабом Твоим, Господи, по словеси Твоему:
66 благости и наказанию и разуму научи мя, яко заповедем Твоим веровах.
67 Прежде даже не смиритимися, аз прегреших: сего ради слово Твое сохраних.
68 Благ еси Ты, Господи: и благостию Твоею научи мя оправданием Твоим.
69 Умножися на мя неправда гордых: аз же всем сердцем моим испытаю заповеди Твоя.
70 Усырися яко млеко сердце их: аз же закону Твоему поучихся.
71 Благо мне, яко смирил мя еси, яко да научуся оправданием Твоим.
72 Благ мне закон уст Твоих паче тысящ злата и сребра.

По окончании стихословия: Аллилу́иа, Аллилу́иа, Аллилу́иа, сла́ва Тебе́, Бо́же (3 раза)

Го́споди, поми́луй (3 раза)

Сла́ва, и ны́не: Седален.

Чтение дня: Пролог.

Молитва перед «Чтением»: «Молитвами святых отец наших Господи Иисусе Христе Боже наш помилуй нас».

• 28‑й день. К простецам – Пролог в поучениях на каждый день года, прот. Виктор Гурьев

50 псалом

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Библейские песни

В соответствии с указаниями Типикона и номерами библейских песен, после каждого их стиха поются либо припевы, либо тропари канона.

Песнь 6

На 12: Возопи́х в ско́рби мое́й ко Го́споду Бо́гу моему́, и услы́ша мя.

Припев: Я́ко про́рока Ио́ну, спаси́ мя, Го́споди.

Отве́ргл мя еси́ во глуби́ны се́рдца морска́го, и ре́ки обыдо́ша мя.

На 10: Вся высоты́ Твоя́ и во́лны Твоя́ на мне преидо́ша.

Еда́ приложу́ призре́ти ми ко хра́му свято́му Твое́му?

На 8: Возлия́ся вода́ до души́ моея́, бе́здна обы́де мя после́дняя.

Понре́ глава́ моя́ в разсе́ли гор, снидо́х в зе́млю, ея́же вереи́ ея́ закле́пи ве́чнии.

На 6: И да взы́дет из истле́ния живо́т мой к Тебе́, Го́споди Бо́же мой.

И да прии́дет к Тебе́ моли́тва моя́, ко хра́му свято́му Твоему́.

На 4: Храня́щии су́етная и ло́жная ми́лость свою́ оста́виша.

Ели́ка обеща́х — возда́м Тебе́, во спасе́ние мое́, Го́сподеви.

Сла́ва Отцу́, и Сы́ну, и Свято́му Ду́ху.

И ны́не, и при́сно, и во ве́ки веко́в. Ами́нь.

Песнь 8

На 12: Благослови́те, вся дела́ Госпо́дня, Го́спода.

Припев: Го́спода по́йте, дела, и превозноси́те Его́ во ве́ки.

Благослови́те, а́нгели Госпо́дни, небеса́ Госпо́дня, Го́спода.

На 10: Благослови́те, во́ды вся, я́же превыше небе́с, вся си́лы Госпо́дни, Го́спода.

Благослови́те, со́лнце и ме́сяц, зве́зды небе́сныя, Го́спода.

На 8: Благослови́те, вся пти́цы небе́сныя, зве́рие и вси ско́ти, Го́спода.

Благослови́те, сы́нове челове́честии, да благослови́т Израиль, Го́спода.

На 6: Благослови́те, свяще́нницы Госпо́дни, раби́ Госпо́дни, Го́спода.

Благослови́те, ду́си и ду́ши пра́ведных, преподо́бнии и смире́ннии се́рдцем, Го́спода.

На 4: Благослови́те, Ана́ния, Аза́рия, Мисаи́л, Го́спода.

Благослови́те, апо́столи, проро́цы и му́ченицы Госпо́дни, Го́спода.

Благослови́м Отца́, и Сы́на, и Свята́го Ду́ха, Го́спода.

И ны́не, и при́сно, и во ве́ки веко́в. Ами́нь.

Песнь 9

Пресвято́й Богоро́дицы

Вели́чит душа́ Моя Го́спода, и возра́довася дух Мой о Бо́зе Спа́се Мое́м.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние Ра́бы Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Низложи́ си́льныя со престо́л и вознесе́ смире́нныя, а́лчущия испо́лни благ и богатя́щияся отпусти́ тщи.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Восприя́т Изра́иля, о́трока Своего́, помяну́ти милости, я́коже глаго́ла ко отце́м на́шим, Авраа́му и се́мени его, да́же до ве́ка.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Св. Заха́рии

На 12: Благослове́н Госпо́дь Бог Изра́илев, я́ко посети́ и сотвори́ избавле́ние лю́дем Свои́м.

Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.

И воздви́же рог спасе́ния нам в дому́ Дави́дове, о́трока Своего́.

На 10: Я́коже глаго́ла усты́ святы́х, су́щих от ве́ка проро́к Его́: спа́сение от враг на́ших и из руки́ всех, ненави́дящих нас.

Сотвори́ти ми́лость со отцы́ на́шими и помяну́ти заве́т святы́й Свой.

На 8: Кля́тву, е́юже кля́тся ко Авраа́му, отцу́ на́шему, да́ти нам без стра́ха, из руки́ враг на́ших изба́вльшимся.

Служи́ти Ему́ преподо́бием и пра́вдою пред Ним вся дни живота́ на́шего.

На 6: И ты, отроча́, проро́к Вы́шняго нарече́шися, преды́деши бо пред лице́м Госпо́дним, угото́вати пути́ Его́.

Да́ти ра́зум спасе́ния лю́дем Его́ во оставле́ние грех их, милосе́рдия ра́ди ми́лости Бо́га на́шего.

На 4: В ни́хже посети́ нас Восто́к с высоты́, яви́тися во тьме и се́ни сме́ртней седя́щим.

Напра́вити но́ги на́ша на путь ми́рен.

Сла́ва Отцу́, и Сы́ну, и Свято́му Ду́ху.

И ны́не, и при́сно, и во ве́ки веко́в. Ами́нь.

Катавасия

По окончании исполнения библейских песней диакон глаголет:

Па́ки и па́ки, ми́ром Го́споду помо́лимся.

Хор: Го́споди, поми́луй.

Иерей читает вслух 11‑ю утреннюю молитву: Бо́же, Бо́же наш, у́мныя и слове́сныя соста́вивый Си́лы Твое́ю во́лею, Тя мо́лим и Тебе́ ми́ли де́емся: приими́ на́ше по си́ле славосло́вие, со все́ми созда́нии Твои́ми, и бога́тыми Твоея́ бла́гости возда́ждь дарова́ньми. Я́ко Тебе́ преклоня́ется вся́кое коле́но небе́сных, и земны́х, и преиспо́дних, и вся́кое дыха́ние и созда́ние пое́т непостижи́мую Твою́ сла́ву: еди́н бо еси́ Бог и́стинный и многоми́лостивый. Я́ко Тя хва́лят вся Си́лы Небе́сныя, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Хор: Ами́нь. Светилен или ексапостиларий.

Канонарх: Хвалите Господа с небес. Припев: Тебе подобает песнь, Боже^[5].

^[5] Припевы на хвалитных псалмах поются на глас первой стихиры на хвалитех, по напеву заключительного колена.
Припев припевается после каждого стиха (и смысловой фразы) или звучит фоном во время чтения их чтецом, до момента смены припева на следующий.

Псалом 148

Лик первый: Хвалите Господа с небес, хвалите Его в вышних. Тебе подобает песнь, Боже.

Лик второй: Хвалите Его, вси Ангели Его, хвалите Его, вся силы Его. Тебе подобает песнь, Боже.

Чтец: Хвали́те Его́, со́лнце и луна́, / хвали́те Его́, вся зве́зды и свет. / Хвали́те Его́ Небеса́ небе́с и вода́, я́же превы́ше небе́с. / Да восхва́лят и́мя Госпо́дне: я́ко Той рече́, и бы́ша, Той повеле́, и созда́шася. / Поста́ви я́ в век и в век ве́ка, повеле́ние положи́, и не ми́мо и́дет. / Хвали́те Го́спода от земли́, зми́еве и вся бе́здны: /

Хор: Дадите славу Богу.

Чтец: огнь, град, снег, го́лоть, дух бу́рен, творя́щая сло́во Его́, / го́ры и вси хо́лми, древа́ плодоно́сна и вси ке́дри, / зве́рие и вси ско́ти, га́ди и пти́цы перна́ты. / Ца́рие зе́мстии и вси лю́дие, кня́зи и вси судии́ зе́мстии, ю́ноши и де́вы, ста́рцы с ю́нотами да восхва́лят и́мя Госпо́дне. /

Хор: Тому подобает песнь.

Чтец: Я́ко вознесе́ся и́мя Того́ Еди́наго, / испове́дание Его́ на земли́ и на небеси́. / И вознесе́т рог люде́й Свои́х, песнь всем преподо́бным Его́, сыново́м Изра́илевым, лю́дем, приближа́ющымся Ему́. /

Псалом 149

Воспойте Господеви песнь нову, хваление Его в церкви преподобных. / Восхвалятся преподобнии во славе и возрадуются на ложах своих. / Возношения Божия в гортани их, и мечи обоюду остры в руках их. / Сотворити отмщение во языцех, обличения в людех, /

Хор: Пощади ны, Господи.

Чтец: связати цари их путы, и славныя их ручными оковы железными. / Сотворити в них суд написан; слава сия будет всем преподобным Его. ^[6] /

^[6]Вместо последних припевов поются, в соответствии с указаниями Типикона, стихиры на хвалитех.

Хор: Сыне Божий, помилуй нас.

Псалом 150

Чтец: Хвалите Бога во святых Его, хвалите Его во утвержении силы Его.

Хор: Тебе слава подобает, Господи.

На 4: Хвалите Его на силах Его, хвалите Его по множеству величествия Его.

Хвалите Его во гласе трубнем, хвалите Его во псалтири и гуслех.

Хвалите Его в тимпане и лице, хвалите Его во струнах и органе.

Хвалите Его в кимвалех доброгласных, хвалите Его в кимвалех восклицания. Всякое дыхание да хвалит Господа.

Слава, и ныне: Богородичен или стихира праздника.

Иерей: Слава Тебе, показавшему нам свет.

Хор: Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя вели́кия ра́ди сла́вы Твоея́. Го́споди, Царю́ Небе́сный, Боже, О́тче Вседержи́телю, Го́споди Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас. Взе́мляй грехи́ ми́ра, приими́ моли́тву на́шу. Седя́й одесну́ю Отца́, поми́луй нас. Я́ко Ты еси́ Еди́н Свят; Ты еси́ Еди́н Госпо́дь, Иису́с Христо́с, во сла́ву Бо́га Отца́, ами́нь.

На всяк день благословлю́ Тя и восхвалю́ и́мя Твое́ во ве́ки, и в век ве́ка. Сподо́би, Го́споди, в день сей без греха́ сохрани́тися нам. Благослове́н еси́, Го́споди Бо́же оте́ц на́ших, и хва́льно и просла́влено и́мя Твое́ во ве́ки, ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. 3 раза.

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́.

Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой, я́ко у тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. 3 раза.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропари по Уставу.

Диакон: Поми́луй нас, Бо́же, по вели́цей ми́лости Твое́й, мо́лим Ти ся, услы́ши, и поми́луй.

Хор: Го́споди, поми́луй, 3 раза.

Еще́ мо́лимся о Вели́ком Господи́не и отце́ на́шем, Святе́йшем Патриа́рхе (имярек), и о господи́не на́шем преосвяще́ннейшем митрополи́те (или архиепи́скопе, или епи́скопе) (имярек), и о всей во Христе́ бра́тии на́шей.

Хор: Го́споди, поми́луй, 3 раза.

Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

Хор: Го́споди, поми́луй, 3 раза.

Еще́ мо́лимся о блаже́нных и приснопа́мятных созда́телех свята́го хра́ма сего́ (аще во обители: святы́я оби́тели сея́), и о всех преждепочи́вших отце́х и бра́тиях, зде́ лежа́щих и повсю́ду правосла́вных.

Хор: Го́споди, поми́луй, 3 раза.

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих, бра́тии свята́го хра́ма сего́ (аще во обители: святы́я оби́тели сея́).

Хор: Го́споди, поми́луй, 3 раза.

Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.

Хор: Го́споди, поми́луй, 3 раза.

Иерей читает вслух 4‑ю утреннюю молитву: Влады́ко Бо́же, святы́й и непостижи́мый, реки́й из тьмы све́ту возсия́ти, упоко́ивый нас в нощне́м сне́ и возста́вивый к славосло́вию и мольбе́ Твоея́ бла́гости. Умоля́емь от Своего́ Ти́ благоутро́бия, приими́ нас и ны́не покланя́ющихся Тебе́ и по си́ле благодаря́щих Тя́, и да́руй нам вся, я́же ко спасе́нию, проше́ния. Покажи́ ны сы́ны све́та и дне и насле́дники ве́чных Твои́х благ. Помяни́, Го́споди, во мно́жестве щедро́т Твои́х и вся лю́ди Твоя́, су́щия и моля́щияся с на́ми, и всю бра́тию на́шу, я́же на земли́, на мо́ри, на вся́ком ме́сте влады́чествия Твоего́, тре́бующих Твоего́ человеколю́бия и по́мощи, и всем пода́й вели́кую Твою́ ми́лость. Да спасе́ни душе́ю же и те́лом всегда́ пребыва́юще, со дерзнове́нием сла́вим чу́дное и благослове́нное и́мя Твое́. Я́ко Бог ми́лости, щедро́т и человеколю́бия еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Хор: Ами́нь.

Диакон: Испо́лним у́треннюю моли́тву на́шу Го́сподеви.

Хор: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Хор: Го́споди, поми́луй.

Дне всего́ соверше́нна, свя́та, ми́рна и безгре́шна, у Го́спода про́сим.

Хор: Пода́й, Го́споди.

А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.

Хор: Пода́й, Го́споди.

Проще́ния и оставле́ния грехо́в и прегреше́ний на́ших, у Го́спода про́сим.

Хор: Пода́й, Го́споди.

До́брых и поле́зных душа́м нашим, и ми́ра мiрови, у Го́спода про́сим.

Хор: Пода́й, Го́споди.

Про́чее вре́мя живота́ на́шего в ми́ре и покая́нии сконча́ти, у Го́спода про́сим.

Хор: Пода́й, Го́споди.

Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на стра́шнем суди́щи Христо́ве про́сим.

Хор: Пода́й, Го́споди.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Хор: Тебе́, Го́споди.

Иерей читает вслух 12‑ю утреннюю молитву: Хва́лим, пое́м, благослови́м и благодари́м Тя, Бо́же оте́ц на́ших, я́ко преве́л еси́ се́нь нощну́ю, и показа́л еси́ нам па́ки свет дневны́й. Но мо́лим Твою́ бла́гость, очи́сти грехи́ на́ша и приими́ моле́ние на́ше вели́ким Твои́м благоутро́бием, я́ко к Тебе́ прибега́ем ми́лостивому и всеси́льному Бо́гу. Возсия́й в сердца́х на́ших и́стинное со́лнце пра́вды Твоея́, просвети́ ум наш, и чу́вства вся соблюди́, да я́ко во дни́ благообра́зно ходя́ще путе́м за́поведей Твои́х, дости́гнем в жизнь ве́чную, я́ко у Тебе́ есть исто́чник жи́зни, и в наслажде́нии бы́ти сподо́бимся непристу́пнаго Твоего́ све́та. Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Хор: Ами́нь.

Иерей: Мир всем.

Люди: И ду́хови твоему́.

Диакон: Главы́ на́ша Го́сподеви прикло́ним.

Хор: Тебе́, Го́споди.

Иерей читает вслух 13‑ю утреннюю молитву: Го́споди святы́й, в вы́шних живы́й, и на смире́нныя призира́яй, и всеви́дящим о́ком Твои́м призира́яй на всю тварь, Тебе́ приклони́хом вы́ю се́рдца и телесе́, и мо́лимся Тебе́: простри́ ру́ку Твою́ неви́димую от свята́го жили́ща Твоего́, и благослови́ вся ны. И а́ще что согреши́хом, во́лею или́ нево́лею, я́ко благ и человеколю́бец Бог прости́, да́руя нам мiрная и премiрная блага́я Твоя́. Твое́ бо есть е́же ми́ловати и спаса́ти ны́, Бо́же наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Хор: Ами́нь.

Диакон: Прему́дрость.

Хор: Благослови́.

Иерей: Сый благослове́н Христо́с, Бог наш, всегда́, ны́не и при́сно, и во ве́ки веко́в.

Хор: Ами́нь. Утверди́, Бо́же, святу́ю правосла́вную ве́ру, правосла́вных христиа́н во ве́к ве́ка.

Иерей: Пресвята́я Богоро́дице, спаси́ нас.

Хор: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Иерей: Сла́ва Тебе́, Христе́ Бо́же, упова́ние на́ше, сла́ва Тебе́.

Хор: Сла́ва, и ны́не: Го́споди, поми́луй (3 раза) Благослови́.

Иерей совершает отпуст.

Лик поет многолетие.

Иерей: Благослове́н Бог наш всегда́, ны́не и при́сно, и во ве́ки веко́в.

Чтец: Ами́нь. Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас (3 раза)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй (3 раза) Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Иерей: Я́ко Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Хор: Ами́нь.

Го́споди, поми́луй. (12 раз)

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Прииди́те, поклони́мся Царе́ви на́шему, Бо́гу.

Прииди́те, поклони́мся и припаде́м Христу́, Царе́ви на́шему, Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 5

Глаго́лы моя́ внуши́, Го́споди, разуме́й зва́ние мое́. Вонми́ гла́су моле́ния моего́, Царю́ мой и Бо́же мой, я́ко к Тебе́ помолю́ся, Го́споди. Зау́тра услы́ши глас мой, зау́тра предста́ну Ти, и у́зриши мя. Я́ко Бог не хотя́й беззако́ния, Ты еси́: не присели́тся к Тебе́ лука́внуяй, ниже́ пребу́дут беззако́нницы пред очи́ма Твои́ма: возненави́дел еси́ вся де́лающыя беззако́ние. Погуби́ши вся глаго́лющыя лжу: му́жа крове́й и льсти́ва гнуша́ется Госпо́дь. Аз же мно́жеством ми́лости Твоея́, вни́ду в дом Твой, поклоню́ся ко хра́му свято́му Твоему́, в стра́се Твое́м. Го́споди, наста́ви мя пра́вдою Твое́ю, враг мои́х ра́ди испра́ви пред Тобо́ю путь мой. Я́ко несть во усте́х их и́стины, се́рдце их су́етно, гроб отве́рст горта́нь их: язы́ки свои́ми льща́ху. Суди́ им, Бо́же, да отпаду́т от мы́слей свои́х, по мно́жеству нече́стия их изри́ни я́, я́ко преогорчи́ша Тя, Го́споди. И да возвеселя́тся вси упова́ющии на Тя, во век возра́дуются, и всели́шися в них, и похва́лятся о Тебе́ лю́бящии и́мя Твое́. Я́ко Ты благослови́ши пра́ведника, Го́споди: я́ко ору́жием благоволе́ния венча́л еси́ нас.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь. Аллилу́иа, аллилу́иа, аллилу́иа, сла́ва Тебе́ Бо́же. 3 раза.

Зау́тра услы́ши глас мой, / Царю́ мой и Бо́же мой. Поклон.

Стих 1: Глаго́лы моя́ внуши́, Го́споди, разуме́й зва́ние мое́.

Припев: Зау́тра услы́ши глас мой, / Царю́ мой и Бо́же мой. Поклон.

Стих 2: Я́ко к Тебе́ помолю́ся, Го́споди.

Припев: Зау́тра услы́ши глас мой, / Царю́ мой и Бо́же мой. Поклон.

Сла́ва Отцу́, и Сы́ну, и Свято́му Ду́ху. Тропарь святаго или праздника.

И ны́не, и при́сно, и во ве́ки веко́в. Ами́нь. Что Тя нарече́м, о Благода́тная? Не́бо? — я́ко возсия́ла еси́ Со́лнце пра́вды; Рай? — я́ко прозябла́ еси́ Цвет нетле́ния; Де́ву? — я́ко пребыла́ еси́ нетле́нна; Чи́стую Ма́терь? — я́ко име́ла еси́ на святы́х Твои́х объя́тиях Сы́на, всех Бо́га. Того́ моли́ спасти́ся душа́м на́шим.

Молитва перед чтением Евангелия

Бо́же мой, просвети́ мя све́том богоразу́мия Твоего́ и отве́рзи мы́сленныя о́чи се́рдца моего́, во ева́нгельских Твои́х пропове́даний разуме́ние.

Чтение: Мф. 5:42–48

Евангелие от Матфея

Глава 5
42 Просящему у тебя дай, и от хотящего занять у тебя не отвращайся.
43 Вы слышали, что сказано: люби ближнего твоего и ненавидь врага твоего.
44 А Я говорю вам: люби́те врагов ваших, благословляйте проклинающих вас, благотворите ненавидящим вас и молитесь за обижающих вас и гонящих вас,
45 да будете сынами Отца вашего Небесного, ибо Он повелевает солнцу Своему восходить над злыми и добрыми и посылает дождь на праведных и неправедных.
46 Ибо если вы будете любить любящих вас, какая вам награда? Не то же ли делают и мытари***?
47 И если вы приветствуете только братьев ваших, что особенного делаете? Не так же ли поступают и язычники?
48 Итак будьте совершенны, как совершен Отец ваш Небесный.

По окончании «Чтения» или при его отсутствии:

Стопы́ моя́ напра́ви по словеси́ Твоему́ / и да не облада́ет мно́ю вся́кое беззако́ние. / Изба́ви мя от клеветы́ челове́ческия, / и сохраню́ за́поведи Твоя́. / Лице́ Твое́ просвети́ на раба́ Твоего́ / и нау́чи мя оправда́нием Твои́м.

Да испо́лнятся уста́ моя́ хвале́ния Твоего́, Го́споди, / я́ко да воспою́ сла́ву Твою́, / весь день великоле́пие Твое́.

Святы́й Бо́же, Святы́й Кре́пкий, Святы́й Безсме́ртный, поми́луй нас (3 раза)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй (3 раза) Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Иерей: Я́ко Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Хор: Ами́нь.

Богородичен

Я́ко нача́тки естества́, Насади́телю тва́ри, / вселе́нная прино́сит Ти, Го́споди, богоно́сныя му́ченики, / тех моли́твами в ми́ре глубо́це / Це́рковь Твою́, жи́тельство Твое́, / Богоро́дицею соблюди́, Многоми́лостиве.

Го́споди, поми́луй (40 раз).

И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Го́споди, поми́луй. (3 раза) Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Бо́же, уще́дри ны и благослови́ ны, просвети́ лице́ Твое́ на ны и поми́луй ны. Ами́нь.

Христе́, Све́те И́стинный, просвеща́яй и освяща́яй вся́каго челове́ка, гряду́щаго в мир, да зна́менается на нас свет лица́ Твоего́, да в нем у́зрим Свет Непристу́пный: и испра́ви стопы́ на́ша к де́ланию за́поведей Твои́х, моли́твами Пречи́стыя Твоея́ Ма́тере, и всех Твои́х святы́х. Ами́нь.

Чтец: Прииди́те, поклони́мся Царе́ви на́шему, Бо́гу.

Прииди́те, поклони́мся и припаде́м Христу́, Царе́ви на́шему, Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 22

Госпóдь пасéт мя, и ничтóже мя лиши́т. На мéсте злáчне, тáмо всéли мя, на водé покóйне воспитá мя. Ду́шу мою́ обрати́, настáви мя на стези́ прáвды, и́мене рáди Своегó. Áще бо и пойду́ посредé сéни смéртныя, не убою́ся зла, я́ко Ты со мнóю еси́, жезл Твой и пáлица Твоя́, та мя утéшиста. Уготóвал еси́ прéдо мнóю трапéзу сопроти́в стужáющым мне, умасти́л еси́ елéом главу́ мою́, и чáша Твоя́ упоявáющи мя, я́ко держáвна. И ми́лость Твоя́ поженéт мя вся дни животá моегó, и éже всели́ти ми ся в дом Госпóдень, в долготу́ дний.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́, Бо́же. (3 раза)

Тропари, глас 8‑й

Хор: Беззакóния моя́ прéзри, Гóсподи, от Дéвы рождéйся, и сéрдце моé очи́сти, храм то творя́ пречи́стому Твоему́ Тéлу и Крóви, нижé отри́ни менé от Твоегó лицá, без числá имéяй вéлию ми́лость.

Сла́ва: Во причáстие святы́нь Твои́х кáко вниду, недостóйный? Áще бо дерзну́ к Тебé приступи́ти с достóйными, хитóн мя обличáет, я́ко несть вечéрний, и осуждéние исходáтайствую многогрéшной души́ моéй. Очи́сти, Гóсподи, сквéрну души́ моея́, и спаси́ мя, я́ко Человеколю́бец.

И ныне: Мнóгая мнóжества мои́х, Богорóдице, прегрешéний, к Тебé прибегóх, Чи́стая, спасéния трéбуя: посети́ немощству́ющую мою́ ду́шу, и моли́ Сы́на Твоегó и Бóга нáшего, дáти ми оставлéние, я́же содéях лю́тых, еди́на Благословéнная.

Прéжде причáстия стрáшныя жéртвы, Животворя́щаго Тéла Влады́чня, Сим помоли́ся óбразом со трéпетом. 

Молитва Василия Великого

Влады́ко Гóсподи Иису́се Христé, Бóже наш, истóчниче жи́зни и безсмéртия, всея́ твáри ви́димыя и неви́димыя Содéтелю, безначáльнаго Отцá соприсносу́щный Сы́не и собезначáльный, премнóгия рáди блáгости в послéдния дни в плоть оболки́йся, и распны́йся, и погребы́йся за ны неблагодáрныя и злонрáвныя, и Твоéю крóвию обнови́вый растлéвшее грехóм естествó нáше, Сам, Безсмéртный Царю́, приими́ и моé грéшнаго покая́ние, и приклони́ у́хо Твоé мне, и услы́ши глагóлы моя́. Согреши́х бо, Гóсподи, согреши́х на нéбо и пред Тобóю, и несмь достóин воззрéти на высóту слáвы Твоея́: прогнéвах бо Твою́ блáгость, Твоя́ зáповеди преступи́в, и не послу́шав Твои́х повелéний. Но Ты, Гóсподи, незлóбив сый, долготерпели́в же и многоми́лостив, не предáл еси́ мя поги́бнути со беззакóньми мои́ми, моегó вся́чески ожидáя обращéния. Ты бо рекл еси́, Человеколю́бче, прорóком Твои́м: я́ко хотéнием не хощу́ смéрти грéшника, но éже обрати́тися и жи́ву бы́ти ему́. Не хóщеши бо, Влады́ко, создáния Твоéю руку́ погуби́ти, нижé благоволи́ши о поги́бели человéчестей, но хóщеши всем спасти́ся, и в рáзум и́стины приити́. Тéмже и аз, áще и недостóин есмь небесé и земли́, и сея́ приврéменныя жи́зни, всегó себé повину́в греху́, и сластéм порабóтив, и Твой оскверни́в óбраз; но творéние и создáние Твоé быв, не отчаявáю своегó спасéния окая́нный, на Твоé же безмéрное благоутрóбие дерзáя, прихожду́. Приими́ у́бо и менé, Человеколю́бче Гóсподи, я́коже блудни́цу, я́ко разбóйника, я́ко мытаря́ и я́ко блу́днаго, и возми́ моé тя́жкое брéмя грехóв, грех взéмляй ми́ра, и нéмощи человéческия исцеля́яй, труждáющияся и обременéнныя к Себé призывáяй и упокоевáяй, не пришéдый призвáти прáведныя, но грéшныя на покая́ние. И очи́сти мя от вся́кия сквéрны плóти и ду́ха, и научи́ мя совершáти святы́ню во стрáсе Твоéм: я́ко да чи́стым свéдением сóвести моея́, святы́нь Твои́х часть приéмля, соединю́ся святóму Тéлу Твоему́ и Крóви, и имéю Тебé во мне живу́ща и пребывáюща, со Отцéм и Святы́м Твои́м Ду́хом. Ей, Гóсподи Иису́се Христé, Бóже мой, и да не в суд ми бу́дет причáстие пречи́стых и животворя́щих Тáин Твои́х, нижé да нéмощен бу́ду душéю же и тéлом, от éже недостóйне тем причащáтися, но даждь ми, дáже до конéчнаго моегó издыхáния, неосуждéнно восприимáти часть святы́нь Твои́х, в Ду́ха Святáго общéние, в напу́тие животá вéчнаго, и во благоприя́тен отвéт на Стрáшнем Суди́щи Твоéм: я́ко да и аз со всéми избрáнными Твои́ми óбщник бу́ду нетлéнных Твои́х благ, я́же уготóвал еси́ лю́бящим Тя, Гóсподи, в ни́хже препрослáвлен еси́ во вéки. Ами́нь.

Молитва святого Иоанна Дамаскина

Влады́ко Гóсподи Иису́се Христé, Бóже наш, еди́не имéяй власть человéком оставля́ти грехи́, я́ко благ и Человеколю́бец прéзри моя́ вся в вéдении и не в вéдении прегрешéния, и сподóби мя неосуждéнно причасти́тися Божéственных, и преслáвных, и пречи́стых, и животворя́щих Твои́х Тáин, не в тяжесть, ни в му́ку, ни в приложéние грехóв, но во очищéние, и освящéние, и обручéние бу́дущаго животá и Цáрствия, в стéну и пóмощь, и в возражéние сопроти́вных, во истреблéние мнóгих мои́х согрешéний. Ты бо еси́ Бог ми́лости, и щедрóт, и человеколю́бия, и Тебé слáву возсылáем со Отцéм и Святы́м Ду́хом, ны́не и при́сно и во вéки векóв. Ами́нь.

Молитва святого Иоанна Златоустого

Бóже, ослáби, остáви, прости́ ми согрешéния моя́, ели́ка Ти согреши́х, áще слóвом, áще дéлом, áще помышлéнием, во́лею или́ нево́лею, рáзумом или́ неразу́мием, вся ми прости́ я́ко благ и Человеколю́бец, и моли́твами Пречи́стыя Твоея́ Мáтере, у́мных Твои́х служи́телей и святы́х сил, и всех святы́х, от вéка Тебé благоугоди́вших, неосуждéнно благоволи́ прия́ти ми святóе и пречи́стое Твоé Тéло и честну́ю Кровь, во исцелéние души́ же и тéла, и во очищéние лукáвых мои́х помышлéний. Я́ко Твоé есть Цáрство и си́ла и слáва, со Отцéм и Святы́м Ду́хом, ны́не и при́сно и во вéки векóв. Ами́нь.

Молитва святого Иоанна Дамаскина

Пред двéрьми хрáма Твоегó предстою́, и лю́тых помышлéний не отступáю; но Ты, Христé Бóже, мытаря́ оправди́вый, и хананéю поми́ловавый, и разбóйнику рая́ двéри отвéрзый, отвéрзи ми утрóбы человеколю́бия Твоегó, и приими́ мя приходя́ща и прикасáющася Тебé, я́ко блудни́цу, и кровоточи́вую: óва у́бо крáя ри́зы Твоея́ косну́вшися, удобь исцелéние прия́т, óва же пречи́стеи Твои́ нóзе удержáвши, разрешéние грехóв понесé. Аз же, окая́нный, все Твоé Тéло дерзáя восприя́ти, да не опалéн бу́ду; но приими́ мя, я́коже óныя, и просвети́ моя́ душéвныя чу́вства, попаля́я моя́ грехóвныя вины́, моли́твами безсéменно Рóждшия Тя, и Небéсных Сил; я́ко Благословéн еси́ во вéки векóв. Ами́нь.

Тропарь

Во свéтлостех святы́х Твои́х кáко вни́ду, недостóйный? Áще бо дерзну́ совни́ти в чертóг, одéжда мя обличáет, я́ко нéсть брáчна, и свя́зан извéржен бу́ду от Áнгелов. Очи́сти, Гóсподи, сквéрну души́ моея́, и спаси́ мя, я́ко Человеколю́бец.

Го́споди, поми́луй. (3 раза)

Молитва святого Иоанна Златоустого

Вéрую, Гóсподи, и исповéдую, я́ко Ты еси́ вои́стинну Христóс, Сын Бóга живáго, пришéдый в мир грéшныя спасти́, от ни́хже пéрвый есмь аз. Ещé вéрую, я́ко сиé есть сáмое пречи́стое Тéло Твоé, и сия́ есть сáмая честнáя Кровь Твоя́. Молю́ся у́бо Тебé: поми́луй мя, и прости́ ми прегрешéния моя́, вóльная и невóльная, я́же слóвом, я́же дéлом, я́же вéдением и невéдением, и сподóби мя неосуждéнно причасти́тися пречи́стых Твои́х Тáинств, во оставлéние грехóв, и в жизнь вéчную. Ами́нь.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Честне́йшую херуви́м и сла́внейшую без сравне́ния серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

И́менем Госпо́дним благослови́, о́тче.

Иерей: Бо́же, уще́дри ны и благослови́ ны, просвети́ лице́ Твое́ на ны и поми́луй ны.

Ами́нь.

Иерей читает молитву сию:

Влады́ко Человеколю́бче, Гóсподи Иису́се Христé Бóже наш, да не в суд нам бу́дет причáстие пречи́стых и животворя́щих Тáин Твои́х, но во очищéние и освящéние душ и телéс, и во обручéние бу́дущия жи́зни и Цáрствия. Нам же, éже прилепля́тися Бóгу, блáго есть, полагáти во Гóсподе уповáние спасéния нашего.

Далее совершается литургия по чину. Приходя же причаститься, произноси мысленно эти стихи:

Вéчери Твоея́ тáйныя днесь, Сы́не Бóжий, причáстника мя приими́; не бо врагóм Твои́м тáйну повéм, ни лобзáния Ти дам, я́ко Иу́да, но я́ко разбóйник исповéдаю Тя: помяни́ мя, Гóсподи, во Цáрствии Твоéм.

Се приступáю к Божéственному Причащéнию, Содéтелю, да не опали́ши мя приобщéнием, огнь бо еси́, недостóйныя попаля́яй. Но у́бо очи́сти мя от вся́кия сквéрны.

Пришед иерей во храм и наложив на себя епитрахиль, стоя пред царскими вратами, глаголет: Благослове́н Бог наш всегда́, ны́не и при́сно, и во ве́ки веко́в.

Хор: Ами́нь.

Иерей поет: Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Прииди́те, поклони́мся и припаде́м Ему.

Псало́м 103

(О мирстем бытии)

Хор: ¹ Благослови́, душе́ моя́, Го́спода.

Благослове́н еси́, Го́споди.

² Го́споди Бо́же мой, возвели́чился еси́ зело́.

Благослове́н еси́, Го́споди.

³ Во испове́дание и в велеле́поту обле́клся еси́.

Благослове́н еси́, Го́споди.

⁴ Творя́й а́нгелы Своя́ ду́хи и слуги́ Своя́ пла́мень о́гненный.

Ди́вна дела́ Твоя́, Го́споди.

⁵ Основа́яй зе́млю на тве́рди ея́, не преклони́тся в век ве́ка.

Ди́вна дела́ Твоя́, Го́споди.

²⁴ Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва Ти, Го́споди, сотвори́вшему вся.

³³ Воспою́ Го́сподеви в животе́ мое́м, пою́ Бо́гу моему́, до́ндеже есмь.

Сла́ва Ти, Го́споди, сотвори́вшему вся.

Благослови́, душе́ моя́, Го́спода.

Благослове́н еси́, Го́споди.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же (3 раза).

По окончании предначинательного псалма диакон, если его нет, то священник став на обычном месте амвона, произносит мирную ектению:

Ми́ром Го́споду помо́лимся.

Хор: Го́споди, поми́луй.

О свы́шнем ми́ре и спасе́нии душ на́ших, Го́споду помо́лимся.

Хор: Го́споди, поми́луй.

О ми́ре всего́ мiра, благостоя́нии святы́х Бо́жиих церкве́й и соедине́нии всех, Го́споду помо́лимся.

Хор: Го́споди, поми́луй.

О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.

Хор: Го́споди, поми́луй.

О Вели́ком Господи́не и отце́ на́шем, Святе́йшем Патриа́рхе (имярек), и о господи́не на́шем преосвяще́ннейшем митрополи́те (или архиепи́скопе, или епи́скопе) (имярек), честне́м пресви́терстве, во Христе́ диа́констве, о всем при́чте и лю́дех, Го́споду помо́лимся.

Хор: Го́споди, поми́луй.

О Богохрани́мей стране́ на́шей, власте́х и во́инстве ея́, Го́споду помо́лимся.

Хор: Го́споди, поми́луй.

О гра́де сем (или о ве́си сей), вся́ком гра́де, стране́, и ве́рою живу́щих в них, Го́споду помо́лимся.

Хор: Го́споди, поми́луй.

О бла́горастворе́нии возду́хов, о изоби́лии плодо́в земны́х, и вре́менех ми́рных, Го́споду помо́лимся.

Хор: Го́споди, поми́луй.

О путеше́ствующих, неду́гующих, стра́ждущих, в темни́цех заключе́нных и о спасе́нии их, Го́споду помо́лимся.

Хор: Го́споди, поми́луй.

О изба́витися нам от вся́кия ско́рби, гне́ва и ну́жды, Го́споду помо́лимся.

Хор: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Хор: Го́споди, поми́луй.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Хор: Тебе́, Го́споди.

Моли́тва 1‑я (свети́льничная):

Иерей: Го́споди ще́дрый и ми́лостивый, долготерпели́ве и многоми́лостиве, внуши́ моли́тву на́шу, и вонми́ гла́су моле́ния на́шего, сотвори́ с на́ми зна́мение во бла́го, наста́ви нас на путь Твой, е́же ходи́ти во и́стине Твое́й, возвесели́ сердца́ на́ша, во е́же боя́тися и́мене Твоего́ свята́го. Зане́ ве́лий еси́ Ты и творя́й чудеса́, Ты еси́ Бог еди́н, и несть подо́бен Тебе́ в бозе́х, Го́споди: си́лен в ми́лости и благ в кре́пости, во е́же помога́ти, и утеша́ти, и спаса́ти вся упова́ющия во и́мя свято́е Твое́. Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Хор: Ами́нь.

Го́споди, воззва́х

Псалмы 140, 141, 129, 116 поются на глас стихир

Иерей: Го́споди, воззва́х к Тебе́, услы́ши мя.

Хор: Услы́ши мя, Го́споди.

Первый лик: Го́споди, воззва́х к Тебе́, услы́ши мя. / Услы́ши мя, Го́споди. / Го́споди, воззва́х к Тебе́, услы́ши мя; / вонми́ гла́су моле́ния моего́, / внегда́ воззва́ти ми к Тебе́. // Услы́ши мя, Го́споди.

Вторый лик: Да испра́вится моли́тва моя́, / я́ко кади́ло пред Тобо́ю, / воздея́ние руку́ мое́ю, / же́ртва вече́рняя. // Услы́ши мя, Го́споди.

Чтец: Положи́, Го́споди, хране́ние усто́м мои́м / и дверь огражде́ния о устна́х мои́х.

Народ: Услы́ши мя,  Го́споди.

Чтец: Не уклони́ се́рдце мое́ в словеса́ лука́вствия, / непщева́ти вины́ о гресе́х. / С челове́ки де́лающими беззаконие, / и не сочту́ся со избра́нными их.

Народ: Услы́ши мя,  Го́споди.

Чтец: Нака́жет мя пра́ведник ми́лостию иобличи́т мя; / еле́й же гре́шнаго да не нама́стит главы́ моея́, / яко еще́ и моли́тва моя́ во благоволе́ниих их.

Народ: Услы́ши мя, Го́споди.

Чтец: Поже́рты бы́ша при ка́мени судии́ их. / Услы́шатся глаго́ли мои́, я́ко возмого́ша.

Народ: Услы́ши мя,  Го́споди.

Чтец: Яко то́лща земли́ просе́деся на земли́, расточи́шася ко́сти их при а́де. / Яко к Тебе́, Го́споди, Го́споди, о́чи мои́, / на Тя упова́х, не отыми́ ду́шу мою́.

Народ: Услы́ши мя,  Го́споди.

Чтец: Сохрани́ мя от се́ти, ю́же соста́виша ми, / и от собла́зн де́лающих беззако́ние. / Паду́т во мре́жу свою́ гре́шницы; / еди́н есмь аз, до́ндеже прейду́.

Народ: Услы́ши мя, Го́споди.

Чтец: Гла́сом мои́м ко Го́споду воззва́х, / гла́сом мои́м ко Го́споду помоли́хся. / Пролию́ пред Ним моле́ние мое́, / печа́ль мою́ пред Ним возвещу́.

Народ: Услы́ши мя,  Го́споди.

Чтец: Внегда́ исчеза́ти от мене́ ду́ху моему́, / и Ты позна́л еси́ стези́ моя́. / На пути́ сем, по нему́же хожда́х, / скры́ша сеть мне.

Народ: Услы́ши мя,  Го́споди.

Чтец: Смотря́х одесну́ю и возгля́дах, и не бе зна́яй мене́: поги́бе бе́гство от Мене́, и несть взыска́яй ду́шу мою́.

Народ: Услы́ши мя, Го́споди.

Чтец: Воззва́х к Тебе́, Го́споди, рех: / Ты еси́ упова́ние мое, часть моя́ еси́ на земли́ живы́х. / Вонми́ моле́нию моему́, / я́ко смири́хся зело́. / Изба́ви мя от гоня́щих мя, / я́ко укрепи́шася па́че мене́.

Народ: Услы́ши мя,  Го́споди.

На 10: Изведи́ из темни́цы ду́шу мою́, / испове́датися и́мени Твоему́^[1].

^[1] Отсюда стихи начинают чередоваться со стихирами, в соответствии с указаниями Типикона.

Мене́ ждут пра́ведницы, / до́ндеже возда́си мне.

На 8: Из глубины́ воззва́х к Тебе́, Го́споди, / Го́споди, услы́ши глас мой.

Да бу́дут у́ши Твои́ / вне́млюще гла́су моле́ния моего́.

На 6: А́ще беззако́ния на́зриши, Го́споди, Го́споди, кто постои́т? Я́ко у тебе́ очище́ние есть.

Имене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.

От стра́жи у́тренния до но́щи, от стра́жи у́тренния да упова́ет Изра́иль на Го́спода.

Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Хвали́те Го́спода вси язы́цы, похвали́те Его́ вси лю́дие.

Я́ко утверди́ся ми́лость Его́ на нас, и и́стина Госпо́дня пребыва́ет во век.

Сла́ва, и ны́не: Богородичен или стихира праздника.

При пении стихиры на «И ныне:» совершается вход с кадилом и свечой.

Молитва входа: Ве́чер, и зау́тра, и полу́дне, хва́лим, благослови́м, благодари́м и мо́лимся Тебе́, Влады́ко всех: испра́ви моли́тву на́шу, я́ко кади́ло пред Тобо́ю, и не уклони́ серде́ц на́ших в словеса́ или́ в помышле́ния лука́вствия, но изба́ви нас от всех ловя́щих ду́ши на́ша, я́ко к Тебе́, Го́споди, Го́споди, о́чи наши, и на Тя́ упова́хом, да не посрами́ши нас, Бо́же наш. Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Хор: Ами́нь.

Стоя на амвоне лицом к востоку, иерей воздвизает кадило со свечой, возглашая: Прему́дрость, про́сти. Затем поворачивается к народу и осеняет ими народ крестообразно со словами: Свет Христов просвещает всех!

Хор: Све́те ти́хий святы́я сла́вы, / Безсме́ртнаго, Отца́ Небе́снаго, / Свята́го Блаже́ннаго, Иису́се Христе́. / Прише́дше на за́пад со́лнца, / ви́девше свет вече́рний, / пое́м Отца́, Сы́на и Свята́го Ду́ха, Бо́га. / Досто́ин еси́ во вся времена́ / пе́т бы́ти гла́сы преподо́бными, / Сы́не Бо́жий, живо́т дая́й, / те́мже мiр Тя сла́вит.

Диакон: Во́нмем.

Иерей: Мир всем.

Люди: И ду́хови твоему́.

Диакон: Прему́дрость!

Канонарх возглашает вечерний прокимен.

Вече́рний проки́мен (псало́м)

В субботу вечера пс. 92, глас 6

Канонарх: Госпо́дь воцари́ся, / в ле́поту облече́ся.

Хор: Госпо́дь воцари́ся, / в ле́поту облече́ся.

Стих: Облече́ся Госпо́дь в си́лу и препоя́сася.

Хор: Госпо́дь воцари́ся, / в ле́поту облече́ся.

Стих: И́бо утверди́ вселе́нную, я́же не подви́жится.

Хор: Госпо́дь воцари́ся, / в ле́поту облече́ся.

Стих: Готов Престол Твой оттоле: от века Ты еси.

Хор: Госпо́дь воцари́ся, / в ле́поту облече́ся.

Стих: Свидения Твоя уверишася зело,

Хор: Госпо́дь воцари́ся, / в ле́поту облече́ся.

Стих: До́му Твоему́ подоба́ет святы́ня, Го́споди, в долготу́ дний.

Хор: Госпо́дь воцари́ся, / в ле́поту облече́ся.

Стих: Госпо́дь воцари́ся,

Хор: в ле́поту облече́ся.

Пареми́и (если есть)

Диакон: Прему́дрость.

Чтец: Бытия́ (Исхо́да, При́тчей и т.п.) чтения.

Диакон: Во́нмем.

Сугу́бая ектения́

Диакон: От всея́ души́, и от всего́ помышле́ния на́шего рцем.

Хор: Го́споди, поми́луй.

Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.

Хор: Го́споди, поми́луй.

Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Хор: Го́споди, поми́луй. (3 раза)

Еще́ мо́лимся о Вели́ком Господи́не и отце́ на́шем Святе́йшем Патриа́рхе (имярек), и о господи́не на́шем преосвяще́ннейшем митрополи́те (или архиепи́скопе, или епи́скопе) (имярек), и о всей во Христе́ бра́тии на́шей.

Хор: Го́споди, поми́луй. (3 раза)

Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

Хор: Го́споди, поми́луй. (3 раза)

Еще́ мо́лимся о блаже́нных и приснопа́мятных созда́телех свята́го хра́ма сего́ (аще во обители: святы́я оби́тели сея́), и о всех преждепочи́вших отце́х и бра́тиях, зде лежа́щих и повсю́ду, правосла́вных.

Хор: Го́споди, поми́луй. (3 раза)

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих, бра́тии свята́го хра́ма сего́ (аще во обители: святы́я оби́тели сея́).

Хор: Го́споди, поми́луй. (3 раза)

Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.

Хор: Го́споди, поми́луй. (3 раза)

Моли́тва 6‑я (свети́льничная)

Иерей: Бо́же вели́кий и ди́вный, неисповеди́мою бла́гостию и бога́тым про́мыслом управля́яй вся́ческая, и мирска́я нам блага́я дарова́вый, и поручи́вый нам обеща́нное Ца́рство, обеща́нными благи́ми; путесотвори́вый нам и дне преше́дшую ча́сть от вся́каго уклони́тися зла: да́руй нам и про́чее непоро́чно соверши́ти, пред свято́ю сла́вою Твое́ю, пе́ти Тя, Еди́наго блага́го и человеколюби́ваго Бо́га на́шего. Я́ко Ты еси́ Бог наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Хор: Ами́нь.

Вече́рнее славосло́вие

Хор: Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди Бо́же оте́ц на́ших, и хва́льно и просла́влено и́мя Твое́ во ве́ки, ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́. Тебе́ подоба́ет пе́ние, Тебе́ сла́ва подоба́ет, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Проси́тельная ектения́

Диакон: Испо́лним вече́рнюю моли́тву на́шу Го́сподеви.

Хор: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Хор: Го́споди, поми́луй.

Ве́чера всего́ соверше́нна, свя́та, ми́рна и безгре́шна у Го́спода про́сим.

Хор: Пода́й, Го́споди.

А́нгела ми́рна, ве́рна наста́вника, храни́теля душ и теле́с на́ших у Го́спода про́сим.

Хор: Пода́й, Го́споди.

Проще́ния и оставле́ния грехо́в и прегреше́ний на́ших у Го́спода про́сим.

Хор: Пода́й, Го́споди.

До́брых и поле́зных душа́м нашим, и ми́ра мiрови у Го́спода про́сим.

Хор: Пода́й, Го́споди.

Про́чее вре́мя жи́зни на́шея в ми́ре и покая́нии сконча́ти у Го́спода про́сим.

Хор: Пода́й, Го́споди.

Христиа́нския кончи́ны жи́зни на́шея, безболе́знены, непосты́дны, ми́рны и до́браго отве́та на стра́шнем суди́щи Христо́ве про́сим.

Хор: Пода́й, Го́споди.

Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Хор: Тебе́, Го́споди.

Моли́тва 7‑я (свети́льничная)

Иерей: Бо́же вели́кий и вы́шний, Еди́н име́яй безсме́ртие, во све́те живы́й непристу́пнем, всю́ тварь прему́дростию созда́вый, раздели́вый между́ све́том и между́ тьмо́ю, и со́лнце положи́вый во о́бласть дне, луну́ же и зве́зды во о́бласть но́щи, сподо́бивый нас, гре́шных, и в настоя́щий ча́с предвари́ти лице́ Твое́ испове́данием, и вече́рнее Тебе́ славосло́вие принести́. Сам, Человеколю́бче, испра́ви моли́тву на́шу я́ко кади́ло пред Тобо́ю, и приими́ ю́ в воню́ благоуха́ния, пода́ждь же нам настоя́щий ве́чер, и приходя́щую но́щь ми́рну, облецы́ ны во ору́жие све́та, изба́ви ны от стра́ха нощна́го и вся́кия ве́щи, во тьме́ преходя́щия, и да́ждь со́н, его́же во упокое́ние не́мощи на́шей дарова́л еси́, вся́каго мечта́ния диа́воля отчужде́нный. Ей Влады́ко, благи́х пода́телю, да и на ло́жах на́ших умиля́ющеся, помина́ем в нощи́ и́мя Твое́, и поуче́нием Твои́х за́поведей просвеща́еми, в ра́дости душе́вней воста́нем ко славосло́вию Твоея́ бла́гости, моле́ния и молитвы Твоему́ благоутро́бию принося́ще, о свои́х согреше́ниих и всех люде́й Твои́х, я́же моли́твами святы́я Богоро́дицы, ми́лостию посети́. Я́ко благ и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Хор: Ами́нь.

Иерей: Ми́р всем.

Люди: И ду́хови твоему́.

Диакон: Главы́ на́ша Го́сподеви прикло́ним.

Хор: Тебе́, Го́споди.

Иерей: Го́споди Бо́же наш, приклони́вый небеса́ и соше́дый на спасе́ние ро́да челове́ческаго, при́зри на рабы́ Твоя́ и на достоя́ние Твое́. Тебе́ бо стра́шному и человеколю́бцу судии́, Твои́ раби́ подклони́ша главы́, своя́ же покори́ша вы́я, не от челове́к ожида́юще по́мощи, но Твоея́ ожида́юще ми́лости и Твоего́ ча́юще спасе́ния, я́же сохрани́ на вся́кое вре́мя и по настоя́щем ве́чере, и в приходя́щую но́щь, от вся́каго врага́, от вся́каго проти́внаго де́йства диа́вольскаго и от помышле́ний су́етных, и воспомина́ний лука́вых. Бу́ди держа́ва Ца́рствия Твоего́ благослове́на и препросла́влена, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Хор: Ами́нь.

Стихи́ры на стихо́вне

Стих 1: К Тебе́ возведо́х о́чи мои́, живу́щему на небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны.

Стих 2: Поми́луй нас Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Сла́ва, и ны́не: Богоро́дичен или стихи́ра пра́здника.

Моли́тва св. Симео́на Богоприи́мца

Хор: Ны́не отпуща́еши раба́ Твоего́, Влады́ко, по глаго́лу Твоему́ с ми́ром: я́ко ви́деста о́чи мои́ спасе́ние Твое́, е́же еси́ угото́вал пред лице́м всех люде́й, свет во открове́ние язы́ков, и сла́ву люде́й Твои́х Изра́иля.

Чтец: Трисвято́е по О́тче наш.

Иерей: Я́ко Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Хор: Ами́нь.

Тропари́ по Уста́ву.

Диакон: Прему́дрость.

Хор: Благослови́.

Иерей: Сый благослове́н Христо́с, Бог наш, всегда́, ны́не и при́сно, и во ве́ки веко́в.

Хор: Ами́нь. Утверди́, Бо́же, святу́ю правосла́вную ве́ру, правосла́вных христиа́н во ве́к ве́ка.

Иерей: Пресвята́я Богоро́дице, спаси́ нас.

Хор: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Иерей: Сла́ва Тебе́, Христе́ Бо́же, упова́ние на́ше, сла́ва Тебе́.

Хор: Сла́ва, и ны́не: Го́споди, поми́луй. (3 раза) Благослови́.

Иерей совершает отпуст.

Лик поет многолетие.

Иерей: Благослове́н Бог наш всегда́, ны́не и при́сно, и во ве́ки веко́в.

Чтец: Ами́нь.

Прииди́те, поклони́мся Царе́ви на́шему, Бо́гу.

Прииди́те, поклони́мся и припаде́м Христу́, Царе́ви на́шему, Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 69

Бо́же, в по́мощь мою́ вонми́, Го́споди, помощи́ ми потщи́ся. Да постыдя́тся и посра́мятся и́щущии ду́шу мою́, да возвратя́тся вспять и постыдя́тся хотя́щии ми зла́я. Да возвратя́тся а́бие стыдя́щеся глаго́лющии ми: бла́гоже, бла́гоже. Да возра́дуются и возвеселя́тся о Тебе́ вси и́щущии Тебе́, Бо́же, и да глаго́лют вы́ну, да возвели́чится Госпо́дь, лю́бящии спасе́ние Твое́: аз же нищ есмь и убо́г, Бо́же, помози́ ми: Помо́щник мой и Изба́витель мой еси́ Ты, Го́споди, не закосни́.

Славословие вседневное

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди, Царю́ Небе́сный, Боже, О́тче Вседержи́телю, Го́споди Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас. Взе́мляй грехи́ ми́ра, приими́ моли́тву на́шу. Седя́й одесну́ю Отца́, поми́луй нас. Я́ко Ты еси́ Еди́н Свят; Ты еси́ Еди́н Госпо́дь, Иису́с Христо́с, в сла́ву Бо́га Отца́, ами́нь.

На вся́ку нощь благословлю́ Тя и восхвалю́ и́мя Твое́ во ве́ки, и в век ве́ка.

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой, я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Сподо́би Го́споди, в нощь сию́ без греха́ сохрани́тися нам. Благослове́н еси́ Го́споди Бо́же оте́ц на́ших, и хва́льно и просла́влено и́мя Твое́ во ве́ки, ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми. Го́споди, ми́лость Твоя́ во век, дел руку́ Твое́ю не пре́зри: Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Здесь по требованию Устава или собственному желанию читается канон ко Причащению или рядовой канон Богородице из Октоиха или утренний канон святому из Минеи, или иные какие.

Канон ко Святому Причащению

По окончании канона глаголем: Досто́йно есть я́ко вои́стинну блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем.

Святы́й Бо́же, Святы́й Кре́пкий, Святы́й Безсме́ртный, поми́луй нас (3 раза)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (3 раза) Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Иерей: Я́ко Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Хор: Ами́нь.

Тропарь дня

[если праздник, то вместо него — кондак празднику]

Го́споди поми́луй, 40 раз.

И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Диакон: Прему́дрость.

Иерей: Пресвята́я Богоро́дице, спаси́ нас.

Хор: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Иерей: Сла́ва Тебе́, Христе́ Бо́же, упова́ние на́ше, сла́ва Тебе́.

Хор: Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь. Го́споди, поми́луй (3 раза) Благослови́.

Иерей совершает отпуст.