Сла́ва в вы́шних Бо́гу, и на земли́ мир, в челове́цех благоволе́ние.
Го́споди, устне́ мои отве́рзеши, и уста́ моя́ возвестя́т хвалу́ Твою́.
Псало́м 62
Бо́же, Бо́же мой! К Тебе́ у́тренюю; возжада́ Тебе́ душа́ моя́, коль мно́жицею Тебе́ плоть моя́ в земли́ пу́сте, и непрохо́дне, и безво́дне! Та́ко во святе́м яви́хся Тебе́, ви́дети си́лу Твою́ и сла́ву Твою́: я́ко лу́чше ми́лость Твоя́ па́че живо́т. Устне́ мои́ похвали́те Тя; та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти, да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя: я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́, Бо́же. (3 раза)
Тропа́рь, глас 8
Се, Жени́х гряде́т в полу́нощи, и блаже́н раб, его́же обря́щет бдя́ща: недосто́ин же па́ки, его́же обря́щет уныва́юща. Блюди́ у́бо, душе́ моя́, не сно́м отяготи́ся, да не сме́рти предана́ бу́деши и Ца́рствия вне затвори́шися, но воспряни́ зову́щи: Свят, Свят, Свят еси́, Бо́же, Богоро́дицею поми́луй нас.
Моли́тва ко Пресвято́й Тро́ице
От сна воста́в, благодарю́ Тя, Свята́я Тро́ице, яко, мно́гия ра́ди Твоея́ бла́гости и долготерпе́ния, не прогне́вался еси́ на мя, лени́ваго и гре́шнаго, ниже́ погуби́л мя еси́ со беззако́ньми мои́ми, но человеколю́бствовал еси́ обы́чно и, в неча́янии лежа́щаго, воздви́гл мя еси́, во е́же у́треневати и славосло́вити держа́ву Твою́. И ны́не просвети́ мои́ о́чи мы́сленныя, отве́рзи моя́ уста́ поуча́тися словесе́м Твои́м, и разуме́ти за́поведи Твоя́, и твори́ти во́лю Твою́, и пе́ти Тя во испове́дании серде́чнем, и воспева́ти всесвято́е и́мя Твое́, Отца́, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.
Псалмы́ из Псалти́ри
(по одной Славе в день - совершается сидя) Пс.34-35 Если нет времени или возможности, то этот отдел псалмопения пропускается.
Стихословия перед чтением Псалтири:
Го́споди, поми́луй. (3 раза)
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Псалти́рь
Псалом 34
Псало́м Дави́ду.
1 Суди́, Го́споди, оби́дящыя мя́, побори́ борю́щыя мя́.
2 Приими́ ору́жие и щи́т и воста́ни в по́мощь мою́:
3 изсу́ни ме́чь и заключи́ сопроти́в гоня́щих мя́: рцы́ души́ мое́й: спасе́ние твое́ е́смь А́з.
4 Да постыдя́тся и посра́мятся и́щущии ду́шу мою́, да возвратя́тся вспя́ть и постыдя́тся мы́слящии ми́ зла́я.
5 Да бу́дут я́ко пра́х пред лице́м ве́тра, и А́нгел Госпо́день оскорбля́я и́х:
6 да бу́дет пу́ть и́х тма́ и по́лзок, и А́нгел Госпо́день погоня́яй и́х:
7 я́ко ту́не скры́ша ми́ па́губу се́ти своея́, всу́е поноси́ша души́ мое́й.
8 Да прии́дет ему́ се́ть, ю́же не ве́сть, и лови́тва, ю́же скры́, да обы́мет и́, и в се́ть да впаде́т в ню́.
9 Душа́ же моя́ возра́дуется о Го́споде, возвесели́тся о спасе́нии Его́.
10 Вся́ ко́сти моя́ реку́т: Го́споди, Го́споди, кто́ подо́бен Тебе́? Избавля́яй ни́ща из руки́ кре́пльших его́, и ни́ща, и убо́га от расхища́ющих его́.
11 Воста́вше на мя́ свиде́теле непра́веднии, я́же не ве́дях, вопроша́ху мя́.
12 Возда́ша ми́ лука́вая воз блага́я, и безча́дие души́ мое́й.
13 А́з же, внегда́ они́ стужа́ху ми́, облача́хся во вре́тище и смиря́х посто́м ду́шу мою́, и моли́тва моя́ в не́дро мое́ возврати́тся.
14 Я́ко бли́жнему, я́ко бра́ту на́шему, та́ко угожда́х: я́ко пла́чя и се́туя, та́ко смиря́хся.
15 И на мя́ возвесели́шася и собра́шася: собра́шася на мя́ ра́ны, и не позна́х: раздели́шася, и не умили́шася.
16 Искуси́ша мя́, подражни́ша мя́ подражне́нием, поскрежета́ша на мя́ зубы́ свои́ми.
17 Го́споди, когда́ у́зриши? Устро́й ду́шу мою́ от злоде́йства и́х, от ле́в единоро́дную мою́.
18 Испове́мся Тебе́ в це́ркви мно́зе, в лю́дех тя́жцех восхвалю́ Тя.
19 Да не возра́дуются о мне́ вражду́ющии ми́ непра́ведно, ненави́дящии мя́ ту́не и помиза́ющии очи́ма:
20 я́ко мне́ у́бо ми́рная глаго́лаху, и на гне́в ле́сти помышля́ху.
21 Разшири́ша на мя́ уста́ своя́, ре́ша: бла́гоже, бла́гоже, ви́деша о́чи на́ши.
22 Ви́дел еси́, Го́споди, да не премолчи́ши: Го́споди, не отступи́ от мене́.
23 Воста́ни, Го́споди, и вонми́ суду́ моему́, Бо́же мо́й и Го́споди мо́й, на прю́ мою́.
24 Суди́ ми, Го́споди, по пра́вде Твое́й, Го́споди Бо́же мо́й, и да не возра́дуются о мне́.
25 Да не реку́т в сердца́х свои́х: бла́гоже, бла́гоже души́ на́шей: ниже́ да реку́т: пожро́хом его́.
26 Да постыдя́тся и посра́мятся вку́пе ра́дующиися зло́м мои́м: да облеку́тся в сту́д и сра́м велере́чующии на мя́.
27 Да возра́дуются и возвеселя́тся хотя́щии пра́вды моея́: и да реку́т вы́ну, да возвели́чится Госпо́дь, хотя́щии ми́ра рабу́ Его́.
28 И язы́к мо́й поучи́тся пра́вде Твое́й, ве́сь де́нь хвале́ Твое́й.
Псалом 35
1 В коне́ц, о́троку Госпо́дню Дави́ду.
2 Глаго́лет пребеззако́нный согреша́ти в себе́: не́сть стра́ха Бо́жия пред очи́ма его́:
3 я́ко ульсти́ пред ни́м обрести́ беззако́ние свое́, и возненави́дети.
4 Глаго́лы у́ст его́ беззако́ние и ле́сть: не восхоте́ разуме́ти е́же ублажи́ти.
5 Беззако́ние помы́сли на ло́жи свое́м: предста́ вся́кому пути́ небла́гу, о зло́бе же не негодова́.
6 Го́споди, на небеси́ ми́лость Твоя́, и и́стина Твоя́ до о́блак:
7 пра́вда Твоя́ я́ко го́ры Бо́жия, судьбы́ Твоя́ бе́здна мно́га: челове́ки и скоты́ спасе́ши, Го́споди.
8 Я́ко умно́жил еси́ ми́лость Твою́, Бо́же: сы́нове же челове́честии в кро́ве крилу́ Твое́ю наде́ятися и́мут.
9 Упию́тся от ту́ка до́му Твоего́, и пото́ком сла́дости Твоея́ напои́ши я́.
10 Я́ко у Тебе́ исто́чник живота́, во све́те Твое́м у́зрим све́т.
11 Проба́ви ми́лость Твою́ ве́дущым Тя́ и пра́вду Твою́ пра́вым се́рдцем.
12 Да не прии́дет мне́ нога́ горды́ни, и рука́ гре́шнича да не подви́жит мене́.
13 Та́мо падо́ша вси́ де́лающии беззако́ние: изринове́ни бы́ша, и не возмо́гут ста́ти.
По окончании стихословия псалмов:
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́, Бо́же. (3 раза)
Моли́тва св. Мака́рия Вели́кого
К Тебе́, Влады́ко Человеколю́бче, от сна воста́в, прибега́ю, и на дела́ Твоя́ подвиза́юся милосе́рдием Твои́м, и молю́ся Тебе: помози́ ми на вся́кое вре́мя, во вся́кой ве́щи, и изба́ви мя от вся́кия мирски́я злы́я ве́щи и диа́вольскаго поспеше́ния, и спаси́ мя, и введи́ в Ца́рство Твое́ Ве́чное. Ты бо еси́ мой Сотвори́тель и вся́кому бла́гу Промы́сленник и Пода́тель, о Тебе́ же все упова́ние мое́, и Тебе́ сла́ву возсыла́ю, ны́не, и при́сно, и во ве́ки веко́в. Ами́нь.
Чтение Евангелия (совершается сидя)
Моли́тва перед чте́нием Ева́нгелия
Бо́же мой, просвети́ мя све́том богоразу́мия Твоего́ и отве́рзи мы́сленныя о́чи се́рдца моего́, во ева́нгельских Твои́х пропове́даний разуме́ние.
Ева́нгелие от Матфе́я
Во вре́мя о́но, сове́т прие́мше вси фарисе́е на Иису́са, я́ко да обольстя́т Его́ сло́вом, посыла́ют к Нему́ ученики́ своя́ со Иродиа́ны, глаго́люще: Учи́телю, ве́мы я́ко и́стинен еси́, и пути́ Бо́жию вои́стину учи́ши, и не ради́ши ни о ко́мже: не зри́ши бо на лице́ челове́ком. Рцы у́бо нам, что Ти ся мнит? Досто́йно ли есть да́ти кинсо́н ке́сареви, или́ ни? Разуме́в же Иису́с лука́вство их, рече́: что́ Мя искуша́ете, лицеме́ри? Покажи́те Ми злати́цу кинсо́нную. Они́ же принесо́ша Ему́ пе́нязь. И глаго́ла им: чий о́браз сей и написа́ние? И глаго́лаша Ему́: ке́сарев. Тогда́ глаго́ла им: воздади́те у́бо ке́сарева ке́сареви: и Бо́жия Бо́гови. И слы́шавше ди́вишася: и оста́вльше Его́ отыдо́ша. В той день приступи́ша к Нему́ саддуке́е, и́же глаго́лют не бы́ти воскресе́нию: и вопроси́ша Его́, глаго́люще: Учи́телю, Моисе́й рече́: а́ще кто у́мрет не и́мый чад, да по́ймет брат его́ жену его́, и воскреси́т се́мя брата своего́. Бе́ша же в нас седмь бра́тия: и пе́рвый оже́нься у́мре, и не и́мый се́мене, оста́ви жену́ свою́ бра́ту своему́. Та́кожде же и вторы́й, и тре́тий, да́же до седма́го. Последи́ же всех у́мре и жена́. В воскреше́ние у́бо, кото́раго от седми́х бу́дет жена́? Вси́ бо име́ша ю́? Отвеща́в же Иису́с, рече́ им: прельща́етеся, не ве́дуще Писания, ни си́лы Бо́жия. В воскресе́ние бо ни же́нятся, ни посяга́ют, но я́ко а́нгели Бо́жии на Небеси́ суть. О воскресе́нии же ме́ртвых, не́сте ли чли рече́ннаго вам Бо́гом, глаго́лющим: Аз есмь Бог Авраа́мов, и Бог Исаа́ков, и Бог Иа́ковль; несть Бог, Бог ме́ртвых, но Бог живы́х. И слы́шавше наро́ди дивля́хуся о уче́нии Его́. Фарисе́е же слы́шавше, я́ко посрами́ саддуке́и, собра́шася вку́пе, и вопроси́ еди́н от них законоучи́тель, искуша́я Его́, и глаго́ля: Учи́телю, ка́я заповедь бо́льши есть в зако́не? Иису́с же рече́ ему́: возлюби́ши Го́спода Бо́га твоего́ всем се́рдцем Твои́м, и все́ю душе́ю твое́ю, и все́ю мы́слию твое́ю. Сия́ есть пе́рвая и бо́льшая заповедь. Втора́я же подо́бна ей: возлюби́ши и́скренняго твоего́ я́ко сам себе́. В сию́ обою́ за́поведию весь зако́н и проро́цы ви́сят. Со́браном же фарисе́ом вопроси́ их Иису́с, глаго́ля: что́ ся вам мнит о Христе́? Чий есть Сын? Глаго́лаша Ему́: Дави́дов. Глаго́ла им: ка́ко у́бо Дави́д Ду́хом Го́спода Его́ нарицает, глаго́ля: Рече́ Госпо́дь Го́сподеви Моему́, седи́ одесну́ю Мене́, до́ндеже положу́ враги́ Твоя́ подно́жие нога́ма Твои́ма. А́ще у́бо Дави́д нарица́ет Его́ Го́спода, ка́ко сын Ему́ есть? И никто́же можа́ше отвеща́ти Ему́ словесе́: ниже́ смея́ кто от того́ дне вопроси́ти Его́ ктому́. Тогда́ Иису́с глаго́ла к наро́дом и ученико́м Свои́м, глаго́ля: на Моисе́ове седа́лищи седо́ша кни́жницы и фарисе́е. Вся у́бо ели́ка а́ще реку́т вам блюсти́, соблюда́йте и твори́те, по дело́м же их не твори́те: глаго́лют бо и не творя́т. Связу́ют бо бремена́ тя́жка и бе́дне носи́ма, и возлага́ют на плеща́ челове́ческа, пе́рстом же свои́м не хотят дви́гнути их. Вся же дела́ своя́ творя́т, да ви́дими бу́дут челове́ки: разширя́ют же храни́лища своя́, и велича́ют воскри́лия риз свои́х. Лю́бят же преждевозлега́ния на ве́черях, и преждеседа́ния на со́нмищах, и целова́ния на то́ржищах, и зва́тися от челове́к: учи́телю, учи́телю. Вы же не нарица́йтеся учи́тели: еди́н бо есть ваш Учи́тель – Христо́с: вси же вы бра́тия есте́. И Отца́ не зови́те себе́ на земли́: еди́н бо есть Оте́ц ваш, И́же на Небесе́х. Ниже́ нарица́йтеся наста́вницы, еди́н бо есть Наста́вник ваш, Христо́с. Бо́лий же в вас, да бу́дет вам слуга́. И́же бо вознесе́тся, смири́тся: и смиря́яйся, вознесе́тся. Го́ре же вам, кни́жницы и фарисе́е, лицеме́ри, я́ко снеда́ете до́мы вдови́ц, и вино́ю дале́че моли́твы творя́ще: сего́ ра́ди ли́шшее прии́мете осужде́ние. Го́ре вам, кни́жницы и фарисе́е, лицеме́ри, я́ко затворя́ете Ца́рствие Небе́сное пред челове́ки: вы бо не вхо́дите, ни входя́щих оставля́ете вни́ти. Го́ре вам, кни́жницы и фарисе́е, лицеме́ри, я́ко прехо́дите мо́ре и су́шу, сотвори́ти еди́наго прише́льца: и егда́ бу́дет, творите́ его́ Сы́на гее́нны сугу́бейша вас. Го́ре вам, вожди́ слепи́и, глаго́люще: и́же а́ще клене́тся Це́рковию, ничесо́же есть: а и́же клене́тся зла́том церко́вным, до́лжен есть. Бу́и и слепи́и, ко́е бо бо́ле есть? Зла́то ли? или́ Це́рковь, святя́щая зла́то? И и́же а́ще клене́тся олтаре́м, ничесо́же есть: а и́же клене́тся да́ром и́же верху́ его́, до́лжен есть. Бу́и и слепи́и, что бо бо́ле? Дар ли, или́ олта́рь святя́й дар? И́же у́бо клене́тся олтаре́м, клене́тся им и Су́щим верху́ его́. И и́же клене́тся Це́рковию, клене́тся е́ю, и Живу́щим в ней. И клены́йся небесе́м, клене́тся престо́лом Бо́жиим, и Седя́щим на нем. Го́ре вам, кни́жницы и фарисе́е, лицеме́ри, я́ко одеся́тствуете мя́тву, и копр, и ки́мин: и оста́висте вя́щшая зако́ну, суд, и ми́лость, и ве́ру. Сия́ же подоба́ше твори́ти, и о́нех не оставля́ти. Вожди́ слепи́и, оцежда́ющии комары́, вельблу́ды же пожира́юще. Го́ре вам, кни́жницы и фарисе́е, лицеме́ри, я́ко очища́ете вне́шнее сткля́ницы и блю́да: внутрьу́ду же суть по́лни хище́ния и непра́вды. Фарисе́е слепы́й, очи́сти пре́жде вну́треннее сткля́ницы и блю́да, да бу́дет и вне́шнее и́ма чи́сто. Го́ре вам, кни́жницы и фарисе́е, лицеме́ри, я́ко подо́битеся гробо́м пова́пленым, и́же внеу́ду у́бо явля́ются красны́, внутрьу́ду же по́лни суть косте́й ме́ртвых, и вся́кия нечистоты́. Та́ко и вы, внеу́ду у́бо явля́етеся челове́ком пра́ведни: внутрьу́ду же есте́ по́лни лицеме́рия и беззако́ния. Го́ре вам, кни́жницы и фарисе́е, лицеме́ри, я́ко зи́ждете гро́бы проро́ческия, и кра́сите ра́ки пра́ведных. И глаго́лете: а́ще бы́хом бы́ли во дни оте́ц на́ших, не бы́хом у́бо о́бщницы им бы́ли во дни кро́ви проро́к. Те́мже са́ми свиде́тельствуете себе́, я́ко сы́нове есте́ изби́вших проро́ки. И вы испо́лните ме́ру оте́ц ва́ших. Змия́, порожде́ния ехи́днова, ка́ко убежите́ от суда́ огня́ гее́нскаго? Сего́ ра́ди се Аз послю́ к вам проро́ки, и прему́дры, и кни́жники: и от них убие́те и распне́те. И от них бие́те на со́нмищах ва́ших, и изжене́те от гра́да во град. Я́ко да прии́дет на вы вся́ка кровь пра́ведна, пролива́емая на земли́, от кро́ве А́веля пра́веднаго, до кро́ве Захарии, сы́на Варахи́ина, его́же уби́сте ме́жду це́рковию и олтаре́м. Ами́нь глаго́лю вам: я́ко прии́дут вся Сия́ на род сей. Иерусали́ме, Иерусали́ме, изби́вый проро́ки, и каме́нием побива́яй по́сланныя к тебе́, колькра́ты восхоте́х собра́ти ча́да твоя́, я́коже собира́ет ко́кош птенцы́ своя́ под криле́, и не восхоте́сте! Се оставля́ется вам дом ваш пуст. Глаго́лю бо вам, я́ко не и́мате Мене́ ви́дети отсе́ле, до́ндеже рече́те: благослове́н Гряды́й во И́мя Госпо́дне.
Псало́м 50
Поми́луй мя, Бо́же, по вели́цей ми́лости Твое́й, и, по мно́жеству щедро́т Твои́х, очи́сти беззако́ние мое́. Наипа́че омы́й мя от беззако́ния моего́ и от греха́ моего́ очи́сти мя; я́ко беззако́ние мое́ аз зна́ю и грех мой предо мно́ю есть вы́ну. Тебе́, Еди́ному, согреши́х и лука́вое пред Тобо́ю сотвори́х; я́ко да оправди́шися во словесе́х Твои́х и победи́ши, внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом - и очи́щуся; омы́еши мя - и па́че сне́га убелю́ся. Слу́ху моему́ да́си ра́дость и весе́лие: возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу - дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Библе́йские пе́сни
Песнь 2
Припев: Пра́веден еси́, Го́споди, сла́ва Тебе́!
Вонми́, не́бо, и возглаго́лю, и да слы́шит земля́ глаго́лы уст мои́х.
Припев: Пра́веден еси́, Го́споди, сла́ва Тебе́!
Да ча́ет я́ко дождь веща́ние мое́, да сни́дут я́ко роса́ глаго́ли мои.
Припев: Пра́веден еси́, Го́споди, сла́ва Тебе́!
Я́ко ту́ча на тро́скот, и я́ко и́ней на се́но, я́ко и́мя Госпо́дне призва́х, дади́те вели́чие Бо́гу на́шему.
Припев: Пра́веден еси́, Го́споди, сла́ва Тебе́!
Бог, и́стинна дела́ Его́, и вси путие́ Его́ суд.
Припев: Пра́веден еси́, Го́споди, сла́ва Тебе́!
Бог ве́рен, и несть непра́вды в Нем, пра́веден и преподо́бен Госпо́дь.
Припев: Пра́веден еси́, Го́споди, сла́ва Тебе́!
Согреши́ша, не того́ ча́да поро́чная, ро́де стропти́вый и развраще́нный, сия́ ли Го́сподеви воздаете́?
Припев: Пра́веден еси́, Го́споди, сла́ва Тебе́!
Си́и лю́дие бу́и и нему́дри, не сам ли сей Оте́ц твой стяжа́ тя, и сотвори́ тя, и созда́ тя?
Припев: Пра́веден еси́, Го́споди, сла́ва Тебе́!
Помяни́те дни ве́чныя, разуме́йте ле́та ро́да родо́в.
Припев: Пра́веден еси́, Го́споди, сла́ва Тебе́!
Вопроси́ отца́ твоего́, и возвести́т тебе́, ста́рцы твоя́, и реку́т ти.
Припев: Пра́веден еси́, Го́споди, сла́ва Тебе́!
Егда́ разделя́ше Вы́шний язы́ки, я́коже разсе́я сы́ны Ада́мовы.
Припев: Пра́веден еси́, Го́споди, сла́ва Тебе́!
Поста́ви преде́лы язы́ков по числу́ А́нгел Бо́жиих. И бысть часть Госпо́дня, лю́дие Его́ Иа́ков, у́же насле́дия Его́ Изра́иль.
Припев: Пра́веден еси́, Го́споди, сла́ва Тебе́!
Удовли́ его́ в пусты́ни, в жа́жди зно́я в безво́дне.
Припев: Пра́веден еси́, Го́споди, сла́ва Тебе́!
Обы́де его́, и наказа́ его́, и сохрани́ его́, я́ко зе́ницу о́ка.
Припев: Пра́веден еси́, Го́споди, сла́ва Тебе́!
Я́ко оре́л покры́ гнездо́ свое́, и на птенцы́ своя́ возжеле́.
Припев: Пра́веден еси́, Го́споди, сла́ва Тебе́!
Просте́р криле́ свои́, и прия́т я́, и подъя́т я́ на ра́му свое́ю.
Припев: Пра́веден еси́, Го́споди, сла́ва Тебе́!
Госпо́дь еди́н вожда́ше я́, и не бе с ни́ми бог чу́ждь.
Припев: Пра́веден еси́, Го́споди, сла́ва Тебе́!
Возведе́ я́ на си́лу земли́, насы́ти я́ жит се́льных.
Припев: Пра́веден еси́, Го́споди, сла́ва Тебе́!
Сса́ше мед из ка́мене, и еле́й от тве́рда ка́мене.
Припев: Пра́веден еси́, Го́споди, сла́ва Тебе́!
Ма́сло кра́вие, и млеко́ о́вчее, с ту́ком а́гнчим и о́вним, сыно́в ю́нчих, и ко́злих, с ту́ком пшени́чным, и кровь гро́здову пия́ху вино́.
Припев: Пра́веден еси́, Го́споди, сла́ва Тебе́!
И яде́ Иа́ков, и насы́тися, и отве́ржеся возлю́бленный.
Припев: Пра́веден еси́, Го́споди, сла́ва Тебе́!
Уты́, утолсте́, разшире́ и оста́ви Бо́га сотво́ршаго его́, и отступи́ от Бо́га Спа́са своего́.
Припев: Пра́веден еси́, Го́споди, сла́ва Тебе́!
Прогне́ваша Мя о чужи́х, и в ме́рзостех свои́х преогорчи́ша Мя.
Припев: Пра́веден еси́, Го́споди, сла́ва Тебе́!
Пожро́ша бесово́м, а не Бо́гу, бого́м, и́хже не ве́деша, но́ви и секра́ти приидо́ша, и́хже не ве́деша отцы́ их.
Припев: Пра́веден еси́, Го́споди, сла́ва Тебе́!
Бо́га ро́ждшаго тя оста́вил еси́, и забы́л еси́ Бо́га пита́ющаго тя.
Припев: Пра́веден еси́, Го́споди, сла́ва Тебе́!
И ви́де Госпо́дь, и возревнова́, и раздражи́ся за гнев сыно́в их и дще́рей.
Припев: Пра́веден еси́, Го́споди, сла́ва Тебе́!
И рече́: отвращу́ лице́ Мое́ от них и покажу́, что бу́дет им напосле́док.
Припев: Пра́веден еси́, Го́споди, сла́ва Тебе́!
Я́ко род развраще́н есть, сы́нове и́мже несть ве́ры в них.
Припев: Пра́веден еси́, Го́споди, сла́ва Тебе́!
Ти́и раздражи́ша Мя не о Бо́зе, прогне́ваша Мя во и́долех свои́х.
Припев: Пра́веден еси́, Го́споди, сла́ва Тебе́!
И Аз раздражу́ я́ не о язы́це, о язы́це же неразу́мливе прогне́ваю я́.
Припев: Пра́веден еси́, Го́споди, сла́ва Тебе́!
Я́ко ого́нь возгори́тся от я́рости Моея́, разжже́тся до а́да преиспо́дняго.
Припев: Пра́веден еси́, Го́споди, сла́ва Тебе́!
Сне́ст зе́млю и жи́та ея́, попали́т основа́ния гор.
Припев: Пра́веден еси́, Го́споди, сла́ва Тебе́!
Соберу́ на них зла́я, и стре́лы Моя сконча́ю в них.
Припев: Пра́веден еси́, Го́споди, сла́ва Тебе́!
Та́юще гла́дом, и снедь птиц, и горб неисце́лен.
Припев: Пра́веден еси́, Го́споди, сла́ва Тебе́!
Зу́бы звере́й послю́ в ня́, с я́ростию пресмыка́ющихся по земли́.
Припев: Пра́веден еси́, Го́споди, сла́ва Тебе́!
Отвне́ безча́дит я́ меч, и от храмо́в их страх: ю́ноша с де́вою, ссу́щее с соверше́нным ста́рцем.
Припев: Пра́веден еси́, Го́споди, сла́ва Тебе́!
Рех: разсе́ю я́, уста́влю же от челове́к па́мять их.
Припев: Пра́веден еси́, Го́споди, сла́ва Тебе́!
А́ще не за гнев враго́в, да не долголе́тствуют, и да не наля́гут супоста́ти.
Припев: Пра́веден еси́, Го́споди, сла́ва Тебе́!
Да не реку́т: рука́ на́ша высока́, и не Госпо́дь сотвори́ сия́ вся.
Припев: Пра́веден еси́, Го́споди, сла́ва Тебе́!
Я́ко язы́к погуби́вый сове́т есть, и несть в них худо́жества.
Припев: Пра́веден еси́, Го́споди, сла́ва Тебе́!
Не смы́слиша разуме́ти сия́ вся, да прии́мут во гряду́щее ле́то.
Припев: Пра́веден еси́, Го́споди, сла́ва Тебе́!
Ка́ко поже́нет еди́н ты́сящи, и два дви́гнета тьмы.
Припев: Пра́веден еси́, Го́споди, сла́ва Тебе́!
А́ще не Бог отда́ст я́, и Госпо́дь преда́ст я́?
Припев: Пра́веден еси́, Го́споди, сла́ва Тебе́!
Не суть бо бо́зи их, я́ко Бог наш: врази́ же на́ши неразу́мливи.
Припев: Пра́веден еси́, Го́споди, сла́ва Тебе́!
От виногра́дов бо содо́мских виногра́д их, и розга́ их от Гомо́рры.
Припев: Пра́веден еси́, Го́споди, сла́ва Тебе́!
Грозд их, грозд же́лчи, грозд го́рести их.
Припев: Пра́веден еси́, Го́споди, сла́ва Тебе́!
Я́рость змие́в вино́ их и я́рость а́спидов неисце́льна.
Припев: Пра́веден еси́, Го́споди, сла́ва Тебе́!
Не сия́ ли вся собра́шася у Мене́ и запечатле́шася в сокро́вищах Мои́х?
Припев: Пра́веден еси́, Го́споди, сла́ва Тебе́!
В день отмще́ния возда́м,
Припев: Пра́веден еси́, Го́споди, сла́ва Тебе́!
Во вре́мя внегда́ соблазни́тся нога́ их.
Припев: Пра́веден еси́, Го́споди, сла́ва Тебе́!
Я́ко близ день поги́бели их, и предстоя́т гото́вая вам.
Припев: Пра́веден еси́, Го́споди, сла́ва Тебе́!
Я́ко су́дит Госпо́дь лю́дем Свои́м, и о рабе́х Своих умоле́н бу́дет.
Припев: Пра́веден еси́, Го́споди, сла́ва Тебе́!
Ви́де бо я́ разсла́блены и иста́явша во вре́мя, и изнемо́гша.
Припев: Пра́веден еси́, Го́споди, сла́ва Тебе́!
И рече́ Госпо́дь: где суть бо́зи их, и́хже упова́ша на ня, и́хже тук жертв их ядя́сте, и пия́сте вино́ треб их;
Припев: Пра́веден еси́, Го́споди, сла́ва Тебе́!
Да воскре́снут и помо́гут вам, и бу́дут вам покрови́тели.
Припев: Пра́веден еси́, Го́споди, сла́ва Тебе́!
Ви́дите, ви́дите, я́ко Аз есмь, и не́сть бог ра́зве Мене́.
Припев: Пра́веден еси́, Го́споди, сла́ва Тебе́!
Аз убию́ и жи́ти сотворю́, поражу́ и Аз исцелю́, и несть, и́же и́змет от руку́ Мое́ю.
Припев: Пра́веден еси́, Го́споди, сла́ва Тебе́!
Я́ко воздви́гну на не́бо ру́ку Мою, и клену́ся десни́цею Мое́ю, и реку́: живу́ Аз во ве́ки.
Припев: Пра́веден еси́, Го́споди, сла́ва Тебе́!
Я́ко поострю́, я́ко мо́лнию, меч Мой, и прии́мет суд рука́ Моя́.
Припев: Пра́веден еси́, Го́споди, сла́ва Тебе́!
И возда́м месть враго́м, и ненави́дящим Мя возда́м.
Припев: Пра́веден еси́, Го́споди, сла́ва Тебе́!
Упою́ стре́лы Моя́ от кро́ве, и меч Мой снест мяса́.
Припев: Пра́веден еси́, Го́споди, сла́ва Тебе́!
От кро́ве я́звенных, и плене́ния, от глав князе́й язы́ческих.
Припев: Пра́веден еси́, Го́споди, сла́ва Тебе́!
На 6: Возвесели́теся небеса́ ку́пно с Ним, и да покло́нятся Ему вси А́нгели Бо́жии.
Припев: Пра́веден еси́, Го́споди, сла́ва Тебе́!
Возвесели́теся язы́цы с людьми́ Его́, и да укрепя́тся Ему́ вси сы́нове Бо́жии.
Припев: Пра́веден еси́, Го́споди, сла́ва Тебе́!
На 4: Я́ко кровь сыно́в Свои́х отмща́ет и отмсти́т, и возда́ст месть враго́м, и ненави́дящим Его́ возда́ст.
Припев: Пра́веден еси́, Го́споди, сла́ва Тебе́!
И очи́стит Госпо́дь зе́млю люде́й Свои́х.
Припев: Пра́веден еси́, Го́споди, сла́ва Тебе́!
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Песнь 8
Благослови́те вся дела́ Госпо́дня, Го́спода, по́йте и превозноси́те Его во ве́ки.
Припев: Го́спода по́йте, дела́, и превозноси́те Его́ во ве́ки.
Благослови́те А́нгели Госпо́дни, небеса́ Госпо́дня, Го́спода, по́йте и превозноси́те Его́ во ве́ки.
Припев: Го́спода по́йте, дела́, и превозноси́те Его́ во ве́ки.
Благослови́те во́ды вся, я́же превыше небе́с, вся си́лы Госпо́дни, Го́спода, по́йте и превозносите Его́ во ве́ки.
Припев: Го́спода по́йте, дела́, и превозноси́те Его́ во ве́ки.
Благослови́те со́лнце и ме́сяц, зве́зды небе́сныя, Го́спода, по́йте и превозноси́те Его́ во ве́ки.
Припев: Го́спода по́йте, дела́, и превозноси́те Его́ во ве́ки.
Благослови́те всяк дождь и роса́, вси ду́си, Го́спода, по́йте и превозноси́те Его́ во ве́ки.
Припев: Го́спода по́йте, дела́, и превозноси́те Его́ во ве́ки.
На 14: Благослови́те огнь и вар, студ и зной, Го́спода, по́йте и превозноси́те Его́ во ве́ки.
Припев: Го́спода по́йте, дела́, и превозноси́те Его́ во ве́ки.
Стих: Благослови́те ро́сы и и́ней, ле́д и мраз, Го́спода, по́йте и превозноси́те Его́ во ве́ки.
Припев: Го́спода по́йте, дела́, и превозноси́те Его́ во ве́ки.
На 12: Благослови́те сла́ны и сне́зи, но́щи и дни́е, Го́спода, по́йте и превозноси́те Его во ве́ки.
Припев: Го́спода по́йте, дела́, и превозноси́те Его́ во ве́ки.
Благослови́те свет и тьма, мо́лния и о́блацы, Го́спода, по́йте и превозноси́те Его́ во ве́ки.
Припев: Го́спода по́йте, дела́, и превозноси́те Его́ во ве́ки.
На 10: Благослови́те земля́, го́ры и хо́лми и вся, прозяба́ющая на ней, Го́спода, по́йте и превозноси́те Его́ во ве́ки.
Припев: Го́спода по́йте, дела́, и превозноси́те Его́ во ве́ки.
Благослови́те исто́чницы, моря́ и ре́ки, ки́ти и вся, дви́жущаяся в вода́х, Го́спода, по́йте и превозноси́те Его во ве́ки.
Припев: Го́спода по́йте, дела́, и превозноси́те Его́ во ве́ки.
На 8: Благослови́те вся пти́цы небе́сныя, зве́рие и вси ско́ти, Го́спода, по́йте и превозноси́те Его во ве́ки.
Припев: Го́спода по́йте, дела́, и превозноси́те Его́ во ве́ки.
Благослови́те сы́нове челове́честии, да благослови́т Израиль, Го́спода, по́йте и превозносите Его́ во ве́ки.
Припев: Го́спода по́йте, дела́, и превозноси́те Его́ во ве́ки.
На 6: Благослови́те свяще́нницы Госпо́дни, раби́ Госпо́дни, Го́спода, по́йте и превозноси́те Его́ во ве́ки.
Припев: Го́спода по́йте, дела́, и превозноси́те Его́ во ве́ки.
Благослови́те ду́си и ду́ши пра́ведных, преподо́бнии и смире́ннии се́рдцем, Го́спода, по́йте и превозноси́те Его́ во ве́ки.
Припев: Го́спода по́йте, дела́, и превозноси́те Его́ во ве́ки.
На 4: Благослови́те Ана́ния, Аза́рия, Мисаи́л, Го́спода, по́йте и превозноси́те Его́ во ве́ки.
Ирмо́с, глас 2: Веле́нию мучи́телеву преподо́бнии трие́ о́троцы не повину́вшеся, в пещь вве́ржени, Бо́га испове́даху пою́ще: Благослови́те дела́ Госпо́дня Го́спода.
Благослови́те апо́столи, проро́цы и му́ченицы Госпо́дни, Го́спода, по́йте и превозноси́те Его во ве́ки.
Ле́ность дале́че нас отве́ржим, и све́тлыми свеща́ми безсме́ртнаго Жениха́ Христа́, пе́нием усря́щим, благослови́те, вопию́ще, дела Госпо́дня Го́спода.
Благослови́м Отца́, и Сы́на, и Свята́го Ду́ха, Го́спода.
Да удовле́ет общи́тельный души́ нашея́ еле́й в сосу́дех, я́ко да не на ку́плю поло́жше вре́мя по́честей, пое́м: благослови́те дела Госпо́дня Го́спода.
И ны́не, и при́сно, и во ве́ки веко́в. Ами́нь.
Тала́нт ели́цы от Бо́га прия́сте, равноси́льную благода́ть, по́мощию да́вшаго Христа́ возрасти́те, пою́ще: благослови́те дела Госпо́дня Го́спода.
Песнь 9
Благослове́н Госпо́дь Бог Изра́илев, я́ко посети́ и сотвори́ избавле́ние лю́дем Свои́м.
Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.
На 12: И воздви́же рог спасе́ния нам, в дому́ Дави́дове о́трока Своего́.
Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.
Я́коже глаго́ла усты́ святы́х, су́щих от ве́ка проро́к Его́.
Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.
На 10: Спа́сение от враг на́ших и из руки́ всех ненави́дящих нас.
Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.
Сотвори́ти ми́лость со отцы́ на́шими и помяну́ти заве́т святы́й Свой.
Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.
На 8: Кля́тву, е́юже кля́тся ко Авраа́му, отцу́ на́шему, да́ти нам без стра́ха, из руки́ враг на́ших изба́вльшимся.
Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.
Служи́ти Ему́ преподо́бием и пра́вдою пред Ним вся дни живота́ на́шего.
Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.
На 6: И ты, отроча́, проро́к Вы́шняго нарече́шися, преды́деши бо пред лице́м Госпо́дним угото́вати пути́ Его́.
Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.
Да́ти ра́зум спасе́ния лю́дем Его́, во оставле́ние грех их, милосе́рдия ра́ди ми́лости Бо́га на́шего.
Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.
На 4: В ни́хже посети́ нас Восто́к с высоты́, яви́тися во тьме и се́ни сме́ртней седя́щим.
Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.
Напра́вити но́ги на́ша на путь ми́рен.
Ирмо́с: Невмести́маго Бо́га во чре́ве вмести́вшая, и Ра́дость ми́ру роди́вшая, Тя пое́м, Богоро́дице Де́во.
Сла́ва Отцу́, и Сы́ну, и Свято́му Ду́ху.
Ученико́м благи́й, бди́те, рекл еси́, во́ньже час прии́дет Госпо́дь, не разуме́ете, отда́ти кому́ждо.
И ны́не, и при́сно, и во ве́ки веко́в. Ами́нь.
Во второ́м Твое́м и Стра́шном прише́ствии, Влады́ко, десны́м овца́м мя сопричти́, прегреше́ний презре́в мои́х мно́жества.
Катава́сия: Невмести́маго Бо́га во чре́ве вмести́вшая, и Ра́дость ми́ру роди́вшая, Тя пое́м, Богоро́дице Де́во.
Моли́тва по оконча́нии Библе́йских пе́сней
Бо́же, Бо́же наш, у́мныя и слове́сныя соста́вивый си́лы Твое́ю во́лею! Молю́ Тя: приими́ мое́, по си́ле, славосло́вие, со все́ми созда́нии Твои́ми, и бога́тыми Твоея́ бла́гости возда́ждь дарова́ньми. Я́ко Тебе́ преклоня́ется вся́кое коле́но небе́сных, и земны́х, и преиспо́дних, и вся́кое дыха́ние и созда́ние пое́т непостижи́мую Твою́ сла́ву: Еди́н бо еси́ Бог, И́стинный и Многоми́лостивый.
Псало́м 148
Хвали́те Го́спода с небе́с, хвали́те Его́ в вы́шних. Хвали́те Его́, вси ангели Его́, хвали́те Его́, вся си́лы Его́. Хвали́те Его́, со́лнце и луна́, хвали́те Его́, вся зве́зды и свет. Хвали́те Его́, Небеса́ небе́с и вода́, я́же превы́ше небе́с. Да восхва́лят и́мя Госпо́дне: я́ко Той рече́ - и бы́ша, Той повеле́ - и созда́шася. Поста́ви я в век и в век ве́ка, повеле́ние положи́ - и не ми́мо и́дет. Хвали́те Го́спода от земли́: ца́рие зе́мстии и вси лю́дие, кня́зи и вси судии́ зе́мстии, ю́ноши и де́вы, ста́рцы с ю́нотами да восхва́лят и́мя Госпо́дне, я́ко вознесе́ся и́мя Того́ Еди́наго, испове́дание Его́ на земли́ и на небеси́.
Псало́м 149
Воспо́йте Го́сподеви песнь но́ву: хвале́ние Его в це́ркви преподо́бных. Восхва́лятся преподо́бнии во сла́ве и возра́дуются на ло́жах свои́х. Возноше́ния Бо́жия в горта́ни их, и мечи́ обою́ду остры́ в рука́х их, сотвори́ти отмще́ние во язы́цех, обличе́ния в лю́дех, связа́ти цари́ их пу́ты и сла́вныя их ручны́ми око́вы желе́зными, сотвори́ти в них суд напи́сан. Сла́ва сия́ бу́дет всем преподо́бным Его́.
Псало́м 150
Хвали́те Бо́га во святы́х Его́, хвали́те Его́ во утверже́нии си́лы Его́. Хвали́те Его́ на си́лах Его́, хвали́те Его́ по мно́жеству вели́чествия Его́. Хвали́те Его́ во гла́се тру́бнем, хвали́те Его́ во псалти́ри и гу́слех. Хвали́те Его́ в тимпа́не и ли́це, хвали́те Его́ во стру́нах и орга́не. Хвали́те Его́ в кимва́лех доброгла́сных, хвали́те Его́ в кимва́лех восклица́ния. Вся́кое дыха́ние да хва́лит Го́спода.
Славосло́вие у́треннее
Сла́ва в вы́шних Бо́гу, и на земли́ мир, в челове́цех благоволе́ние. Хвалю́ Тя, благословлю́ Тя, кла́няюся Тебе, славосло́влю Тя, благодарю́ Тя, вели́кия ра́ди сла́вы Твоея́. Го́споди Царю́ Небе́сный, Боже О́тче Вседержи́телю, Го́споди Сы́не Единоро́дный, Иису́се Христе́, и Святы́й Ду́ше! Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй мя. Взе́мляй грехи́ ми́ра, приими́ моли́тву мою́; Седя́й одесну́ю Отца́, поми́луй мя. Я́ко Ты еси́ Еди́н Свят, Ты еси́ Еди́н Госпо́дь, Иису́с Христо́с, во сла́ву Бо́га Отца́, ами́нь.
На всяк день благословлю́ Тя, и восхвалю́ и́мя Твое́ во ве́ки и в век ве́ка.
Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой. Я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.
Сподо́би, Го́споди, в день сей без греха́ сохрани́тися мне. Благослове́н еси́, Го́споди Бо́же оте́ц на́ших, и хва́льно, и просла́влено и́мя Твое́ во ве́ки, ами́нь.
Бу́ди, Го́споди, ми́лость Твоя́ на мя, я́коже упова́ю на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.
Го́споди, ми́лость Твоя́ во век, дел руку́ Твое́ю не пре́зри: Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет, Отцу́, и Сы́ну, и Свято́му Ду́ху, ны́не, и при́сно, и во ве́ки веко́в, ами́нь.
Моли́тва к А́нгелу Храни́телю
Святы́й А́нгеле, предстоя́й окая́нной мое́й души́ и стра́стной мое́й жи́зни! Не оста́ви мене́, гре́шнаго, ниже́ отступи́ от мене́ за невоздержа́ние мое́. Не даждь ме́ста лука́вому де́мону облада́ти мно́ю, наси́льством сме́ртнаго сего́ телесе́. Укрепи́ бе́дствующую и худу́ю мою́ ру́ку и на́стави мя на путь спасе́ния. Ей, святы́й А́нгеле Бо́жий, храни́телю и покрови́телю окая́нныя моея́ души́ и те́ла! Вся мне прости́, ели́кими тя оскорби́х во вся дни живота́ моего́, и а́ще что согреши́х в преше́дшую нощь сию́. Покры́й мя в настоя́щий день и сохрани́ мя от вся́каго искуше́ния проти́внаго, да ни в ко́ем гресе́ прогне́ваю Бо́га, и моли́ся за мя ко Го́споду: да утверди́т мя в стра́се Свое́м и досто́йна пока́жет мя раба́ Своея́ бла́гости. Ами́нь.
Моли́тва к свято́му, имя кото́рого но́сишь
Моли́ Бо́га о мне́, святы́й уго́дниче Бо́жий (имярек), я́ко аз усе́рдно к тебе́ прибега́ю, ско́рому помо́щнику и моли́твеннику о душе́ мое́й.
Помя́нник
Помяни́, Го́споди Иисусе Христе́, Бо́же на́ш, ми́лости и щедро́ты Твоя́, от ве́ка сущия, и́хже ра́ди и вочелове́чился еси́, и распя́тие, и сме́рть, спасе́ния ра́ди пра́во в Тя́ ве́рующих, претерпе́ти изво́лил еси́; и воскре́с из ме́ртвых, возне́слся еси́ на небеса́ и седи́ши одесную Бо́га Отца́, и призира́еши на смире́нныя мольбы́ все́м се́рдцем призыва́ющих Тя́. Приклони́ ухо Твое́ и услы́ши смире́нное моле́ние мене́, непотре́бнаго раба́ Твоего́, в воню́ благоуха́ния духо́внаго, Тебе́ за вся́ лю́ди Твоя́ принося́щаго.
И, в пе́рвых, помяни́ Це́рковь Твою́ Святую Собо́рную и Апо́стольскую, ю́же снабде́л еси́ Честно́ю Твое́ю Кро́вию, и утверди́, и укрепи́, и разшири́, умно́жи, умири́ и непреобори́му а́довыми враты́ во ве́ки сохрани́; раздира́ния Церкве́й утиши́, шата́ния язы́ческая угаси́, и ересе́й воста́ния ско́ро разори́ и искорени́, и в ничто́же си́лою Свята́го Твоего́ Духа обрати́. (Поклон)
Спаси́, Го́споди, и поми́луй богохрани́мую страну на́шу, вла́сти и во́инство ея́, да ти́хое и безмо́лвное житие́ поживе́м, во вся́ком благоче́стии и чистоте́. (Поклон)
Спаси́, Го́споди, и поми́луй Святе́йшаго Патриа́рха Кирилла, преосвяще́нныя митрополи́ты, архиепи́скопы и епи́скопы правосла́вныя, иере́и же и диа́коны, и ве́сь при́чет церко́вный, я́же поста́вил еси́ па́сти слове́сное Твое́ ста́до, и моли́твами и́х поми́луй и спаси́ мя́, гре́шнаго. (Поклон)
Спаси́, Го́споди, и поми́луй отца́ моего́ духо́внаго (имярек), и святы́ми его́ моли́твами прости́ моя́ согреше́ния. (Поклон)
Спаси́, Го́споди, и поми́луй роди́телей мои́х (имярек), бра́тию и сестры́, и сро́дники моя́ по пло́ти, и вся́ бли́жняя ро́да моего́, и дру́ги (имярек), и да́руй и́м ми́рная Твоя́ и преми́рная блага́я. (Поклон)
Спаси́, Го́споди, и поми́луй ста́рцы и ю́ныя, ни́щия и сироты́, и вдови́цы, и сущия в боле́зни и в печа́лех, беда́х же и ско́рбех, обстоя́ниих и плене́ниих, темни́цах же и заточе́ниих, изря́днее же - в гоне́ниих, Тебе́ ра́ди и ве́ры правосла́вныя, от язы́к безбо́жных, от отступник и от еретико́в сущия рабы́ Твоя́, и помяни́ их, посети́, укрепи́, уте́ши и вско́ре, си́лою Твое́ю, осла́бу, свобо́ду и изба́ву и́м пода́ждь. (Поклон)
Спаси́, Го́споди, и поми́луй по́сланныя в службу, путеше́ствующия и вся́ правосла́вныя христиа́ны. (Поклон)
Спаси́, Го́споди, и поми́луй, и́хже а́з безумием мои́м соблазни́х и от пути́ спаси́тельнаго отврати́х, к де́лом злы́м и неподо́бным приведо́х; Боже́ственным Твои́м Про́мыслом к пути́ спасе́ния па́ки возврати́. (Поклон)
Отступи́вшия от правосла́вныя ве́ры и поги́бельными ересьми́ ослепле́нныя, све́том Твоего́ позна́ния просвети́ и Святе́й Твое́й Апо́стольстей Собо́рней Це́ркви причти́. (Поклон)
Здесь вы можете добавить сугубые молитвы на потребу своей души
Досто́йно есть я́ко вои́стину блажи́ти Тя, Богоро́дицу, Присноблаже́нную и Пренепоро́чную, и Ма́терь Бо́га на́шего. Честне́йшую херуви́м и сла́внейшую без сравне́ния серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Го́споди, поми́луй. (3 раза)
Го́споди Иису́се Христе́, Сы́не Бо́жий, моли́твами Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, поми́луй и спаси́ мя, я́ко Благ и Человеколю́бец. Ами́нь.