Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.
Сла́ва Тебе́, Бо́же наш, сла́ва Тебе́!
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. (3 раза)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй. (3 раза) Сла́ва, и ны́не:
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго. Я́ко Твое́ есть Ца́рство, и си́ла, и сла́ва, ны́не и при́сно, и во ве́ки веко́в. Аминь.
Го́споди, поми́луй. (12 раз)
Сла́ва в вы́шних Бо́гу, и на земли́ мир, в челове́цех благоволе́ние.
Го́споди, устне́ мои отве́рзеши, и уста́ моя́ возвестя́т хвалу́ Твою́.
Псало́м 62
Бо́же, Бо́же мой! К Тебе́ у́тренюю; возжада́ Тебе́ душа́ моя́, коль мно́жицею Тебе́ плоть моя́ в земли́ пу́сте, и непрохо́дне, и безво́дне! Та́ко во святе́м яви́хся Тебе́, ви́дети си́лу Твою́ и сла́ву Твою́: я́ко лу́чше ми́лость Твоя́ па́че живо́т. Устне́ мои́ похвали́те Тя; та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти, да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя: я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.
Псало́м 117
Испове́дайтеся Го́сподеви, я́ко Благ, я́ко в век ми́лость Его́. Бла́го есть наде́ятися на Го́спода, не́жели наде́ятися на челове́ка. Вси язы́цы обыдо́ша мя, и и́менем Госпо́дним противля́хся им. Не умру́, но жив бу́ду и пове́м дела́ Госпо́дня. Ка́мень, его́же небрего́ша зи́ждущии, - сей бысть во главу́ у́гла: от Го́спода бысть сей, и есть ди́вен во очесе́х на́ших. Испове́дайтеся Го́сподеви, я́ко Благ, я́ко в век ми́лость Его. Благослове́н Гряды́й во и́мя Госпо́дне. Бог – Госпо́дь, и яви́ся нам.
Аллилу́иа, аллилу́иа, аллилу́иа, сла́ва Тебе́, Бо́же. (3 раза)
Благообра́зный Иосиф, с дре́ва снем Пречи́стое Те́ло Твое́, Плащани́цею чи́стою обви́в, и воня́ми во гробе но́ве покры́в положи́.
Сла́ва: Егда́ снизше́л еси́ к сме́рти, Животе́ Безсме́ртный, тогда́ ад умертви́л еси́ блиста́нием Бо́жества. Егда́ же и уме́ршыя от преиспо́дних воскреси́л еси́, вся Си́лы Небе́сныя взыва́ху: Жизнода́вче Христе́ Бо́же наш, сла́ва Тебе́.
И ны́не: Мироно́сицам же́нам, при гро́бе предста́в А́нгел вопия́ше: ми́ра ме́ртвым суть прили́чна, Христо́с же истле́ния яви́ся чуждь.
Моли́тва
Бо́же, научи́ нас, пра́вде Твое́й, за́поведем Твои́м и оправда́нием Твои́м. Просвети́ о́чи мы́слей на́ших, да не когда́ у́снем во гресе́х в сме́рть. Отжени́ вся́кий мра́к от серде́ц на́ших. Да́руй нам со́лнце пра́вды, и ненаве́тну жизнь на́шу соблюди́ печа́тию Свята́го Твоего́ Ду́ха. Ами́нь.
Статия́ пе́рвая
Благослове́н еси́, Го́споди, научи́ мя оправда́нием Твои́м.
- Блаже́ни непоро́чнии в путь, ходя́щии в зако́не Госпо́дни.
Жизнь во гро́бе положи́лся еси́, Христе́, и а́нгельская во́инства ужаса́хуся, снизхожде́ние сла́вяще Твое́.
- Блаже́ни испыта́ющии свиде́ния Его́, всем се́рдцем взы́щут Его́.
Жизнь, ка́ко умира́еши? Ка́ко и во гро́бе обита́еши? Сме́рти же Ца́рство разруша́еши, и от ада ме́ртвыя возста́вляеши?
- Не де́лающии бо беззако́ния, в путе́х Его́ ходи́ша.
Велича́ем Тя, Иису́се Царю́, и чтем погребе́ние и страда́ния Твоя́, и́миже спасл еси́ нас от истле́ния.
- Ты запове́дал еси́ за́поведи Твоя́ сохрани́ти зело́.
Ме́ры земли́ положи́вый, в ма́лом обита́еши, Иису́се Всецарю́, гро́бе днесь, от гробо́в ме́ртвыя возста́вляяй.
- Дабы испра́вилися путие́ мой, сохрани́ти оправда́ния Твоя́.
Иису́се, Христе́ мой, Царю́ всех, что́ ища́ к су́щим во а́де пришел еси? Или́ род свободи́ти челове́ческий?
- Тогда́ не постыжуся, внегда́ призре́ти ми на вся за́поведи Твоя́.
Влады́ка всех зри́тся мертв, и во гро́бе но́ве полага́ется истощи́вый гро́бы ме́ртвых.
- Испове́мся Тебе́ в пра́вости се́рдца, внегда́ научи́ти ми ся судьбам пра́вды Твоея́.
Жизнь во гро́бе положе́н был еси́, Христе́, и сме́ртию Твое́ю смерть погуби́л еси, и источи́л еси́ ми́рови жизнь.
- Оправда́ния Твоя́ сохраню́, не оста́ви мене́ до зела.
Со злоде́и я́ко злоде́й, Христе́, вмене́н был еси́, оправда́л нас всех от злоде́йства дре́вняго запина́теля.
- В чесо́м испра́вит юне́йший путь свой? Внегда сохрани́ти словеса́ Твоя́.
Кра́сный добро́тою па́че всех челове́к, я́ко беззра́чен мертв явля́ется, естество́ украси́вый всех.
- Всем се́рдцем мои́м взыска́х Тебе́, не отри́ни мене́ от за́поведей Твои́х.
Ад ка́ко стерпи́т, Спа́се, прише́ствие Твое́, а не па́че сокруши́тся омрача́емь, блиста́ния све́та Твоего́ луча́ми ослепле́н?
- В се́рдце мое́м скрых словеса́ Твоя́, я́ко да не согрешу́ Тебе́.
Иису́се, сла́дкий мой и спаси́тельный Све́те, ка́ко во гро́бе те́мнем скры́лся еси́? О несказа́ннаго и неизрече́ннаго терпе́ния!
- Благослове́н еси́, Го́споди, научи́ мя оправда́нием Твои́м.
Недоумева́ет и естество́ у́мное, и мно́жество безпло́тное, Христе́, о та́инстве несказа́ннаго и неизрече́ннаго Твоего́ погребе́ния.
- Устна́ма мои́ма возвести́х вся судьбы́ уст Твои́х.
О чуде́с стра́нных! О веще́й но́вых! Дыха́ния моего́ Пода́тель бездыха́нен но́сится, погреба́емь рука́ми Ио́сифовыма.
- На пути́ свиде́ний Твои́х наслади́хся, я́ко о вся́ком богатстве.
И во гроб заше́л еси́, Христе́, и недр Оте́ческих ника́коже отлучи́лся еси́: сие́ есть и стра́нно и пресла́вно вку́пе.
- В за́поведех Твои́х поглумлю́ся, и уразуме́ю пути́ Твоя́.
И́стинный небе́се и земли́ Царь, а́ще и во гро́бе мале́йшем заключе́н был еси́, позна́лся еси всей тва́ри, Иису́се.
- Во оправда́ниих Твои́х поучу́ся, не забу́ду слове́с Твои́х.
Тебе́ положе́ну во гро́бе, Созда́телю Христе́, а́дова основа́ния подвиго́шася, и гро́би челове́ков отверзо́шася.
- Возда́ждь рабу́ Твоему́, живи́ мя, и сохраню́ словеса́ Твоя́.
Зе́млю содержа́й го́рстию, умерщвле́н пло́тию, под земле́ю ны́не заключа́ется, ме́ртвыя избавля́я от а́дова заключе́ния.
- Открый о́чи мои́, и уразуме́ю чудеса́ от зако́на Твоего́.
Из истле́ния возше́л еси́, Жизнь, Спа́се мой, уме́рый и к ме́ртвым прише́дый, и сломи́вый а́довы закле́пы.
- Пришле́ц аз есмь на земли́, не скрый от Мене́ за́поведи Твоя́.
Я́коже све́та свети́льник, ны́не плоть Бо́жия под зе́млю я́ко под спуд кры́ется и отгоня́ет су́щую во а́де тьму.
- Возлюби́ душа́ моя́ возжелати судьбы Твоя́ на вся́кое вре́мя.
Невеще́ственных во́инств мно́жество стека́ется со Ио́сифом и Никоди́мом погребсти́ во гро́бе ма́ле Тя, Невмести́маго.
- Запрети́л еси́ го́рдым, про́кляти уклоня́ющийся от за́поведей Твои́х.
Умерщвле́н во́лею и положе́н под земле́ю, жи́зни исто́чниче, Иису́се мой, оживи́л еси́ мя умерщвле́на преступле́нием го́рьким.
- Отыми́ от мене́ поноше́ние и уничиже́ние, я́ко свиде́ний Твои́х взыска́х.
Изменя́шеся вся тварь стра́стию Твое́ю: вся бо Тебе́, Сло́ве, сострада́ху, ве́дуща Тя Содержи́теля всех.
- Ибо седо́ша кня́зи и на мя клевета́ху: раб же Твой глумля́шеся во оправда́ниих Твои́х.
Жи́зни ка́мень во чре́во прие́м, ад всея́дец изве́рже ме́ртвыя, я́же от ве́ка поглоти́.
- Ибо свиде́ния Твоя́ поуче́ние мое́ есть, и сове́ти мои́ оправда́ния Твоя.
Во гро́бе но́ве положи́лся еси́, Христе́, и естество́ челове́ческое обнови́л еси́, воскре́с боголе́пно из ме́ртвых.
- Прильпе́ земли́ душа́ моя́: живи́ мя по словеси́ Твоему́.
На зе́млю сшел еси́, да спасе́ши Ада́ма: и на земли́ не обре́т сего́, Влады́ко, да́же до а́да снизше́л еси́ ища́.
- Пути́ моя́возвести́х, и услы́шал мя еси́, научи́ мя оправда́нием Твои́м.
Сотряса́ется стра́хом, Сло́ве, вся земля́, и носи́ло све́та лучи́ скры, велича́йшему Твоему́ Све́ту сокрове́ну бы́вшу в земли́.
- Путь оправда́ний Твои́х вразуми́ ми, и поглумлю́ся в чудесе́х Твои́х.
Я́ко челове́к у́бо умира́еши во́лею, Спа́се, я́ко Бог же сме́ртныя возста́вил еси́ от гробо́в и глубины́ грехо́вныя.
- Воздрема́ душа́ моя́ от уны́ния: утверди́ мя в словесе́х Твои́х.
Слезото́чная рыда́ния на Тебе́ ма́терски, о Иису́се, накрапля́ющи, Чи́стая вопия́ше: ка́ко погребу́ Тя, Сы́не?
- Путь непра́вды отста́ви от мене́ и зако́ном Твои́м поми́луй мя.
Я́коже пшени́чное зерно́, заше́д в не́дра земна́я, изоби́льный возда́л еси́ клас, возста́вив челове́ки, су́щия от Ада́ма.
- Путь и́стины изво́лих и судьбы́ Твоя́ не забы́х.
Под зе́млю скры́лся еси́, я́коже со́лнце ны́не, и но́щию сме́рти покрове́н был еси́: но возсия́й светле́йше, Спа́се.
- Прилепи́хся свиде́нием Твои́м, Го́споди, не посрами́ мене́.
Я́коже со́лнечный круг луна́ сокрыва́ет, и Тебе́, Спа́се, ны́не гроб скры́, сконча́вшагося сме́ртию пло́тски.
- Путь за́поведей Твои́х теко́х, егда́ разшири́л еси́ се́рдце мое́.
Жизнь сме́рти вкуси́вшая Хри́стос, от сме́рти сме́ртныя свободи́ и всем ны́не да́рует жизнь.
- Законоположи́ мне, Го́споди, путь оправда́ний Твои́х и взыщу́ и́ вы́ну.
Умерщвле́на дре́вле зави́стно Ада́ма, возво́диши к жи́зни умерщвле́нием Твои́м, Спа́се, во пло́ти яви́вся Но́вый Ада́м.
- Вразуми́ мя, и испыта́ю зако́н Твой, и сохраню́ и́ всем се́рдцем мои́м.
Невеще́ственнии чи́ни, просте́рта ме́ртва Тя зря́ще нас ра́ди, ужаса́хуся, покрыва́ющеся крилы́, Спа́се.
- Наста́ви мя на стезю́ за́поведей Твои́х, я́ко ту́ю восхоте́х.
Снем Тя, Сло́ве, от дре́ва ме́ртва, во гро́бе Ио́сиф ны́не положи́: но воста́ни, спаса́я вся, я́ко Бог.
- Приклони́ се́рдце мое́ во свиде́ния Твоя́, а не в лихои́мство.
А́нгелом ра́дость быв, Спа́се, ны́не и печа́ли сим был еси́ вино́вен, ви́димь пло́тию бездыха́нен мертв.
- Отврати́ о́чи мои́, е́же не ви́дети суеты́: в пути́ Твое́м живи́ мя.
Вознесе́н на дре́во, и живу́щия челове́ки совозно́сиши: под земле́ю же быв, лежа́щия под не́ю воскреша́еши.
- Поста́ви рабу́ Твоему́ сло́во Твое́ в страх Твой.
Я́коже лев усну́в пло́тию, Спа́се, я́ко не́кий ски́мен млад возстае́ши, отложи́в ста́рость плотску́ю.
- Отыми́ поноше́ние мое́, е́же непщева́х: я́ко судьбы́ Твоя́ бла́ги.
В ре́бра прободе́н был еси́, ребро́ взе́мый Ада́мле, от него́же Е́ву созда́л еси́, и источи́л еси́ то́ки чисти́тельныя.
- Се возжела́х за́поведи Твоя́: в пра́вде Твое́й живи́ мя.
Та́йно у́бо дре́вле закала́ется а́гнец: Ты же, я́ве закла́н быв, Незло́биве, всю тварь очи́стил еси́, Спа́се.
- И да прии́дет на мя ми́лость твоя́, Го́споди, спасе́ние Твое́ по словеси́ Твоему́.
Кто изрече́т о́браз стра́шный вои́стинну но́вый? Влады́чествуяй бо тва́рию днесь страсть прие́млет и умира́ет нас ра́ди.
- И отвеща́ю поноша́ющым ми сло́во: я́ко упова́х на словеса́ Твоя́.
Жи́зни Храни́тель ка́ко зри́тся мертв? Ужаса́ющеся А́нгели взыва́ху: ка́ко же во гро́бе заключа́ется Бог?
- И не отыми́ от уст мои́х словесе́ и́стинна до зела, я́ко на судьбы́ Твоя́ упова́х.
Из ребра́ Твоего́, копие́м прободе́ннаго, Спа́се, жизнь иска́паеши жи́зни (Е́ве), от жи́зни изгна́вшей мя, живи́ши мя с не́ю.
- И сохраню́ зако́н Твой вы́ну, в век и в век ве́ка.
Распросте́рт на дре́ве, собра́л еси челове́ки: в ре́бра же Твоя́ живото́чная прободе́н, всем оставле́ние источа́еши, Иису́се.
- И хожда́х в широте́, я́ко за́поведи Твоя́ взыска́х.
Благообра́зный, Спа́се, образу́ет стра́шно и погреба́ет Тя я́ко ме́ртва благообра́зно, и ужаса́ется Твоего́ о́браза стра́шнаго.
- И глаго́лах о свиде́ниих Твои́х пред цари́ и не стыдя́хся.
Под зе́млю хоте́нием низше́д я́ко сме́ртен, возво́диши от земли́ к небе́сным отту́ду низпа́дшия, Иису́се.
- И поуча́хся в за́поведех Твои́х, я́же возлюби́х зело́.
А́ще и мертв ви́ден был еси́, но живы́й я́ко Бог, возво́диши от земли́ к небе́сным отту́ду низпа́дшия, Иису́се.
- И воздвиго́х ру́це мои́ к за́поведем Твои́м, я́же возлюби́х.
А́ще и мертв ви́ден был еси́, но, живы́й я́ко Бог, умерщвле́нныя челове́ки оживи́л еси́, моего́ умертви́в умертви́теля.
И глумля́хся во оправда́ниих Твои́х.
О ра́дости о́ныя! О мно́гия сла́дости! Ея́же су́щих во а́де напо́лнил еси́, во глубинах мра́чных Свет возсия́в.
- Помяни́ словеса Твоя́ рабу Твоему́, и́хже упова́ние дал ми еси́.
Покланя́юся стра́сти, воспева́ю погребе́ние, велича́ю Твою́ держа́ву, Человеколю́бче, и́миже свободи́хся от страсте́й тлетво́рных.
- То мя уте́ши во смире́нии мое́м, яко сло́во Твое́ живи́ мя.
На Тя меч обнажа́шеся, Христе́: и меч кре́пкаго у́бо притупля́ется, меч же еде́мский обраща́ется.
- Го́рдии законопреступова́ху до зела́: от зако́на же Твоего́ не уклони́хся.
А́гница, зря́щи А́гнца в заколе́нии острие́м пробода́ема, рыда́ше, сподвиза́ющи и ста́до вопи́ти.
- Помяну́х судьбы́ Твоя́ от ве́ка, Го́споди, и уте́шихся.
А́ще и во гро́бе погреба́ешися, а́ще и во ад и́деши, Спа́се, но и гро́бы истощи́л еси́, и ад обнажи́л еси́, Христе́.
- Печа́ль прия́т мя от гре́шник, оставля́ющих зако́н Твой.
Во́лею низше́д под зе́млю, Спа́се, умерщвле́нныя челове́ки оживи́л еси́ и возве́л еси́ во сла́ве О́тчей.
- Пе́та бя́ху мне оправда́ния Твоя́ на ме́сте прише́льствия моего́.
От Тро́ицы Еди́н поноси́тельную смерть во пло́ти нас ра́ди претерпе́: ужаса́ется со́лнце, и трепе́щет земля́.
- Помяну́х в нощи́ и́мя Твое́, Го́споди, и сохрани́х зако́н Твой.
Я́ко от исто́чника го́рькаго, от Иу́дова коле́на исча́дия в ро́ве положи́ша Пита́теля маннода́вца Иису́са.
- Сей бысть мне, я́ко оправда́ний Твои́х взыска́х.
Судия́ яко суди́мь пред Пила́том судие́ю и предста́, и на смерть непра́ведную на дре́ве кре́стнем осужде́н бысть.
- Часть моя́ еси́, Го́споди, рех сохрани́ти зако́н Твой.
Го́рдый Изра́илю, уби́йственнии лю́дие! Что пострада́вше, Вара́вву свободи́сте, Спа́са же преда́сте кресту́?
- Помоли́хся лицу́ Твоему́ всем се́рдцем мои́м, поми́луй мя по словеси́ Твоему́.
Руко́ю Твое́ю созда́вый Ада́ма от земли́, того́ради естество́м был еси́ Челове́к, и распя́лся еси́ во́лею Твое́ю.
- Помы́слих пути́ Твоя́, и возврати́х но́зе мои́ во свиде́ния Твоя́.
Послу́шав, Сло́ве, Отца́ Твоего́, да́же до а́да лю́таго соше́л еси́ и воскреси́л еси́ род челове́ческий.
- Угото́вихся и не смути́хся, сохрани́ти за́поведи Твоя́.
Увы́ Мне, Све́те ми́ра! Увы́ Мне, Све́те Мой, Иису́се Мой возжеле́нный! Вопия́ше Де́ва, рыда́ющи го́рько.
- У́жа гре́шник обяза́шеся мне, и зако́на Твоего́ не забы́х.
Зави́стливии, уби́йственнии и го́рдии людие! Поне́ плащани́цы и сударя́ самаго́ постыди́теся, воскре́сшу Христу́.
- Полу́нощи воста́х испове́датися Тебе́ о судьба́х пра́вды Твоея́.
Прииди́ у́бо, скве́рный уби́йце учениче́, и нрав зло́бы Твоея́ покажи́ ми, и́мже был еси́ преда́тель Христо́в.
- Прича́стник аз есмь всем боя́щимся Тебе́, и храня́щим за́поведи Твоя́.
Я́ко человеколюби́в не́кто притворя́ешися, бу́е и сле́пе, всегуби́тельнейше, неве́рне, Ми́ро прода́вый на цене́.
- Ми́лости Твоея́, Го́споди, испо́лнь земли́, оправда́нием Твои́м научи́ мя.
Небе́снаго Ми́ра ку́ю це́ну стяжа́л еси́? За Многоце́ннаго что прия́л еси́ равноце́нное? Неи́стовство обре́л еси́, прокля́тейший сатано́.
- Бла́гость сотвори́л еси́ с рабо́м Твои́м, Го́споди, по словеси́ Твоему́.
А́ще нищелю́бец еси и о ми́ре печа́луеши, истоща́емем во очище́ние души́, ка́ко за зла́то продае́ши Светоза́рнаго?
- Бла́гости, и наказа́нию и ра́зуму научи́ мя, я́ко за́поведем Твои́м ве́ровах.
О Бо́же и Сло́ве! О ра́дость Моя́! Ка́ко претерплю́ тридне́вное Твое́ погребе́ние? Ны́не терза́юся утро́бою ма́терски.
- Пре́жде да́же не смири́ти ми ся, аз прегреши́х: сего́ ра́ди сло́во Твое́ сохрани́х.
Кто даст Ми во́ду и слез исто́чники, да опла́чу Сла́дкаго Моего́ Иису́са? Богоневе́стная Де́ва взыва́ше.
- Благ еси́ Ты, Го́споди, и бла́гостию Твое́ю научи́ мя оправда́нием Твои́м.
О го́ры и хо́лми, и челове́ков мно́жества, воспла́читеся, и вся рыда́йте со Мно́ю, Бо́га на́шего Ма́терию!
- Умно́жися на мя непра́вда го́рдых, аз же всем се́рдцем мои́м испыта́ю за́поведи Твоя́.
Когда́ уви́жу Тя, Спа́се, безле́тнаго Све́та, ра́дость и сла́дость се́рдца Моего́? Де́ва го́рько вопия́ше.
- Усыри́ся, я́ко млеко́ се́рдце их, аз же зако́ну Твоему́ поучи́хся.
А́ще и я́ко ка́мень краесеко́мый, Спа́се, Ты прия́л еси́ сече́ние, но источи́л еси́ живу́ю струю́, я́ко Исто́чник Сый жи́зни.
- Бла́го мне, я́ко смири́л мя еси́, я́ко да научу́ся оправда́нием Твои́м.
Я́ко от исто́чника еди́наго, от ребра́ Твоего́, сугу́бую ре́ку излива́ющаго, напая́еми, безсме́ртную приобрета́ем жизнь.
- Благ мне зако́н уст Твои́х, па́че ты́сящ зла́та и сребра́.
Во́лею яви́лся еси́, Сло́ве, во гро́бе мертв: но живе́ши, и челове́ки Воскресе́нием Твои́м, Спа́се мой, воздви́гнеши, я́коже предре́кл еси́.
Сла́ва: Воспева́ем, Сло́ве, Тебе́ всех Бо́га со Отце́м и Святы́м Твои́м Ду́хом, и сла́вим Боже́ственное Твое́ погребе́ние.
И ны́не, Богоро́дичен: Ублажа́ем Тя, Богоро́дице Чи́стая, и почита́ем тридне́вное погребе́ние Сы́на Твоего́ и Бо́га на́шего ве́рно.
Го́споди, поми́луй. (3 раза)
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Моли́тва
Благи́х сокро́вище, исто́чниче приснотеку́щий, О́тче святы́й, чудотво́рче, всеси́льне и Вседержи́телю, вси Тебе́ покланя́емся и Тебе́ мо́лимся Твоя́ ми́лости, и Твоя́ щедро́ты призыва́юще на по́мощь и заступле́ние на́шего смире́ния. Помяни́, Го́споди, бдя́щия и пою́щия во сла́ву Твою́, и единоро́днаго Твоего́ Сы́на и Бо́га на́шего, и Свята́го Твоего́ Ду́ха. Аминь.
Статия́ втора́я
Глас 5. Досто́йно есть велича́ти Тя, Жизнода́вца, на Кресте́ ру́це просте́ршаго и сокруши́вшаго держа́ву вра́жию.
- Ру́це Твои́ сотвори́сте мя и созда́сте мя: вразуми́ мя, и научу́ся за́поведем Твои́м.
Досто́йно есть велича́ти Тя, всех Зижди́теля: Твои́ми бо страда́ньми и́мамы безстра́стие, изба́вльшеся от тле́ния.
- Боя́щиися Тебе́ у́зрят мя и возвеселя́тся, я́ко на словеса́ Твоя́ упова́х.
Ужасе́ся земля́, Спа́се, и со́лнце скры́ся, Тебе́, Невече́рнему Све́ту, Христе́, заше́дшу во гро́бе пло́тски.
- Разуме́х, Го́споди, я́ко пра́вда судьбы́ Твоя́, и вои́стинну смири́л мя еси́.
Усну́л еси́, Христе́, жизнопода́тельным сном во гро́бе и от тя́жкаго сна грехо́внаго воздви́гл еси́ род челове́ческий.
- Бу́ди же ми́лость Твоя́, да уте́шит мя, по словеси́ Твоему́ рабу́ Твоему́.
Еди́на от жен без боле́зней роди́х Тя, Ча́до, ны́не же терплю́ Стра́стию Твое́ю боле́зни нестерпи́мыя: глаго́лаше Чи́стая.
- Да прии́дут мне щедро́ты Твоя́, и жив бу́ду, я́ко зако́н Твой поуче́ние мое́ есть.
Горе́ Тя, Спа́се, неразлу́чно со Отце́м су́ща, до́лу же ме́ртва просте́рта на земли́ зря́ще, ужаса́ются Серафи́ми.
- Да постыдя́тся го́рдии, я́ко непра́ведно беззако́нноваша на мя: аз же поглумлю́ся в за́поведех Твои́х.
Раздира́ется церко́вная заве́са Твои́м распя́тием, Сло́ве: сокрыва́ют свети́ла свет, Тебе́, Со́лнцу, скры́вшуся под зе́млю.
- Да обратя́т мя боя́щиися Тебе́ и ве́дящии свиде́ния Твоя́.
Земли́ круг изнача́ла еди́нем ма́нием водрузи́вый бездыха́нен, я́ко челове́к за́йде под зе́млю: ужасни́ся виде́нием, не́бо.
- Бу́ди се́рдце мое́ непоро́чно во оправда́ниих Твои́х, я́ко да не постыжу́ся.
Заше́л еси́ под зе́млю, руко́ю Твое́ю созда́вый челове́ка, да воздви́гнеши от паде́ния собо́ры челове́ческия всеси́льною держа́вою.
- Исчеза́ет во спасе́ние Твое́ душа́ моя́, на словеса́ Твоя́ упова́х.
Плач свяще́нный, прииди́те, воспои́м Христу́ уме́ршему, я́ко дре́вле жены́ мироно́сицы, да и ра́дуйся услы́шим с ни́ми.
- Исчезо́ша о́чи мои́ в сло́во Твое́, глаго́люще: когда́ уте́шиши мя?
Ми́ро вои́стинну неистощи́мое еси́ Ты, Сло́ве: те́мже Ти и ми́ро приноша́ху, я́ко ме́ртву Живо́му, жены́ мироно́сицы.
- Зане́ бых я́ко мех на сла́не, оправда́ний Твои́х не забы́х.
Погребе́н у́бо, Христе́, а́дова ца́рствия сокруша́еши, сме́ртию же смерть умерщвля́еши и от тле́ния свобожда́еши земноро́дныя.
- Коли́ко есть дней раба́ Твоего́? Когда́ сотвори́ши ми от гоня́щих мя суд?
То́ки жи́зни пролива́ющая Бо́жия Прему́дрость, во гроб заше́дши, оживотворя́ет су́щия в непристу́пных а́довых ме́стех.
- Пове́даша мне законопресту́пницы глумле́ния, но не я́ко зако́н Твой, Го́споди.
Да обновлю́ челове́ческое сокруше́нное естество́, во́лею уя́звлен есть сме́ртию пло́тски: те́мже, Ма́ти Моя, не терза́йся рыда́ньми.
- Вся за́поведи Твоя́ и́стина: непра́ведно погна́ша мя, помози́ ми.
Заше́л еси́ под зе́млю, Свети́ло пра́вды, и ме́ртвыя я́коже от сна воздви́гл еси́, отгна́в вся́кую тьму, су́щую во а́де.
- Вма́ле не сконча́ша мене́ на земли́: аз же не оста́вих за́поведей Твои́х.
Зерно́ двоера́сленное жизнопода́тельное в не́дра земли́ се́ется со слеза́ми днесь: но, прозя́бнув, мир обра́дует.
- По ми́лости Твое́й живи́ мя, и сохраню́ свиде́ния уст Твои́х.
Убоя́ся Ада́м Бо́га ходя́ща в раи́, ра́дуется же во ад соше́дшу, пады́й пре́жде, и ны́не воздвиза́емь.
- Во век, Го́споди, сло́во Твое́ пребыва́ет на Небеси́.
Лие́т Тебе́возлия́ния сле́зная, пло́тию положе́ну во гро́бе, Ро́ждшая Тя, Христе́, вопию́щи: воста́ни, Ча́до, я́коже предре́кл еси́.
- В род и род и́стина Твоя́, основал еси́ зе́млю и пребыва́ет.
Во гро́бе но́ве благогове́йно Тя сокрыва́я, Ио́сиф пе́сни исхо́дныя боголе́пныя, смеше́нныя с рыда́ньми, пое́т Тебе́, Спа́се.
- Учине́нием Твои́м пребыва́ет день, я́ко вся́ческая рабо́тна Тебе́.
Гвоздьми́ Тя ко Кресту́ пригвожде́на узре́вши, Ма́ти Твоя́, Сло́ве, гвоздьми́ и стре́лами печа́ли го́рькия пронза́ется душе́ю.
- Я́ко а́ще бы не зако́н Твой поуче́ние мое́ был, тогда́ у́бо поги́бл бых во смире́нии мое́м.
Зря́щи Тя, всех сла́дость, питие́м напая́емаго го́рьким, Ма́ти слеза́ми лице́ ороша́ет го́рце.
- Во век не забу́ду оправда́ний Твои́х, я́ко в них оживи́л мя еси́.
Уязвля́юся лю́те и терза́юся утро́бою, Сло́ве, зря́щи непра́ведное Твое́ заколе́ние, глаго́лаше Пречи́стая с пла́чем.
- Твой есмь аз, спаси́ мя, я́ко оправда́ний Твои́х взыска́х.
О́ко сла́дкое и устне́ Твои́ ка́ко закры́ю, Сло́ве? Ка́ко же Тя а́ки мертвеца́ погребу́? Ужаса́яся , вопия́ше Ио́сиф.
- Мене́ жда́ша гре́шницы погуби́ти мя, свиде́ния Твоя́ разуме́х.
Пе́сни надгро́бныя Ио́сиф и Никоди́м пою́т Христу́ уме́ршему ны́не: пою́т же с ни́ми и Серафи́ми.
- Вся́кия кончи́ны ви́дех коне́ц, широка́ за́поведь Твоя́ зело́.
Захо́диши под зе́млю, Спа́се, Со́лнце пра́вды: те́мже Ро́ждшая Тя Луна́ от печа́лей затмева́ется, ви́да Твоего́ лиша́ема.
- Коль возлюби́х закон Твой, Го́споди! Весь день поуче́ние мое́ есть.
Ужасе́ся ад, Спа́се, зря Тя, Жизнода́вца, бога́тство о́наго расхища́юща и су́щия от ве́ка ме́ртвыя возставля́юща.
- Па́че враг мои́х уму́дри́л мя еси́ за́поведию Твое́ю, я́ко в век моя́ есть.
Со́лнце свет возсиява́ет по но́щи, Сло́ве: и Ты, воскре́с, просия́й по сме́рти я́сно, я́ко от черто́га.
- Па́че всех учащих мя разуме́х, я́ко свиде́ния Твоя́ поуче́ние мое́ есть.
Земля́ Тя, Созда́телю, в не́дра прие́мши, тре́петом содержи́ма, Спа́се, трясе́тся, возбуди́вши ме́ртвыя трясе́нием.
- Па́че старец разуме́х, я́ко за́поведи Твоя́ взысках.
Ми́ром Тя, Христе́, ны́не новоле́пно пома́завше, Никоди́м и Благообра́зный вопия́ху: ужасни́ся, вся земле́!
- От вся́каго пути́ лука́ва возбрани́х нога́м мои́м, я́ко да сохраню́ словеса́ Твоя́.
Заше́л еси́, Светотво́рче, и с Тобо́ю зайде свет со́лнца: тре́петом же тварь содержи́тся, Тя пропове́дающи всех Творца́.
- От суде́б Твои́х не уклони́хся, я́ко Ты законоположи́л ми еси́.
Ка́мень углажде́нный покрыва́ет краеуго́льный ка́мень: челове́к же сме́ртный, я́ко сме́ртна, Бо́га сокрыва́ет ны́не во гро́бе. Ужасни́ся, зе́мле!
- Коль сладка́ горта́ни моему́ словеса́ Твоя́! Па́че меда́ усто́м мои́м.
Виждь ученика́, его́же люби́л еси, и Твою́ Ма́терь, Ча́до, и веща́ние даждь сладча́йшее: взыва́ше, пла́чущи, Чи́стая.
- От за́поведей Твои́х разуме́х, сего́ ра́ди возненави́дех всяк Путь непра́вды.
Ты, Сло́ве, яко сый жи́зни Пода́тель, на Кресте́ простры́йся, иуде́ев не умертви́л еси́, но воскреси́л еси́ и сих ме́ртвыя.
- Свети́льник нога́ма мои́ма зако́н Твой, и свет стезя́м мои́м.
Добро́ты пре́жде не име́л еси, Сло́ве, ниже́ ви́да, егда страда́л еси́: но воскре́с превозсия́л еси́, украсив челове́ки Боже́ственными заря́ми.
- Кля́хся, и поста́вих, сохрани́ти судьбы́ пра́вды Твоея́.
Заше́л еси́ пло́тию в зе́млю, Невече́рняя Денни́це, и не терпя́ зре́ти со́лнце поме́рче полу́дни су́щу.
- Смири́хся до зела́, Го́споди, живи́ мя по словеси́ Твоему́.
Со́лнце и луна́ вку́пе поме́ркша, Спа́се, рабо́м благоразу́мным подража́ху, и́же в че́рныя оде́жды облача́ются.
- Во́льная уст мои́х благоволи́ же Го́споди, и судьба́м Твои́м научи́ мя.
Позна́ Тя Бо́га со́тник, а́ще и умертви́лся еси́: ка́ко у́бо Тя, Бо́же мой, осяжу́ рука́ма? Ужаса́яся, вопия́ше Ио́сиф.
- Душа́ моя́ в руку́ Твое́ю вы́ну, и зако́на Твоего́ не забы́х.
Усну́ Ада́м, но смерть из ребра́ изво́дит: Ты же, ны́не усну́в, Сло́ве Бо́жий, источа́еши от ребр Твои́х мiрови жизнь.
- Положи́ша гре́шницы сеть мне, и от за́поведей Твои́х не заблуди́х.
Усну́л еси́ ма́ло и оживи́л еси́ уме́ршия, и, воскре́с, воскреси́л еси́ спя́щия от ве́ка, Бла́же.
- Насле́довах свиде́ния Твоя́ во век, я́ко ра́дование се́рдца моего́ суть.
Взят еси́ от земли́, но источи́л еси́ спасе́ния вино́, живото́чная Лозо́: прославля́ю Страсть и Крест.
- Приклони́х се́рдце мое́, сотвори́ти оправда́ния Твоя́ в век за воздая́ние.
Ка́ко невеще́ственнии чинонача́льницы, зря́ще Тя, Спа́се, на́га, окрова́влена, осужде́на, терпя́ху де́рзость распина́телей?
- Законопресту́пныя возненави́дех, зако́н же Твой возлюби́х.
Лука́вый, стро́потнейший ро́де евре́йский! Ве́дал еси́ воздви́жение хра́ма: почто́ осуди́л еси́ Христа́?
- Помо́щник мой и Засту́пник мой еси́ Ты, на словеса́ Твоя́ упова́х.
Во оде́жду поруга́ния Украси́теля всех облека́еши, И́же не́бо озвезди́ и зе́млю украси́ чу́дно.
- Уклони́теся от мене́, лука́внующии, и испыта́ю за́поведи Бо́га моего́.
Я́коже пти́ца нея́сыть, уя́звлен в ре́бра Твоя́, Сло́ве, де́ти Твоя́ уме́ршия оживи́л еси́, иска́пав им животво́рныя то́ки.
- Заступи́ мя по словеси́ Твоему́, и жив бу́ду: и не посрами́ мене́ от ча́яния моего́.
Со́лнце дре́вле уста́ви Иису́с, иноплеме́нники секи́й: Ты же скры́лся еси́, низлага́я тьмы́ нача́льника.
- Помози́ ми, и спасу́ся, и поучу́ся во оправда́ниих Твои́х вы́ну.
От недр Оте́ческих неисхо́ден пребы́в, Ще́дре, и Челове́к бы́ти благоволи́л еси́, и во ад снизше́л еси́, Христе́.
- Уничижи́л еси́ вся отступа́ющыия от оправда́ний Твои́х: я́ко непра́ведно помышле́ние их.
Вознесе́н бысть распны́йся, зе́млю на вода́х пове́сивый, и я́ко бездыха́нен в ней ны́не возлега́ет: е́же не терпя́щи тряса́шеся лю́то.
- Преступа́ющия непщева́х вся гре́шныя земли́, сего́ ра́ди возлюби́х свиде́ния Твоя́.
Увы́ мне, о Сы́не! Неискусому́жная, рыда́ющи, глаго́лаше: на Него́же бо я́ко на Царя́ надея́хся, осужде́на зрю ны́не на Кресте́.
- Пригвозди́ стра́ху Твоему́ пло́ти моя́, от суде́б бо Твои́х убоя́хся.
Сия́ Гаврии́л Мне возвести́, егда́ слете́, и́же рече́ о Ца́рстве ве́чном Сы́на Моего́ Иису́са.
- Сотвори́х суд и пра́вду: не преда́ждь мене́ оби́дящым мя.
Увы́, Симео́ново соверши́ся проро́чество: Твой бо меч про́йде се́рдце Мое́, Емману́иле.
- Восприими́ раба́ Твоего́ во бла́го, да не оклевета́ют мене́ го́рдии.
Поне́ су́щих от ме́ртвых постыди́теся, о иуде́е! И́хже возста́ви Жизнода́вец, Его́же вы уби́сте зави́стно.
- Очи мои исчезо́сте во спасе́ние Твое́, и в сло́во пра́вды Твоея́.
Ужасе́ся со́лнце, ви́дев Тебе́, неви́димый Све́те, Христе́ мой, во гро́бе сокрыва́ема и бездыха́нна, и помрачи́ свой свет.
- Сотвори́ с рабо́м Твои́м по ми́лости Твое́й, и оправда́нием Твои́м научи́ мя.
Пла́каше го́рько Пренепоро́чная Ма́ти Твоя́, Сло́ве, егда́ во гро́бе ви́де Тебе́, Неизрече́ннаго и Безнача́льнаго Бо́га.
- Раб Твой есмь аз, вразуми́ мя, и уве́м свиде́ния Твоя́.
Ме́ртвость Твою́, Христе́, зря́щи, нетле́нная Ма́ти Твоя́ го́рько к Тебе́ веща́ше: не косни́, Жизнь, в ме́ртвых.
- Вре́мя сотвори́ти Го́сподеви: разори́ша зако́н Твой.
Ад лю́тый вострепета́, егда́ Тя ви́де, Со́лнце Сла́вы, Безсме́ртне, и издава́ше у́зники со тща́нием.
- Сего́ ра́ди возлюби́х за́поведи Твоя́, па́че зла́та и топа́зия.
Ве́лие и ужа́сное виде́ние ны́не зри́тся: жи́зни бо Вино́вник во́лею смерть подъя́т, оживи́ти хотя́ всех.
- Сего́ ра́ди ко всем за́поведем Твои́м направля́хся, всяк путь непра́вды возненави́дех.
Пробода́ешися в ре́бра и пригвожда́ешися в ру́це Ты, Влады́ка, я́зву от ребра́ и невоздержа́ние рук пра́отец исцеля́я.
- Ди́вна свиде́ния Твоя́, сего́ ра́ди испыта́ я душа́ моя́.
Пре́жде о Рахи́лине сы́не пла́кася всяк в дому́: ны́не о Сы́не Де́вы рыда́ша учени́к лик с Ма́терию.
- Явле́ние слове́с Твои́х просвеща́ет и вразумля́ет младе́нцы.
Ударе́ние рук да́ша по лани́те Христу́, руко́ю челове́ка созда́вшему и зу́бы зве́ря сокруши́вшему.
- Уста́ моя́ отверзо́х, и привлеко́х дух, я́ко за́поведей Твои́х желах.
Пе́сньми Твое́, Христе́, распя́тие и погребе́ние ны́не вси ве́рнии пра́зднуем, изба́вльшеся от сме́рти погребе́нием Твои́м.
Сла́ва, Тро́ичен: Безнача́льне Бо́же, Соприсносу́щне Сло́ве и Ду́ше Святы́й! Укрепи́ рог правосла́вных люде́й, я́ко Благ.
И ны́не, Богоро́дичен: Жизнь ро́ждшая, Пренепоро́чная Чи́стая Де́во, утоли́ церко́вныя собла́зны и пода́ждь мир, я́ко Блага́я.
Го́споди, поми́луй. (3 раза)
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Моли́тва
Благодари́м Тя́, Го́споди Бо́же спасе́ний на́ших, я́ко вся твори́ши во благоде́тельство жи́зни на́шея, да всегда́ к Тебе́ взира́ем Спа́су и благоде́телю душ на́ших. Те́мже мо́лим Тя, Го́споди, да́ждь нам благода́ть и си́лу, да сподо́бимся пе́ти Тебе́ разу́мно и моли́тися непреста́нно, во стра́се и тре́пете свое́ спасе́ние соде́ловающе заступле́нием Христа́ Твоего́. Аминь.
Статия́ тре́тия
Глас 3-й. Ро́ди вси песнь погребе́нию Твоему́ прино́сят, Христе́ мой.
- При́зри на мя и поми́луй мя, по суду лю́бящих и́мя Твое́.
Снем с дре́ва, плащани́цею обви́в, Аримафе́й во гро́бе Тя погреба́ет.
- Стопы́ моя́ напра́ви по словеси́ Твоему́, и да не облада́ет мно́ю вся́кое беззако́ние.
Мироно́сицы приидо́ша, ми́ра Тебе́, Христе́ мой, нося́щия прему́дро.
- Изба́ви мя от клеветы́ челове́ческия, и сохраню́ за́поведи Твоя́.
Гряди́, вся тварь, пе́сни исхо́дныя принесе́м Зижди́телю.
- Лице́ Твое́ просвети́ на раба́ Твоего́, и научи́ мя оправда́нием Твои́м.
Яко ме́ртва, Жива́го с мироно́сицами вси миропома́жем му́дренно.
- Исхо́дища водна́я изведо́сте о́чи мои́, поне́же не сохрани́х зако́на Твоего́.
Ио́сифе треблаже́нне, погреби́ те́ло Христа́ Жизнода́вца.
- Пра́веден еси́, Го́споди, и пра́ви суди́ Твои́.
И́хже напита́ ма́нною, ти́и подвиго́ша пяту́ на Благоде́теля.
- Запове́дал еси́ пра́вду, свиде́ния Твоя́, и и́стину зело.
И́хже напита́ ма́нною, ти́и прино́сят Спа́су желчь ку́пно и о́цет.
- Иста́яла мя есть ре́вность Твоя́, я́ко забы́ша словеса́ Твоя́ врази́ мои́.
О пребезу́мия и христоуби́йства пророкоуби́йц!
- Разжже́но сло́во Твое́ зело́, и раб Твой возлюби́ е́.
Я́коже безу́мный служи́тель, предаде́ учени́к бе́здну прему́дрости.
- Юне́йший аз есмь и уничиже́н, оправда́ний Твои́х не забых.
Изба́вителя прода́в, пле́нник яви́ся льсти́вый Иу́да.
- Пра́вда Твоя́ пра́вда во век, и зако́н Твой и́стина.
По Соломо́ну, ров глубо́кий уста́еврей беззако́нных.
- Ско́рби и ну́жди обрето́ша мя, за́поведи Твоя́ поуче́ние мое́.
В стро́потных ше́ствиих евре́й беззако́нных волчцы́ и се́ти.
- Пра́вда свиде́ния Твоя́ в век, вразуми́ мя, и жив бу́ду.
Ио́сиф погреба́ет с Никоди́мом, а́ки мертвеца́, Зижди́теля.
- Воззва́х всем се́рдцем мои́м, услы́ши мя, Го́споди, оправда́ния Твоя́ взыщу́.
Жизнода́вче Спа́се, сла́ва держа́ве Твое́й, ад разори́вшей.
- Воззва́х Ти, спаси́ мя, и сохраню́ свиде́ния Твоя́.
Лежа́ща Тя, Сло́ве, ви́дящи, Пречи́стая ма́терски пла́каше.
- Предвари́х в безго́дии, и воззва́х, на словеса́ Твоя́ упова́х.
О сла́дкая Моя́ весно́, Сладча́йшее Мое́ Ча́до! Где Твоя́ за́йде добро́та?
- Предвари́сте о́чи мои́ ко утру, поучи́тися словесе́м Твои́м.
Плач сподвиза́ше Всечис́тая Твоя́ Ма́ти Тебе́, Сло́ве, уме́ршу.
- Глас мой услы́ши, Го́споди, по ми́лости Твое́й, по судьбе́ Твое́й живи́ мя.
Жены́ с ми́ром приидо́ша пома́зати Христа́, Боже́ственнаго ми́ра.
- Прибли́жишася гоня́щии мя беззако́нием, от зако́на же Твоего́ удали́шася.
Смерть сме́ртию Ты умерщвля́еши, Бо́же мой, Боже́ственною си́лою Твое́ю.
- Близ еси́ Ты, Го́споди, и вси путие́ Твои́ и́стина.
Прельсти́ся преле́стник, прельсти́выйся же избавля́ется прему́дростию Твое́ю, Бо́же мой.
- Испе́рва позна́х от свиде́ний Твои́х, я́ко в век основа́л я́ еси́.
Во дно а́дово низведе́н бысть преда́тель, в кладене́ц истле́ния.
- Виждь смире́ние мое́, и изми́ мя: я́ко зако́на Твоего́ не забых.
Волчцы́ и се́ти путие́ треокая́ннаго безу́мнаго Иуды.
- Суди́ суд мой, и изба́ви мя, словесе́ ра́ди Твоего́ живи́ мя.
Вси поги́бнут вку́пе распина́телие Твои́, Сло́ве, Сы́не Бо́жий Всецарю́.
- Дале́че от гре́шник спасе́ние, я́ко оправда́ний Твои́х не взыскаша.
В кладенце́ истле́ния вси поги́бнут вку́пе му́жие крове́й.
- Щедро́ты Твоя́ мно́ги, Го́споди, по судьбе́ Твое́й живи́ мя.
Сы́не Бо́жий Всецарю́, Бо́же мой, Созда́телю мой, ка́ко страсть подъя́л еси́?
- Мно́зи изгоня́щии мя и стужа́ющии ми, от свиде́ний Твои́х не уклони́хся.
Ю́ница, Тельца́ на дре́ве пове́шена зря́щи, взыва́ше.
- Ви́дех неразумева́ющыя и иста́ях, я́ко слове́с Твои́х не сохрани́ша.
Те́ло живоно́сное Ио́сиф погреба́ет с Никоди́мом.
- Виждь, я́ко за́поведи Твоя́ возлюби́х, Го́споди, по ми́лости Твое́й живи́ мя.
Взыва́ше Отрокови́ца те́пле сле́зы точа́щи, утро́бою пробода́ема.
- Нача́ло слове́с Твои́х и́стина, и во век вся судьбы пра́вды Твоея́.
Све́те о́чию Мое́ю, Сладча́йшее Мое́ Ча́до! Ка́ко во гро́бе ны́не сокрыва́ешися?
- Кня́зи погна́ша мя ту́не, и от слове́с Твои́х убоя́ся се́рдце мое́.
Ма́ти, не рыда́й! Ада́ма и Е́ву свободи́ти, сия́ стра́жду.
- Возра́дуюся аз о словесе́х Твои́х, я́ко обрета́яй коры́сть мно́гу.
Прославля́ю Твое́, Сы́не Мой, кра́йнее милосе́рдие, его́же ра́ди сия́ стра́ждеши.
- Непра́вду возненави́дех и омерзи́х, зако́н же Твой возлюби́х.
О́цтом напое́н был еси́ и же́лчию, Ще́дре, разруша́я дре́внее вкуше́ние.
- Седмери́цею днем хвали́х Тя, о судьба́х пра́вды Твоея́.
Ко дре́ву пригвожде́н был еси́, дре́вле лю́ди Твоя́ столпо́м о́блачным покрыва́яй.
- Мир мног лю́бящым зако́н Твой, и несть им собла́зна.
Мироно́сицы, Спа́се, ко гро́бу прише́дша, ми́ро приноша́ху Тебе́.
- Ча́ях спасе́ния Твоего́, Го́споди, и за́поведи Твоя возлюби́х.
Воста́ни, Ще́дре, от про́пастей а́дских возставля́яй нас.
- Сохрани́ душа́ моя свиде́ния Твоя́ и возлюби́ я́ зело́.
Воскресни́, Жизнода́вче! Ро́ждшая Тя Ма́ти, сле́зы точа́щи, глаго́лет.
- Сохрани́х за́поведи Твоя́ и свиде́ния Твоя́, я́ко вси путие́ мои́ пред Тобо́ю, Го́споди.
Потщи́ся воскре́снути, Сло́ве, печа́ль разреша́я чи́сто Ро́ждшия Тя.
- Да прибли́жится моле́ние мое́ пред Тя, Го́споди, по словеси́ Твоему́ вразуми́ мя.
Небе́сныя си́лы ужасо́шася стра́хом, ме́ртва Тя зря́ща.
- Да вни́дет проше́ние мое́ пред Тя, Го́споди, по слове́си Твоему́ изба́ви мя.
Любо́вию и стра́хом Стра́сти Твоя́ почита́ющим даждь прегреше́ний разреше́ние.
- Отры́гнут устне́ мои́ пе́ние, егда́ научи́ши мя оправда́нием Твои́м.
О ужа́снаго и стра́ннаго виде́ния, Бо́жий Сло́ве! Ка́ко земля́ Тя покрыва́ет?
- Просвеща́ет язык мой словеса́ Твоя́, я́ко вся за́поведи Твоя́ пра́вда.
С Тобо́ю дре́вле, Спа́се, Ио́сиф бе́гает: и ны́не Тя ины́й погреба́ет.
- Да бу́дет рука Твоя́ е́же спасти́ мя, я́ко за́поведи Твоя́ изво́лих.
Пла́чет и рыда́ет Пречи́стая Ма́ти Твоя́, Спа́се мой, о Тебе́ уме́ршем.
- Возжела́х спасе́ние Твое́, Го́споди, и зако́н Твой поуче́ние мое́ есть.
Ужаса́ются умы́ стра́ннаго и ужа́снаго Твоего́, всех Созда́телю, погребе́ния.
- Жива́ бу́дет душа́ моя́, и восхва́лит Тя, и судьбы́ Твоя́ помо́гут мне.
Излия́ша на гроб мироно́сицы ми́ро, зело́ ра́но прише́дша.
- Заблуди́х я́ко овча́ поги́бшее, взыщи́ раба́ Твоего́, я́ко за́поведей Твои́х не забых.
Мир Це́ркви, лю́дем Твои́м спасе́ние да́руй воста́нием Твои́м.
Тропари́, глас 5
Благослове́н еси́, Го́споди, научи́ мя оправда́нием Твои́м.
А́нгельский собо́р удиви́ся, зря Тебе́ в ме́ртвых вмени́вшася, сме́ртную же, Спа́се, кре́пость разори́вша, и с собо́ю Ада́ма воздви́гша, и от ада вся свобо́ждша.
Благослове́н еси́, Го́споди, научи́ мя оправда́нием Твои́м.
Почто́ ми́ра с ми́лостивными слеза́ми, о ученицы́, растворяете? Блиста́яйся во гро́бе А́нгел, мироно́сицам веща́ше: ви́дите вы гроб, и уразуме́йте, Спас бо воскре́се от гро́ба.
Благослове́н еси́, Го́споди, научи́ мя оправда́нием Твои́м.
Зело́ ра́но мироно́сицы теча́ху ко гро́бу Твоему́ рыда́ющыя, но предста́ к ним А́нгел, и рече́; рыда́ния вре́мя преста́, не пла́чите, воскресе́ние же апо́столом рцы́те.
Благослове́н еси́, Го́споди, научи́ мя оправда́нием Твои́м.
Мироно́сицы жены, с ми́ры прише́дшыя ко гро́бу Твоему́, Спа́се, рыда́ху, А́нгел же к ним рече́, глаго́ля: что́ с ме́ртвыми жива́го помышля́ете? я́ко Бог бо воскре́се от гро́ба.
Сла́ва, Тро́ичен: Поклони́мся Отцу́, и Его́ Сы́нови, и Свято́му Ду́ху, Святе́й Трои́це во Еди́ном Существе́, с Серафи́мы зовуще: Свят, Свят, Свят еси́, Го́споди.
И ны́не, Богоро́дичен: Жизнода́вца ро́ждши, и греха́, Де́во, Ада́ма изба́вила еси́, ра́дость же Е́ве в печа́ли ме́сто подала́ еси́, па́дшыя же от жи́зни, к сей напра́ви, из Тебе́ воплоти́выйся Бог и Челове́к.
Аллилу́иа, Аллилу́иа, Аллилу́иа, сла́ва Тебе́, Бо́же. (3 раза)
Го́споди, поми́луй. (3 раза)
Моли́тва
Го́споди Бо́же наш, со́нное уны́ние отгна́вый от нас и сопризва́вый ны зва́нием святы́м, е́же и в нощи́ воздева́ти ру́ки на́ша и испове́датися Тебе́ о судьба́х пра́вды Твоея́. Приими́ мольбы́ на́ша, моле́ния, испове́дания, нощны́я слу́жбы, и да́руй нам, Бо́же, ве́ру непосты́дну, наде́жду изве́стну, любо́вь нелицеме́рну, благослови́ на́ша вхо́ды и исхо́ды, дея́ния, дела́, словеса́, помышле́ния, и да́ждь нам пости́гнути в нача́ло дне, хва́лящим, пою́щим, благословя́щим Твоея́ неизрече́нныя благосты́ни бла́гость. Аминь.
Седа́лен, глас 1
Сла́ва: Плащани́цею чи́стою и арома́ты Боже́ственными Те́ло Честно́е, испроси́в у Пила́та, Ио́сиф миропомазу́ет и полага́ет в но́ве гро́бе. Те́мже у́тру прише́дша, мироно́сицы же́ны возопи́ша: покажи́ нам, я́коже предре́кл еси́, Христе́, Воскресе́ние.
И ны́не: Ужасо́шася ли́цы А́нгельстии, зря́ще Седя́щаго в не́дрех О́тчих: ка́ко, я́ко мертв, во гроб полага́ется Безсме́ртный! Его́же чи́ни А́нгельстии окружа́ют и сла́вят с ме́ртвыми во а́де, я́ко Зижди́теля и Го́спода.
Святоотече́ское чте́ние (совершается сидя)
Молитва перед чтением: Моли́твами cвяти́теля Инноке́нтия, Го́споди Иису́се Христе́ Бо́же на́ш, поми́луй нас.
Об ожесточении первосвященников
(свят. Иннокентия, архиепископа Херсонского и Таврического)
Предписанный законом строгий покой великого дня субботы пасхальной связал бездействием самых пламенных почитателей Иисусовых, но не мог прекратить несчастной деятельности ожесточенных врагов Его. Злоба в этом случае показала, что она бывает иногда памятливее любви: если в уме учеников Иисусовых, как будто каким-либо чудом, приведены были в забвение Его многократные предсказания о Своем Воскресении из мертвых, то фарисеи и книжники не забыли этого и приняли меры против того, чтобы предсказание это не сбылось на самом деле. Привыкнув действовать нечисто, по внушению страстей и выгод, Каиафа и клевреты его воображали, что ученики Иисусовы, в отмщение за смерть Учителя, обязательно воспользуются подобным предсказанием, то есть унесут тайно тело Учителя из гроба, скажут народу, что Он воскрес из мертвых, и таким образом поднимут опасное для синедриона волнение. Погребение Его членом синедриона в собственном саду и гробе, казалось, открывало все возможности для такого поступка. Поэтому в тайном совете Каиафином немедленно решено – принять все необходимые меры и для этого окружить гроб Иисусов на три дня стражей. В подобной страже у первосвященников не было недостатка; все же они не решились действовать сами и почли за лучшее снова обратиться к прокуратору, как новая встреча с ним после событий предшествующего дня ни казалась тяжкой. Кроме того, что этим снималась ответственность за последствия новой меры, римская стража была гораздо надежнее иудейской из-за строгой дисциплины и полной непричастности народным волнениям из-за Иисуса. Явясь к Пилату, первосвященники и книжники приняли, по-прежнему, вид ревностных блюстителей общественного покоя и выгод римского правительства: «Мы вспомнили, – так говорили лицемеры, – что Этот льстец, еще будучи в живых, сказал: после трех дней Я воскресну из мертвых. Итак, прикажи охранять гроб до третьего дня, чтобы ученики Его, придя ночью, не украли Его и не сказали народу, что Он восстал из мертвых. В таком случае последний обман может быть хуже первого».
Гордый всадник римский, еще недавно так жестоко униженный этими самыми людьми перед целым народом, всего менее был расположен верить их заботам об общественном благе, но противиться явно предложению, которое казалось плодом дальновидной осторожности и неутомимого попечения о спокойствии народном, было не в духе римской власти. Поэтому Пилат немедленно согласился на предлагаемую меру, выразив, впрочем, свое недоверие к чистосердечию синедриона тем, что сам нисколько не принял в ней непосредственного участия.
«У вас есть кустодия, – отвечал Пилат (так называлась военная стража при храме), подите, возьмите из нее, сколько угодно, и стерегите гроб, как знаете».
Против такого мнимого доверия нечего было возразить, и первосвященники, взяв нужное число воинов, отправились в вертоград Иосифов. Тут, без сомнения, тщательно осмотрели всю внутренность погребальной пещеры, чтобы увериться в целости тела Иисусова и в том, что из пещеры нет другого выхода, кроме того, который завален был огромным камнем. После освидетельствования камень этот опять был привален ко входу и для большей безопасности от любой попытки войти в пещеру запечатан печатью синедриона. Поставленная стража также, без сомнения, была должным образом проинструктирована, получив приказ стеречь неусыпно то, от чего зависело, как говорили первосвященники, спокойствие целой Иудеи, Пилатовой претории и самого кесаря.
Таким образом, злоба врагов Иисусовых сделала, со своей стороны, все, что нужно было для засвидетельствования перед целым светом истины Воскресения Христова!.. Провидение и в этом случае показало, как оно, не подавляя нисколько свободы человеческой, премудро употребляет для достижения целей тех самых людей, которые идут нагло вопреки его святым определениям.
Молитва после чтения: Бо́гу на́шему сла́ва, всегда́, ны́не и при́сно, и во ве́ки веко́в. Ами́нь.
Библе́йские пе́сни
Песнь 6
На 12: Возопи́х в ско́рби мое́й ко Го́споду Бо́гу моему́, и услы́ша мя.
Припев: Я́ко про́рока Ио́ну, спаси́ мя, Го́споди.
Отве́ргл мя еси́ во глуби́ны се́рдца морска́го, и ре́ки обыдо́ша мя.
Припев: Я́ко про́рока Ио́ну, спаси́ мя, Го́споди.
На 10: Вся высоты́ Твоя́ и во́лны Твоя́ на мне преидо́ша.
Припев: Я́ко про́рока Ио́ну, спаси́ мя, Го́споди.
Еда́ приложу́ призре́ти ми ко хра́му свято́му Твое́му?
Припев: Я́ко про́рока Ио́ну, спаси́ мя, Го́споди.
На 8: Возлия́ся вода́ до души́ моея́, бе́здна обы́де мя после́дняя.
Припев: Я́ко про́рока Ио́ну, спаси́ мя, Го́споди.
Понре́ глава́ моя́ в разсе́ли гор, снидо́х в зе́млю, ея́же вереи́ ея́ закле́пи ве́чнии.
Ирмос, глас 6: Ят бысть, но не удержа́н в пе́рсех кито́вых Ио́на: Твой бо о́браз нося, страда́вшаго, и погребе́нию да́вшагося, я́ко от черто́га от зве́ря изыде, приглаша́ше же кустоди́и: храня́щим су́етная и ло́жная, ми́лость сию́ оста́вили есте́.
На 6: И да взы́дет из истле́ния живо́т мой к Тебе́, Го́споди Бо́же мой.
Го́споди Бо́же мой, исхо́дное пе́ние, и надгро́бную Тебе́ песнь воспою́, погребе́нием Твои́м жи́зни моея́ вхо́ды отве́рзшему, и сме́ртию смерть и ад умертви́вшему.
И да прии́дет к Тебе́ моли́тва моя́, ко хра́му свято́му Твоему́.
Горе́ Тя на престо́ле, и до́ле во гро́бе, преми́рная и подзе́мная помышля́ющая, Спа́се мой, зы́бляхуся умерщвле́нием Твои́м: па́че ума бо, ви́ден был еси́ мертв. Живонача́льниче.
Храня́щии су́етная и ло́жная ми́лость свою́ оста́виша.
Да Твоея́ сла́вы вся испо́лниши, сшел еси́ в ни́жняя земли́: от Тебе́ бо не скры́ся соста́в мой и́же во Ада́ме, и погребе́н истле́вша мя обновля́еши, Человеколю́бче.
Ели́ка обеща́х — возда́м Тебе́, во спасе́ние мое́, Го́сподеви.
О́бразы погребе́ния Твоего́ показа́л еси́, виде́ния умно́жив: ны́не же сокрове́нная Твоя́ Богому́жно уясни́л еси́, и су́щым во аде Влады́ко, несть Свят, разве Тебе́, Го́споди, взыва́ющым.
Сла́ва Отцу́, и Сы́ну, и Свято́му Ду́ху.
Просте́рл еси́ дла́ни, и соедини́л еси́ дре́вле разстоя́щаяся: одея́нием же, Спа́се, е́же в плащани́це и во гро́бе, окованныя разреши́л еси́, несть Свят, разве Тебе́, Го́споди, взыва́ющыя.
И ны́не, и при́сно, и во ве́ки веко́в. Ами́нь.
Гро́бом и печа́тьми, Невмести́ме, содержи́мь был еси́ хоте́нием: и́бо си́лу Твою́ де́йствы показа́л еси́, богоде́йственно пою́щым: несть Свят, ра́зве Тебе́, Го́споди Человеколю́бче.
Песнь 7
На 12: Благослове́н еси́, Го́споди Бо́же оте́ц на́ших, и хва́льно, и просла́влено и́мя Твое́ во ве́ки.
Припев: Оте́ц и наш Бо́же, благослове́н еси́!
И вся дела́ Твоя́ и́стинна, и пра́ви путие́ Твои́.
Припев: Оте́ц и наш Бо́же, благослове́н еси́!
На 10: И вси суди́ Твои́ и́стинни, и судьбы́ и́стинны сотвори́л еси́.
Припев: Оте́ц и наш Бо́же, благослове́н еси́!
И на град святы́й оте́ц на́ших, Иерусали́м.
Припев: Оте́ц и наш Бо́же, благослове́н еси́!
На 8: Благослове́н еси́, Го́споди Бо́же оте́ц на́ших, и препе́тый, и превозноси́мый во ве́ки.
Припев: Оте́ц и наш Бо́же, благослове́н еси́!
И благослове́но и́мя сла́вы Твоея́ свято́е, препе́тое и превозноси́мое во ве́ки.
Ирмос: Неизрече́нное чудо, в пещи́ Изба́вивый преподо́бныя о́троки из пла́мене, во гро́бе мертв бездыха́нен полага́ется, во спасе́ние нас пою́щих: Изба́вителю Бо́же, благослове́н еси́.
На 6: Благослове́н еси́ в хра́ме святы́я сла́вы Твоея́, препе́тый и превозноси́мый во ве́ки.
Седмы́й день днесь освяти́л еси́, его́же дре́вле благослови́л еси́ упокое́нием дел: прево́диши бо вся́ческая и обновля́еши, суббо́тствуя, Спа́се мой, и назидая.
Благослове́н еси́ Ви́дяй бе́здны, Седя́й на херуви́мех, препе́тый и превозноси́мый во ве́ки.
Си́лою лу́чшаго, победи́вшаго Тебе́, от пло́ти душа́ Твоя́ раздели́ся: растерза́ющи бо обоя́ у́зы, сме́рти и а́да, Сло́ве, держа́вою Твое́ю.
Благослове́н еси́ на Престо́ле сла́вы Ца́рствия Твоего́, препе́тый и превозноси́мый во ве́ки.
Ад, Сло́ве, срет Тя огорчи́ся, Челове́ка зря обоже́на, уя́звлена ра́нами, и Всеси́льноде́теля, Стра́шным же зра́ком поги́бе.
Благослове́н еси́ на тве́рди небе́сней, препе́тый и превозноси́мый во ве́ки.
Новотвори́ши земныя Создателю, пе́рстен быв, и плащаница и гроб явля́ют е́же в Тебе́, Сло́ве, та́инство: благообразный бо сове́тник, Тебе́, ро́ждшаго сове́т, образу́ет, в Тебе́ велеле́пно новотво́рящаго мя.
Сла́ва Отцу́, и Сы́ну, и Свято́му Ду́ху.
Сме́ртию сме́ртное, погребе́нием тле́нное прелага́еши, нетле́нно твори́ши бо, благоле́пно безсме́ртно творя́ прия́тие: плоть бо Твоя́ истле́ния не ви́де, Влады́ко, ниже́ душа́ Твоя́ во аде стра́нноле́пно оставле́на бысть.
И ны́не, и при́сно, и во ве́ки веко́в. Ами́нь.
Из Небра́чныя проше́д, и прободе́н в ре́бра, Соде́телю мой, из Нея́ соде́лал еси́ обновле́ние Е́вино, Ада́м быв, усну́в па́че естества́ сном есте́ственным, и жизнь воздви́гнув от сна и тле́ния я́ко Всеси́лен.
Песнь 8
На 12: Благослови́те, вся дела́ Госпо́дня, Го́спода.
Припев: Го́спода по́йте, дела, и превозноси́те Его́ во ве́ки.
Благослови́те, а́нгели Госпо́дни, небеса́ Госпо́дня, Го́спода.
Припев: Го́спода по́йте, дела, и превозноси́те Его́ во ве́ки.
На 10: Благослови́те, во́ды вся, я́же превыше небе́с, вся си́лы Госпо́дни, Го́спода.
Припев: Го́спода по́йте, дела, и превозноси́те Его́ во ве́ки.
Благослови́те, со́лнце и ме́сяц, зве́зды небе́сныя, Го́спода.
Припев: Го́спода по́йте, дела, и превозноси́те Его́ во ве́ки.
На 8: Благослови́те, вся пти́цы небе́сныя, зве́рие и вси ско́ти, Го́спода.
Припев: Го́спода по́йте, дела, и превозноси́те Его́ во ве́ки.
Благослови́те, сы́нове челове́честии, да благослови́т Израиль, Го́спода.
Ирмос: Ужасни́ся боя́йся не́бо, и да подви́жатся основа́ния земли́: се бо в мертвеце́х вменя́ется в Вы́шних живы́й, и во гроб мал странноприе́млется. Его́же о́троцы благослови́те, свяще́нницы воспо́йте, лю́дие превозноси́те во вся ве́ки.
На 6: Благослови́те, свяще́нницы Госпо́дни, раби́ Госпо́дни, Го́спода.
Бие́н был еси́, но не раздели́лся, еси́, Сло́ве, ея́же причасти́лся еси́ пло́ти: а́ще бо и разори́ся Твой храм во вре́мя стра́сти, но и та́ко еди́н бе соста́в Бо́жества и пло́ти Твоея́. Во обои́х бо еди́н еси́ Сын, Сло́во Бо́жие, Бог и Челове́к.
Благослови́те, ду́си и ду́ши пра́ведных, преподо́бнии и смире́ннии се́рдцем, Го́спода.
Человекоуби́йственно, но не богоуби́йственно бысть прегреше́ние Ада́мово: а́ще бо и пострада́ Твоея́ пло́ти пе́рстное существо́, но Бо́жество́ безстра́стно пребы́сть: тле́нное же Твое́ на нетле́ние преложи́л еси́, и нетле́нныя жи́зни показа́л еси́ Исто́чник воскресе́нием.
Благослови́те, Ана́ния, Аза́рия, Мисаи́л, Го́спода.
Ца́рствует ад, но не ве́чнует, над ро́дом челове́ческим: Ты бо поло́жся во гро́бе держа́вне. Живонача́льною дла́нию, сме́рти ключи́ разве́ргл еси́, и пропове́дал еси́ от ве́ка та́мо спя́щым избавле́ние нело́жное, быв Спа́се ме́ртвым Пе́рвенец.
Благослови́те, апо́столи, проро́цы и му́ченицы Госпо́дни, Го́спода.
Уязви́ся ад, в се́рдце прие́м Уязве́ннаго копие́м в ре́бра, и воздыха́ет огне́м Боже́ственным иждива́емь, во спасе́ние нас пою́щих: Изба́вителю Бо́же, благослове́н еси́.
Благослови́м Отца́, и Сы́на, и Свята́го Ду́ха, Го́спода.
Бога́т гроб, в себе́ бо прии́м я́ко спя́ща Соде́теля, жи́зни Боже́ственное сокро́вище показа́ся, во спасе́ние нас пою́щих: Изба́вителю Бо́же, благослове́н еси́.
И ны́не, и при́сно, и во ве́ки веко́в. Ами́нь.
Зако́ном уме́рших еже во гро́бе положе́ние, всех прие́млет жизнь, и сего́ исто́чника показу́ет воста́ния, во спасе́ние нас пою́щих: Изба́вителю Бо́же, благослове́н еси́.
Песнь 9
На 12: Благослове́н Госпо́дь Бог Изра́илев, я́ко посети́ и сотвори́ избавле́ние лю́дем Свои́м.
Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.
И воздви́же рог спасе́ния нам в дому́ Дави́дове, о́трока Своего́.
Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.
На 10: Я́коже глаго́ла усты́ святы́х, су́щих от ве́ка проро́к Его́: спа́сение от враг на́ших и из руки́ всех, ненави́дящих нас.
Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.
Сотвори́ти ми́лость со отцы́ на́шими и помяну́ти заве́т святы́й Свой.
Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.
На 8: Кля́тву, е́юже кля́тся ко Авраа́му, отцу́ на́шему, да́ти нам без стра́ха, из руки́ враг на́ших изба́вльшимся.
Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.
Служи́ти Ему́ преподо́бием и пра́вдою пред Ним вся дни живота́ на́шего.
Ирмос: Не рыда́й Мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо и просла́влюся, и вознесу́ со сла́вою непреста́нно, я́ко Бог, ве́рою и любо́вию Тя велича́ющыя.
На 6: И ты, отроча́, проро́к Вы́шняго нарече́шися, преды́деши бо пред лице́м Госпо́дним, угото́вати пути́ Его́.
Разруши́ся Пречи́стый Храм, па́дшую же совозставля́ет ски́нию: Ада́му бо пе́рвому Вторы́й, И́же в Вы́шних живы́й, сни́де да́же до а́довых сокро́вищ. Его́же о́троцы благослови́те, свяще́нницы воспо́йте, лю́дие превозноси́те во вся ве́ки.
Да́ти ра́зум спасе́ния лю́дем Его́ во оставле́ние грех их, милосе́рдия ра́ди ми́лости Бо́га на́шего.
Преста де́рзость ученико́в, Аримафе́й же изря́дствует Ио́сиф: ме́ртва бо и на́га зря над все́ми Бо́га, про́сит и погреба́ет, зовы́й: о́троцы благослови́те, свяще́нницы воспо́йте, лю́дие превозноси́те во вся ве́ки.
В ни́хже посети́ нас Восто́к с высоты́, яви́тися во тьме и се́ни сме́ртней седя́щим.
О чуде́с но́вых! О бла́гости! О неизрече́ннаго терпе́ния! Во́лею бо под земле́ю печатле́ется, И́же в Вы́шних живы́й, и я́ко льстец, Бог оклевета́ется. Его́же о́троцы благослови́те, свяще́нницы воспо́йте, лю́дие превозноси́те во вся ве́ки.
Напра́вити но́ги на́ша на путь ми́рен.
В стра́ннем Твое́м рождестве́, боле́зней избежа́вши па́че естества, ублажи́хся Безнача́льне Сы́не: ны́не же Тя, Бо́же Мой, бездыха́нна зря́щи ме́ртва, ору́жием печа́ли растерза́юся лю́те, но воскресни́, я́ко да возвели́чуся.
Сла́ва Отцу́, и Сы́ну, и Свято́му Ду́ху.
Земля́ покрыва́ет Мя хотя́ща, но устраша́ются а́довы вра́тницы, оде́яна ви́дяще оде́ждею окровавле́ною Ма́ти, отмще́ния: враги́ бо Кресто́м порази́в я́ко Бог, воскре́сну па́ки, и возвели́чу Тя.
И ны́не, и при́сно, и во ве́ки веко́в. Ами́нь.
Да радуется тварь, да веселя́тся вси земноро́днии, враг бо плени́ся ад: с ми́ры же́ны да срета́ют, Ада́ма со Е́вою избавля́ю всеро́дна, и в тре́тий день воскре́сну.
Катавасия: Не рыда́й Мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо и просла́влюся, и вознесу́ со сла́вою непреста́нно, я́ко Бог, ве́рою и любо́вию Тя велича́ющыя.
Моли́тва по оконча́нии библе́йских пе́сен
Бо́же, Бо́же наш, у́мныя и слове́сныя соста́вивый си́лы Твое́ю во́лею! Мо́лим Тя: приими́ на́ше, по си́ле, славосло́вие, со все́ми созда́нии Твои́ми, и бога́тыми Твоея́ бла́гости возда́ждь дарова́ньми. Я́ко Тебе́ преклоня́ется вся́кое коле́но небе́сных, и земны́х, и преиспо́дних, и вся́кое дыха́ние и созда́ние пое́т непостижи́мую Твою́ сла́ву: Еди́н бо еси́ Бог, И́стинный и Многоми́лостивый. Я́ко Тя хва́лят вся Си́лы Небе́сныя, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.
Псало́м 148
Хвали́те Го́спода с небе́с, хвали́те Его́ в вы́шних. Хвали́те Его́, вси ангели Его́, хвали́те Его́, вся си́лы Его́. Хвали́те Его́, со́лнце и луна́, хвали́те Его́, вся зве́зды и свет. Хвали́те Его́, Небеса́ небе́с и вода́, я́же превы́ше небе́с. Да восхва́лят и́мя Госпо́дне: я́ко Той рече́ - и бы́ша, Той повеле́ - и созда́шася. Поста́ви их в век и в век ве́ка, повеле́ние положи́ - и не ми́мо и́дет. Хвали́те Го́спода от земли́: ца́рие зе́мстии и вси лю́дие, кня́зи и вси судии́ зе́мстии, ю́ноши и де́вы, ста́рцы с ю́нотами да восхва́лят и́мя Госпо́дне, я́ко вознесе́ся и́мя Того́ Еди́наго, испове́дание Его́ на земли́ и на небеси́.
Псало́м 149
Воспо́йте Го́сподеви песнь но́ву: хвале́ние Его в це́ркви преподо́бных. Восхва́лятся преподо́бнии во сла́ве и возра́дуются на ло́жах свои́х. Возноше́ния Бо́жия в горта́ни их, и мечи́ обою́ду остры́ в рука́х их, сотвори́ти отмще́ние во язы́цех, обличе́ния в лю́дех, связа́ти цари́ их пу́ты и сла́вныя их ручны́ми око́вы желе́зными, сотвори́ти в них суд напи́сан. Сла́ва сия́ бу́дет всем преподо́бным Его́.
Псало́м 150
Стих: Хвали́те Бо́га во святы́х Его́, хвали́те Его́ во утверже́нии си́лы Его́. /
Тебе́ сла́ва подоба́ет, Го́споди.
Стих: Хвали́те Его́ на си́лах Его́, / хвали́те Его́ по мно́жеству вели́чествия Его́.
Глас 2. Днесь соде́ржит гроб Содержа́щаго дла́нию тварь, / покрыва́ет ка́мень Покры́вшаго доброде́телию Небеса́, / спит Живо́т, и ад трепе́щет, и Ада́м от уз разреша́ется. / Сла́ва Твоему́ смотре́нию, / и́мже соверши́в все упокое́ние ве́чное,// дарова́л еси́ нам, Бо́же, всесвято́е из ме́ртвых Твое воскресе́ние.
Стих: Хвали́те Его́ во гла́се тру́бнем, / хвали́те Его́ во псалти́ри и гу́слех.
Что́ зри́мое виде́ние? / Ко́е настоящее упокое́ние? / Царь веко́в, И́же стра́стию соверши́в смотре́ние, / во гро́бе суббо́тствует, но́вое нам пода́й суббо́тство, / Тому возопии́м: воскресни́, Бо́же, судяй земли́, / я́ко Ты Ца́рствуеши во ве́ки, // неизме́рную име́яй ве́лию ми́лость.
Стих: Хвали́те Его́ в тимпа́не и ли́це, / хвали́те Его́ во стру́нах и орга́не.
Прииди́те ви́дим Живо́т наш во гро́бе лежа́щ, / да во гробе́х лежа́щыя оживи́т. / Прииди́те днесь и́же из Иу́ды спя́ща зря́ще, / проро́чески Ему́ возопии́м: / возле́г уснул еси́ я́ко лев, / кто воздви́гнет Тя, Царю́? /Но воста́ни самовла́стно, да́вый Себе́ о нас во́лею, // Го́споди, сла́ва Тебе́.
Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.
Глас 6. Проси́ Ио́сиф те́ло Иису́сово, / и положи́ Е́ в но́вем свое́м гро́бе: / подоба́ше бо Ему́ из гро́ба, я́ко из черто́га пройти́. / Сокруши́вый держа́ву сме́рти, и отве́рзый врата райская челове́ком, // Го́споди, сла́ва Тебе́.
Сла́ва, глас 6: Дне́шний день та́йно вели́кий Моисе́й прообразова́ше, глаго́ля: / и благослови́ Бог день седмы́й: / сия́ бо есть благослове́нная суббо́та, / сей есть упокое́ния день, / в о́ньже почи́ от всех дел Свои́х Единоро́дный Сын Бо́жий,/ смотре́нием еже на смерть, пло́тию суббо́тствовав: / и во е́же бе, па́ки возвра́щся воскресе́нием, дарова́ нам живо́т ве́чный, // я́ко Еди́н Благ и Человеколю́бец.
И ны́не, глас 2: Преблагослове́нна еси́, Богоро́дице Де́во, / Вопло́щшим бо ся из Тебе́ ад плени́ся, / Ада́м воззва́ся, / кля́тва потреби́ся, / Е́ва свободи́ся, / смерть умертви́ся, и мы ожи́хом. / Тем воспева́юще вопие́м: / благослове́н Христо́с Бог, / благоволи́вый та́ко, сла́ва Тебе́.
Сла́ва Тебе́, показа́вшему нам свет.
Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя вели́кия ра́ди сла́вы Твоея́. Го́споди, Царю́ Небе́сный, Боже, О́тче Вседержи́телю, Го́споди Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас. Взе́мляй грехи́ ми́ра, приими́ моли́тву на́шу. Седя́й одесну́ю Отца́, поми́луй нас. Я́ко Ты еси́ Еди́н Свят; Ты еси́ Еди́н Госпо́дь, Иису́с Христо́с, во сла́ву Бо́га Отца́, ами́нь.
На всяк день благословлю́ Тя и восхвалю́ и́мя Твое́ во ве́ки, и в век ве́ка. Сподо́би, Го́споди, в день сей без греха́ сохрани́тися нам. Благослове́н еси́, Го́споди Бо́же оте́ц на́ших, и хва́льно и просла́влено и́мя Твое́ во ве́ки, ами́нь.
Бу́ди, Го́споди, ми́лость Твоя́ на нас, я́коже упова́хом на Тя.
Благослове́н еси́, Го́споди, научи́ мя оправда́нием Твои́м. (3 раза)
Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́.
Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой, я́ко у тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.
Святы́й Бо́же, Святы́й Кре́пкий, Святы́й Безсме́ртный, поми́луй нас. (3 раза)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй. (3 раза) Сла́ва, и ны́не:
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго. Я́ко Твое́ есть Ца́рство, и си́ла, и сла́ва, ны́не и при́сно, и во ве́ки веко́в. Ами́нь.
Тропа́рь, глас 2
Благообра́зный Ио́сиф, с дре́ва снем Пречи́стое Те́ло Твое́, Плащани́цею чи́стою обви́в, и воня́ми во гро́бе но́ве покры́в положи́.
Сла́ва, и ны́не: Егда́ снизше́л еси к сме́рти, Животе́ безсме́ртный, тогда́ ад умертви́л еси блиста́нием Божества́: егда́ же и уме́ршия от преиспо́дних воскреси́л еси, вся си́лы небе́сныя взыва́ху: Жизнода́вче Христе́ Бо́же наш, сла́ва Тебе́.
И чтется 12-е Ева́нгелие Святы́х Страсте́й
Во у́трий день, и́же есть по пятце́, собра́шася архиере́е и фарисе́е к Пила́ту, глаго́люще: Го́споди, помяну́хом, я́ко льстец он рече́ еще́ сый жив: по трие́х днех воста́ну. Повели́ у́бо утверди́ти гроб до тре́тияго дне: да не ка́ко прише́дше ученицы́ Его́ но́щию, украду́т Его́ и реку́т людем: воста от ме́ртвых. И бу́дет после́дняя лесть го́рша пе́рвыя. Рече́ же им Пила́т: и́мате кустоди́ю, иди́те утверди́те, я́коже ве́сте. Они́ же ше́дше утверди́ша гроб, знамена́вше ка́мень с кустоди́ею.
Моли́тва св. Васи́лия Вели́кого
Го́споди Вседержи́телю, Бо́же сил и вся́кия пло́ти, в вы́шних живы́й и на смире́нныя призира́яй, сердца́ же и утро́бы испыту́яй и сокрове́нная челове́ков я́ве предве́дый, Безнача́льный и Присносу́щный Све́те, у Него́ же несть премене́ние, или́ преложе́ния осене́ние; Сам, Безсме́ртный Царю́, приими́ моле́ния на́ша, я́же в настоя́щее вре́мя, на мно́жество Твои́х щедро́т дерза́юще, от скве́рных к Тебе́ усте́н твори́м, и оста́ви нам прегреше́ния на́ша, я́же де́лом, и сло́вом, и мы́слию, ве́дением, или́ неве́дением согреше́нная на́ми; и очи́сти ны от вся́кия скве́рны пло́ти и ду́ха. И да́руй нам бо́дренным се́рдцем и тре́звенною мы́слию всю настоя́щаго жития́ нощь прейти́, ожида́ющим прише́ствия све́тлаго и явле́ннаго дне Единоро́днаго Твоего́ Сы́на, Го́спода и Бо́га и Спа́са на́шего Иису́са Христа́, во́ньже со сла́вою Судия́ всех прии́дет, кому́ждо отда́ти по де́лом его́; да не па́дше и облени́вшеся, но бо́дрствующе и воздви́жени в де́лание обря́щемся гото́ви, в ра́дость и Боже́ственный черто́г сла́вы Его́ совни́дем, иде́же пра́зднующих глас непреста́нный, и неизрече́нная сла́дость зря́щих Твоего́ лица́ добро́ту неизрече́нную. Ты бо еси́ и́стинный Свет, просвеща́яй и освяща́яй вся́ческая, и Тя пое́т вся тварь во ве́ки веко́в. Ами́нь.
Досто́йно есть я́ко вои́стину блажи́ти Тя, Богоро́дицу, Присноблаже́нную и Пренепоро́чную, и Ма́терь Бо́га на́шего. Честне́йшую херуви́м и сла́внейшую без сравне́ния серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Го́споди, поми́луй. (3 раза)
Го́споди Иису́се Христе́, Сы́не Бо́жий, моли́твами Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, поми́луй и спаси́ мя, я́ко Благ и Человеколю́бец. Ами́нь.